ATƏT DTİHB-nin keçirilməmiş seçkiləri şübhə altına alması “Avropa demokratiyası”nın əsl mahiyyətini göstərir

Bakı:

29 °C

57 %

10 m/s

AZ RU EN

Ana səhifə / Siyasət / ATƏT DTİHB-nin keçirilməmiş seçkiləri şübhə altına alması “Avropa demokratiyası”nın əsl mahiyyətini göstərir

ATƏT DTİHB-nin keçirilməmiş seçkiləri şübhə altına alması “Avropa demokratiyası”nın əsl mahiyyətini göstərir

17.09.2015 [10:06]

“Demokratiya” məfhumunu monopoliyaya alan Qərbdəki bəzi dairələr bu məsələdən istifadə edərək Azərbaycana qarşı təzyiq mexanizmi formalaşdırmağa çalışırlar
Azərbaycan dünya miqyasında dinamik inkişaf tempinə malik olan ölkələr sırasında avanqard yerlərdən birini tutur. Bu inkişafın əsasında uğurla, uzaqgörənliklə reallaşdırılan praqmatik siyasi kurs dayanır. Milli inkişaf modelinin uğurla tətbiqi və hədəflənən nəticələrin əldə olunması, sosial-siyasi islahatların davamlı olaraq həyata keçirilməsi, qanunvericilik bazasının zənginləşdirilməsi, vətəndaş cəmiyyəti və hüquqi dövlətin inkişafına maksimum əlverişli şəraitin yaradılması, möhkəm təməllərə söykənən ictimai-siyasi sabitliyin təmin və mühafizə olunması, ölkəmizin beynəlxalq münasibətlər sisteminin nüfuz və güc iyerarxiyasında sürətlə irəliləməsi və digər nailiyyətlər müasir müstəqil Azərbaycanın gerçəkliklərini təşkil edir.
Azərbaycan demokratik dəyər və təsisatların təşəkkül tapdığı müasir hüquqi dövlətdir
Bununla yanaşı, Azərbaycan demokratik dəyər və təsisatların təşəkkül tapdığı müasir hüquqi dövlətdir. Ölkəmizdə daxili siyasət kursunun mühüm istiqamətlərindən birini demokratik təsisatların təkmilləşdirilməsi, insan və vətəndaş hüquq və azadlıqlarının təmin və müdafiə edilməsi təşkil edir. Eyni zamanda, demokratik islahatları uğurla davam etdirən Azərbaycan, sözün əsl mənasında, sabitlik adası kimi səciyyələndirilir. Bu məsələdə yerli və xarici ekspertlərin ümumi rəyi odur ki, Azərbaycanda hökm sürən və ardıcıl səciyyə daşıyan sabitliyin əsasında duran başlıca amil hakimiyyətin həyata keçirdiyi siyasi kursun, reallaşdırılan islahatların milli maraqlara tam cavab verməsidir.
Buna paralel olaraq, hüquqi dövlət olan Azərbaycanda hər bir vətəndaş qanunla müəyyən olunmuş qaydada öz hüquq və azadlıqlarından sərbəst surətdə istifadə edə bilir, eləcə də, qeydə alınmış qanunazidd hərəkətlərin qarşısının alınması istiqamətində aidiyyəti strukturlar tərəfindən müvafiq tədbirlər görülür.
ATƏT DTİHB-nin mövqeyi paradoksal və qərəzlidir
Sadalananların fonunda ölkəmizdə keçirilən bütün seçkilər demokratik standartlara cavab verərək qanunun tələblərini özündə əks etdirir. Amma “demokratiya” məfhumunu monopoliyaya alan Qərbdəki bəzi dairələr bu məsələdən istifadə edərək müstəqil milli dövlətlərə, o cümlədən Azərbaycana qarşı təzyiq mexanizmi formalaşdırmağa çalışırlar. Bunu isə müxtəlif manipulyasiyalar vasitəsilə həyata keçirirlər. Qeyd etdiyimiz kimi, ATƏT-in Demokratik Təsisatlar və İnsan Haqları Bürosunun (DTİHB) noyabrın 1-də ölkəmizdə keçiriləcək parlament seçkilərinə müşahidə missiyası göndərməkdən imtina etməsi ilə bağlı bəyanatı bu qəbildən olan nümunələrdəndir. Əvvəla onu qeyd etmək lazımdır ki, Azərbaycan hökuməti ATƏT qarşısındakı öhdəliklərini yerinə yetirərək seçkiləri müşahidə etmək üçün ATƏT DTİHB-yə dəvət göndərdiyi halda, bu təsisat qısamüddətli və uzunmüddətli müşahidəçilərin sayına dair Azərbaycan tərəfinin hazırladığı təklifləri qəbul etməyib. Yəni ATƏT DTİHB Azərbaycan tərəfi ilə suallar doğuran məsələlərlə bağlı məsləhətləşmələrdə iştirakdan imtina edib. Bu isə, öz növbəsində, ATƏT-ə üzv olan dövlətin suveren hüquqlarına ziddir.
Digər tərəfdən, “Avropa demokratiyası”nın nümunəsi olan bu cür yanaşma, sadəcə olaraq, ikrah hissi yaradır, çünki ATƏT DTİHB belə mövqe ilə hələ keçirilməmiş seçkilərin nəticəsini şübhə altına almağa çalışır. Halbuki Azərbaycan demokratik dövlət olaraq seçki sisteminin də beynəlxalq standartlara uyğun olaraq formalaşdırılmasını daim diqqət mərkəzində saxlayıb. Bu fakt bir daha Azərbaycanda demokratik cəmiyyətin mövcudluğunu, eləcə də siyasi sistemin demokratiklik səviyyəsinin yüksək şəkildə təminatını göstərir. Bu isə ölkədə seçkilərin tam şəffaf və ədalətli şəkildə baş tutmasını mümkün edir.
Eyni zamanda, Azərbaycanda azad və şəffaf seçkilərin keçirilməsi üçün mükəmməl seçki qanunvericiliyi formalaşdırılıb. Məlum olduğu kimi, Azərbaycanın Seçki Məcəlləsi hazırlanarkən beynəlxalq təcrübə əsas götürülüb və bu sənəd Avropa Şurasının Venesiya Komissiyasının müsbət rəyini alıb. Bununla belə, qəbul olunduğu zamandan indiyə qədər də Seçki Məcəlləsinin üzərində xeyli təkmilləşdirmə işləri aparılıb. Bununla yanaşı, Azərbaycan dövləti keçirilən bütün seçkilərin geniş beynəlxalq müşahidəçi missiyaları tərəfindən izlənilməsində maraqlıdır. Məhz buna görə də, müvafiq strukturlar tərəfindən bir sıra beynəlxalq təşkilatlara, ölkə parlamentlərinə və digər qurumlara seçkiləri izləmək üçün dəvətlər göndərilir.
Sadalananlar isə deməyə əsas verir ki, qarşıdan gələn parlament seçkiləri bir daha Azərbaycanda demokratiyanın təntənəsi olacaq. Ölkəmiz bu seçkiləri də beynəlxalq standartlara uyğun şəkildə, azad və şəffaf keçirmək əzmini ortaya qoyacaq.
Nurlan QƏLƏNDƏRLİ

Paylaş:

Baxılıb: 550 dəfə