Moldova ombudsmanı: BMT-də Xocalı faciəsinə hüquqi qiymət verilməsi üçün xüsusi statuslu məhkəmə yaradılmalıdır

Bakı:

15 °C

94 %

8 m/s

AZ RU EN

Ana səhifə / Siyasət / Moldova ombudsmanı: BMT-də Xocalı faciəsinə hüquqi qiymət verilməsi üçün xüsusi statuslu məhkəmə yaradılmalıdır

Moldova ombudsmanı: BMT-də Xocalı faciəsinə hüquqi qiymət verilməsi üçün xüsusi statuslu məhkəmə yaradılmalıdır

26.02.2014 [09:47]

Azərbaycanlıların və digər Türkdilli Xalqların Əməkdaşlıq Mərkəzinin, Milli QHT Forumunun və Mətbuat Şurasının birgə təşkilatçılığı ilə Xocalı faciəsinin 22-ci ildönümünə həsr olunmuş tədbir keçirilib.
AzərTAc xəbər verir ki, Beynəlxalq Mətbuat Mərkəzində keçirilən tədbirdə ölkəmizdə fəaliyyət göstərən QHT-lərin nümayəndələri və jurnalistlər iştirak ediblər.
Milli QHT Forumunun prezidenti Rauf Zeyni 1992-ci ilin fevralında ermənilərin Xocalıda törətdikləri vəhşiliklərdən, Azərbaycan dövlətinin və qeyri-hökumət təşkilatlarının Xocalı soyqırımının dünyada tanıdılması istiqamətində məqsədyönlü fəaliyyətlərindən danışıb. Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” kampaniyası çərçivəsində bu istiqamətdə mühüm uğurların əldə edildiyi vurğulanıb. R.Zeyni deyib ki, Xocalı soyqırımının bir neçə ölkənin parlamentində tanınmasına baxmayaraq, əksər dövlətlər bu məsələdə hələ də ikili standartlardan çıxış edir: “Ümid edirik ki, haqq-ədalət tezliklə öz yerini tapacaq, beynəlxalq ictimaiyyət Xocalı hadisələrinə siyasi-hüquqi qiymət verəcək və bu faciəni törədənlər cəzalandırılacaqlar”.
Mətbuat Şurasının sədri Əflatun Amaşov deyib ki, Xocalı faciəsi bəşər tarixinin qanlı səhifəsidir. Tarixə ekskursiya etsək görərik ki, istər 1905-1907-ci illərdə, istərsə də II Dünya müharibəsindən sonra Ermənistanda yaşayan azərbaycanlılar sürgün olunub, qətlə yetiriliblər. 1918-ci ilin martında ermənilər Bakıda soyqırımı törədiblər. Xocalı qətliamı isə bu soyqırımıların zirvəsində dayanır. Ə.Amaşov vurğulayıb ki, Azərbaycanın qarşısında duran ən böyük məqsəd Xocalı soyqırımını daha geniş şəkildə dünya ictimaiyyətinin diqqətinə çatdırmaqdır. Bununla da bütün dünya mənfur düşmənin simasını daha yaxşı tanıyacaq.
Moldova ombudsmanı Aureliya Qriqoriu bildirib ki, Xocalı həqiqətlərini beynəlxalq tribunala çıxarsaq bunun nə qədər böyük bir faciə olduğunu dünyaya çatdırmış olarıq. O deyib: “Mən İrəvandakı çıxışım zamanı bütün həqiqətləri ermənilərin diqqətinə çatdırdım. İyirmi iki il keçməsinə baxmayaraq, bu faciəyə siyasi-hüquqi qiymət verilməmişdir. Hesab edirəm ki, BMT tərkibində Xocalı faciəsinə hüquqi qiymət verilməsi üçün xüsusi statuslu məhkəmə yaradılmalıdır. Ermənilərin bir daha Azərbaycanla bağlı çirkin əməllər törətməsinə imkan verilməməlidir. Artıq ermənilərin dünya ictimaiyyətinin gözündən pərdə asdığı bəsdir”.
Sonda BMT-yə, Avropa Şurasına, ATƏT-ə, ayrı-ayrı ölkələrdə fəaliyyət göstərən insan hüquqları təşkilatlarına QHT-lər adından müraciət qəbul olunub.

Paylaş:

Baxılıb: 931 dəfə