Müsavat Partiyasında yeni istefalar

Bakı:

21 °C

83 %

5 m/s

Əlaqə

AZ RU EN

Ana səhifə / Siyasət / Müsavat Partiyasında yeni istefalar

Müsavat Partiyasında yeni istefalar

04.08.2016 [10:00]

Saxta yollarla partiya sədrliyini ələ keçirən Arif Hacılı söz azadlığını pozmaqda ittiham edilir
Artıq uzun müddətdir ki, siyasi palitrada görünməz olan, siyasi proseslərə hətta münasibət bildirmək iqtidarında olmayan radikal müxalifət partiyalarında vəziyyət acınacaqlı hal alıb. Bir zamanlar düşərgədə monopolistlik uğrunda mübarizə aparan təşkilatları bürüyən istefa dalğası son iki ildə onları da “cırtdan” partiyaya çevirib. Belə ki, AXCP-də yaşanan kütləvi istefalardan sonra Razi Nurullayevin rəhbərliyi altında partiyanın Etimad Qurultayı keçirildi və bir sıra rayon təşkilatları yeni qurumda birləşmək haqqında qərar verdilər. Məhz bu parçalanma Əli Kərimlinin nəzarətində olan AXCP-nin sosial şəbəkə dəstəsinə çevrilməsinə gətirib çıxardı.
Analoji hal Müsavat Partiyasında da müşahidə edildi. Belə ki, 2014-cü ildə keçirilən qurultayda baş verən saxtakarlıqlar partiya üzvləri tərəfindən etirazla qarşılandı. Arif Hacılının saxta yollarla sədr elan edilməsi, İsa Qəmbərin isə bu saxtakarlıqlarda rol oynaması partiyadaxili parçalanmanı sürətləndirdi. Qubad İbadoğlunun başçılıq etdiyi fraksiya partiyadan ayrılaraq “Demokratiya və Rifah Hərəkatı” yaratdıqlarını elan etdi. Sonra isə qurultayın nəticələrinin saxta olduğunu bəyan edən tərəf Arif Hacılını və onun komandasını məhkəməyə verdi, nəticələrin ləğvini tələb etdi.
Bu ilin may ayında isə Müsavat Partiyasında yenidən istefalar başladı. Partiya daxilində “AĞ blok” adlı fraksiya yaradaraq Arif Hacılının apardığı siyasi kursa etiraz edən Tural Abbaslı və tərəfdarları “Müsavat”dan ayrıldıqlarını elan etdilər. Tural Abbaslının istefasından sonra isə Əhəd Məmmədli və Rüfət Hacıbəyli də partiyadan çıxdılar. Bundan sonra isə istefalar kütləviləşdi. Onlarla gənc Arif Hacılıya etiraz əlaməti olaraq “Müsavat”dan getdiklərini bəyan etdilər.
Bu günlərdə isə Müsavat Partiyasında növbəti istefa dalğası yaşanıb. “Yeni Müsavat” qəzetinin əməkdaşları, eləcə də Müsavat Partiyasının üzvləri Azər Ayxan, Ələsgər Süleymanov, Elşad Paşasoy və Etibar Seyidağa partiya sıralarından çıxdıqlarını bəyan ediblər. Bununla bağlı açıqlama yayan A.Ayxan Müsavat Partiyasının rəhbəri Arif Hacılının heç bir fakta əsaslanmayan ifadələrinə, iftira və böhtanlarına görə 1992-ci ilin sentyabr ayından bu günə kimi üzvü olduğu Müsavat Partiyasındakı fəaliyyətini dayandırdığını qeyd edib.
O deyib ki, özünü demokrat siyasətçi kimi cəmiyyətə sırımağa çalışan Arif Hacılı bu mövqeyi ilə söz-mətbuat azadlığına qarşı olduğunu sübut edib. Həmçinin fərqli mövqeyə, baxışa, ifadə azadlığına düşmən mövqedə dayandığını isbatlayıb.
Qeyd edək ki, bu istefalar bir daha radikal düşərgə partiyalarının fiaskoya uğradığını, partiya rəhbərlərinin isə yalanlarının ifşa edildiyini təsdiqləyir. Radikal düşərgə partiyalarını özlərinin şəxsi kooperativinə çevirən partiya sədrlərinin xarici anti-azərbaycançı dairələrin maliyyəsi qarşılığında hərəkət etdiyi, “radikal müxalifət” görüntüsü altında hətta milli maraqlara qarşı cəbhə aldığı təşkilat üzvləri tərəfindən də etiraf olunur. Hər zaman “demokratiya” sözünü dilinin əzbərinə çevirmiş bu şəxslərin hər biri seçki saxtakarlığında, antidemokratik idarəçilikdə, söz azadlığına qarşı olmaqda ittiham edilir. Göründüyü kimi, ötən 2 il Müsavat Partiyasının əsl simasını və düşdüyü durumu tam çılpaqlığı ilə gözlər önünə sərdi. Hər zaman müsavatçılıq ideologiyasını özünə qalxan seçərək bu ideologiyanı istismar edən və onu manipulyasiya vasitəsinə çevirən partiya rəhbərləri öz addımları ilə “Müsavat” adlanan siyasi təşkilatda monolit birliyin, qarşılıqlı etimadın olmadığını, qrup maraqlarına xidmət göstərdiklərini bir daha nümayiş etdirdilər. Bir sözlə, partiyada illərdir ki, davam edən intriqalar, qruplararası çəkişmələr artıq əsl mənzərəni üzə çıxarır...
P.SADAYOĞLU

Paylaş:

Baxılıb: 625 dəfə