Rövşən Rzayev: Ermənistanın gənc nəsli başa düşür ki, bu hakimiyyətlə gələcəyini qura bilməyəcək

Bakı:

22 °C

83 %

10 m/s

Əlaqə

AZ RU EN

Ana səhifə / Siyasət / Rövşən Rzayev: Ermənistanın gənc nəsli başa düşür ki, bu hakimiyyətlə gələcəyini qura bilməyəcək

Rövşən Rzayev: Ermənistanın gənc nəsli başa düşür ki, bu hakimiyyətlə gələcəyini qura bilməyəcək

21.04.2018 [10:00]

Ermənistanın bugünkü hakimiyyəti Azərbaycan ərazisinin işğal olunması ilə əslində Ermənistanın siyasi hakimiyyətini işğal edib. Bu günə qədər də onlar bu siyasətdən öz maraqları üçün istifadə edirlər. Baxmayaraq ki, Minsk qrupu çərçivəsində danışıqlar davam etdirilir, Azərbaycanın mövqeyi sülhpərvər mövqedir, biz istəyirik ki, münaqişəni sülh yolu ilə həll edək, amma işğalçı ölkənin hakimiyyəti bunu edə bilmir. Ona görə ki, onlar səhra komandiri düşüncəsindədirlər.
Bu fikirləri AZƏRTAC-a açıqlamasında Milli Məclisin deputatı, “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin İdarə Heyətinin üzvü Rövşən Rzayev deyib.
Rövşən Rzayev bildirib ki, Ermənistan yürütdüyü işğalçılıq siyasətinin qurbanına çevrilib. Bu siyasətin nəticəsidir ki, Azərbaycan Ermənistanı bütün beynəlxalq layihələrdən kənarda qoyub, bu ölkə təcrid vəziyyətindədir. Bir sözlə, işğalçılıq siyasəti Ermənistana baha başa gəlib. Azərbaycan isə bu gün dünyada etibarlı tərəfdaş kimi tanınır, bir çox önəmli layihələrin təşəbbüskarı, onları həyata keçirən bir dövlətdir.
Milli Məclisin deputatı qeyd edib ki, bu gün Ermənistanda baş verən mitinqlərə nəzər yetirsək, iştirakçıların əksəriyyətinin gənclər olduğunu görərik. Onlar başa düşürlər ki, bu cür hakimiyyətlə gələcəklərini qura bilməyəcəklər. Ermənistanın iqtisadiyyatı çöküb. Ermənistan dövlətinin çoxlu xarici borcları var və bu borcun altından çıxa bilmir. Bütün bunlar Ermənistan əhalisinə yaxşı heç nə vəd etmir. Bununla yanaşı, Serj Sarkisyan rejimi ölkədə insan haqlarını kobud şəkildə pozur, vətəndaşlara qarşı güc tətbiq olunur. Ona görə də insanlar ayağa qalxıb öz haqlarını tələb edirlər.
Rövşən Rzayev, həmçinin deyib ki, beynəlxalq ictimaiyyət Ermənistanda baş verən bütün bu hadisələri görsə də, mövqe nümayiş etdirmir. Ermənistanı dəstəkləyən qruplar bu ölkədə insan haqlarının pozulmasını beynəlxalq təşkilatlarda, məsələn AŞPA-da qaldırmırlar. Bu da ikili standartların bariz göstəricisidir.
Deputat deyib: “Nə qədər ki, Ermənistan hakimiyyəti bu siyasəti yürüdəcək, Ermənistanda vəziyyət bir o qədər də pis olacaq. Azərbaycan tərəfi illərdir Ermənistan tərəfini dialoqa dəvət edir, Dağlıq Qarabağın azərbaycanlı və erməni icmalarının dialoqu üçün Ermənistan-Azərbaycan Sülh Platforması yaradılıb. İşğalçı siyasət həyata keçirən Ermənistan hakimiyyəti, konkret olaraq Serj Sarkisyan isə bu proseslərə əngəl yaradır. Beynəlxalq ictimaiyyət bütün bunlarla bağlı öz sözünü deməlidir. Ermənistan bu siyasətini davam etdirəcəyi və beynəlxalq ictimaiyyətin də biganəlik nümayiş etdirəcəyi təqdirdə bu ölkəni daha pis günlər gözləyir”.

Paylaş:

Baxılıb: 596 dəfə