Erməni müxalifətçi Vaqan Martirosyan Azərbaycandan siyasi sığınacaq istəyir

Bakı:

29 °C

57 %

10 m/s

Əlaqə

AZ RU EN

Ana səhifə / Siyasət / Erməni müxalifətçi Vaqan Martirosyan Azərbaycandan siyasi sığınacaq istəyir

Erməni müxalifətçi Vaqan Martirosyan Azərbaycandan siyasi sığınacaq istəyir

19.09.2015 [10:27]

Ermənistan vətəndaşı, müxalifətdə olan “Ölkədaxili milli azadlıq hərəkatı” qeyri-hökumət təşkilatının rəhbəri Vaqan Emilyeviç Martirosyan Azərbaycandan siyasi sığınacaq istəyir.
AZƏRTAC xəbər verir ki, həyat yoldaşı və iki yaşlı oğlu ilə Bakıda olan V.Martirosyan bu fikri sentyabrın 18-də mətbuat konfransında səsləndirib.
Erməni müxalifətçi bildirib ki, qeyri-hökumət təşkilatlarından olan dostları və həmkarlarının köməyi ilə könüllü şəkildə Azərbaycan Respublikasının ərazisinə keçib. O deyib: “Ölkədaxili azadlıq hərəkatı” vətəndaş təşəbbüsünün rəhbəri kimi mən Serj Sarkisyanın cinayətkar rejiminə və bütövlükdə Ermənistanın hakimiyyət orqanlarının ümumi korrupsiya fəaliyyətinə qarşı barışmaz mübarizə aparmışam. Məhz bu fəaliyyətimə görə mən və hərəkat üzrə silahdaşlarım üç il ərzində Ermənistanın dövlət orqanları tərəfindən dəfələrlə təqiblərə və təzyiqlərə məruz qalmışıq. Bu il avqustun 14-də öz evimdə S.Sarkisyanın yaxın dostu, hakim Respublika Partiyasından deputat Mqer Sedrakyanın cangüdənləri və qohumları tərəfindən mənə və ailəmə hücum bu təqibin məntiqi sonluğu olub. Hücum nəticəsində mən iki yaşlı oğlumun və qoca anamın gözü qarşısında vəhşicəsinə döyülmüşəm. Həmçinin həyat yoldaşım döyüldüyünə görə uşaq salıb. Həbs, repressiya və ədalətsiz məhkəmədən qorxduğum, ailəmin təhlükəsizliyinə görə narahatlıq keçirdiyim üçün Ermənistanı dərhal tərk etmək qərarına gəldim”.
V.Martirosyan “Nə üçün məhz Azərbaycanı seçdiniz” sualına cavabında deyib ki, Serj Sarkisyanın qeyri-legitim rejiminin cinayətləri, onun ətrafının törətdiyi qanunsuzluqlar, bu rejimin Dağlıq Qarabağ münaqişəsindən necə istifadə etməsi və Ermənistan iqtisadiyyatının, ordusunun və erməni xalqının rifahının çökməsi bahasına özünün varlanması məqsədi ilə Azərbaycanın simasında qondarma düşmən obrazı yaratması barədə həqiqəti dünyaya Azərbaycan KİV-ləri qədər heç kəs yaxşı çatdırmayacaq. V.Martirosyanın sözlərinə görə, Ermənistan əhalisinin yaşlı nəsli Azərbaycan xalqı ilə xeyirxah və dost münasibətlərin həsrətini çəkir, gənclər isə düşünür ki, Azərbaycanın cəmi 100 yaşı var, burada vəhhabilər yaşayır və ancaq neft çıxarmaqla məşğuldurlar.
Yaxın Şərqdən qaçqınlar barəsində suala cavab verən V.Martirosyan bildirib ki, münaqişə nəticəsində Ermənistana Suriyadan və Livandan 15-20 min erməni gəlib. O deyib: “Bu insanların bir hissəsi geriyə qayıdıb, bir hissəsi Avropaya istiqamət götürüb, qalan hissəsi məndə olan dəqiq məlumatlara görə Dağlıq Qarabağa göndərilib. Onların hamısı terror qrupları, kriminal elementlər ilə bağlı adamlardır”.
Martirosyan onu da bildirib ki, diaspor məsələləri naziri Anuş Akopyan qaçqınlar sayəsində əməlli-başlı varlanıb.
Erməni hüquq müdafiəçisi qeyd edib ki, bu gün Dağlıq Qarabağda yaşlı nəslin nümayəndələri arasında referendum keçirilsə, onlar Azərbaycanın tərkibinə daxil olmağa səs verərlər. O deyib: “Qarabağ torpaqları boşdur. Şuşaya milyonlarla vəsait yatırılmasına baxmayaraq, bura ölü şəhərdir. Stepanakertdə (Xankəndi) də eyni vəziyyətdir. Burada axşamlar, heç olmazsa, bircə pəncərəsindən işıq gələn bina tapmaq çətindir”.
Ermənistandakı korrupsiyadan danışan V.Martirosyan vurğulayıb ki, korrupsiyanı prezident Serj Sarkisyanın qardaşları Saşa və Levon idarə edirlər. O deyib: “Saşa bütün iş adamları ilə pay ortağı olur, qazancın 50 faizini verməyə məcbur edir, Levon isə xeyriyyəçilik adı ilə pulları guya xəstə uşaqlar üçün xeyriyyə fonduna toplayır, əslində isə mənimsəyir”.
Qarabağ müharibəsinin yenidən başlanması ehtimalı barədə suala cavab verən hüquq müdafiəçisi deyib ki, erməni ordusu hərbi əməliyyatlara müqavimət göstərmək iqtidarında deyil: “Gənclərin 90 faizi məsuliyyət hissindən məhrumdur”, - deyən V.Martirosyan qeyd edib ki, Müdafiə Nazirliyində korrupsiya baş alıb gedir. Nazir Seyran Ohanyan heç nə həll etmir, hər şeyi baş qərargah rəisi Yuri Xaçaturov idarə edir və daxil olan bütün pulları mənimsəyir.
V.Martirosyan “Azərbaycanda sizə necə münasibət bəsləyirlər” sualına belə cavab verib: “Azərbaycanda bizi çox mehriban qarşıladılar, heç bir təzyiq olmadı, mən Bakıda mühafizəsiz gəzirəm, suvenirlər alıram. Azərbaycan inkişaf etmiş ölkədir. Sərhədlər açılsa, qaçqınlar bura Avropaya olduğu kimi axışacaq”.
Sonda V.Martirosyan Ermənistanda yaşayan anasının, habelə qayınanasının və qaynının taleyini nəzarətdə saxlamaq xahişi ilə BMT-nin Bakı ofisinə və Beynəlxalq Qırmızı Xaç Komitəsinin Bakı nümayəndəliyinə müraciətlə çıxış edib.

Paylaş:

Baxılıb: 667 dəfə