Naxçıvan Muxtar Respublikası Ali Məclisində görüş

Bakı:

18 °C

82 %

3 m/s

Əlaqə

AZ RU EN

Ana səhifə / Siyasət / Naxçıvan Muxtar Respublikası Ali Məclisində görüş

Naxçıvan Muxtar Respublikası Ali Məclisində görüş

25.10.2014 [11:58]

Oktyabrın 24-də Naxçıvan Muxtar Respublikası Ali Məclisinin Sədri Vasif Talıbov Türkdilli Dövlətlərin Əməkdaşlıq Şurasının 3-cü Biznes Forumunun iştirakçıları ilə görüşüb.
Naxçıvan Muxtar Respublikası Ali Məclisinin mətbuat xidmətindən AzərTAc-a bildiriblər ki, qonaqları səmimiyyətlə salamlayan Ali Məclisin Sədri Türkdilli Dövlətlərin Əməkdaşlıq Şurasının 3-cü Biznes Forumunun qədim türk torpağı olan Naxçıvanda keçirilməsinin mühüm əhəmiyyətə malik olduğunu söyləyib. Qeyd olunub ki, Ermənistanın işğalçılıq siyasəti nəticəsində muxtar respublika 23 ildir blokada şəraitində yaşayır. Lakin buna baxmayaraq muxtar respublikanın iqtisadi inkişafı təmin edilib. Ümummilli liderimiz Heydər Əliyevin ötən əsrin 90-cı illərində ölkəmizin inkişafına məhz muxtar respublikadan başladığını bildirən Ali Məclisin Sədri Naxçıvanın türk dünyasının qapısı kimi mühüm strateji mövqedə yerləşdiyini diqqətə çatdırıb.
Muxtar respublikanın mövcud iqtisadi potensialı, elm, təhsil, səhiyyə, turizm və informasiya texnologiyalarının tətbiqi sahəsində görülən işlər haqqında qonaqlara ətraflı məlumat verən Ali Məclisin Sədri deyib ki, bu gün muxtar respublikada daxili tələbatın yerli istehsal hesabına ödənilməsi diqqət mərkəzində saxlanılır. Sahibkarlıq fəaliyyəti üçün yaradılan şərait, güzəştli şərtlərlə kreditlərin verilməsi özəl bölmənin inkişafına təkan verib. Hazırda muxtar respublikada iqtisadi inkişafın əsas göstərici hesab edilən ərzaq təhlükəsizliyi tam təmin olunub.
Ali Məclisin Sədri Türkdilli Dövlətlərin Əməkdaşlıq Şurasının 3-cü Biznes Forumunun işinə uğurlar arzulayıb.
Türkdilli Dövlətlərin Əməkdaşlıq Şurasının baş katibi Ramil Həsənov Forumun yüksək səviyyədə təşkilinə görə qonaqlar adından minnətdarlıq edib, Türkdilli Ölkələrin Əməkdaşlıq Şurasının 2009-cu ildə Naxçıvanda keçirilən Türkdilli ölkələrin dövlət başçılarının IX zirvə görüşü zamanı yaradıldığını xatırladıb. Əməkdaşlıq Şurasının fəaliyyəti barədə ətraflı məlumat verən Ramil Həsənov muxtar respublikanın 90 illik yubileyi çərçivəsində keçirilən bu tədbirin səmərəli olacağını bildirib.
Türkiyə Palatalar və Birjalar Birliyinin prezidenti Rıfat Hisarcıklıoğlu muxtar respublikanın yaradılmasının 90 illik yubileyi münasibətilə Ali Məclisin Sədrini təbrik edib, Türkiyə-Azərbaycan münasibətlərinin inkişafında Naxçıvan Muxtar Respublikasının mühüm rolu olduğunu diqqətə çatdırıb. O, muxtar respublikanın dinamik inkişafının məmnunluq doğurduğunu bildirib.
Görüşdə Azərbaycan Respublikası iqtisadiyyat və sənaye nazirinin müavini Sahib Məmmədov, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) prezidenti Məmməd Musayev, Qırğızıstan Ticarət və Sənaye Palatasının prezidenti Marat Şarşekeyev, Qazaxıstan Beynəlxalq Ticarət Palatasının idarə heyəti sədrinin müavini Abdulla Kundakbayev və Qazaxıstan İşəgötürənlər Konfederasiyası idarə heyətinin sədri Kadır Baykenov Türkdilli Dövlətlərin Əməkdaşlıq Şurasının 3-cü Biznes Forumunun üzv dövlətlər arasında mövcud olan qarşılıqlı faydalı əməkdaşlığa töhfə verəcəyini vurğulayıblar.
Sonra Türkdilli Dövlətlərin Əməkdaşlıq Şurasının baş katibi Ramil Həsənov Əməkdaşlıq Şurasının rəsmi gerbini Ali Məclisin Sədrinə təqdim edib, xatirə şəkli çəkdirilib.

Paylaş:

Baxılıb: 657 dəfə