Jalə Əliyeva: Bölgələrimiz bütünlükdə Azərbaycanın nəhəng inkişafının aynasıdır

Bakı:

24 °C

63 %

1 m/s

Əlaqə

AZ RU EN

Ana səhifə / Siyasət / Jalə Əliyeva: Bölgələrimiz bütünlükdə Azərbaycanın nəhəng inkişafının aynasıdır

Jalə Əliyeva: Bölgələrimiz bütünlükdə Azərbaycanın nəhəng inkişafının aynasıdır

21.04.2018 [10:12]

Müasir müstəqil Azərbaycanın memarı, bütün uğurlarımızın yolgöstərəni Ulu öndər Heydər Əliyev tərəfindən təməli qoyulan milli inkişaf strategiyası son 15 ildə Onun layiqli davamçısı, hər bir azərbaycanlıya yaxşı Prezident olmağı bacaran İlham Əliyevin rəhbərliyi ilə böyük uğurla davam və inkişaf etdirilir.
Bu sözləri AZƏRTAC-a müsahibəsində Milli Məclisin Mədəniyyət komitəsinin sədr müavini, Əmək və sosial siyasət komitəsinin üzvü, filologiya elmləri doktoru, professor Jalə Əliyeva deyib.
Bölgələrdə həyata keçirilən sosial layihələrin insanların rifah halının yaxşılaşmasına, kənd və şəhərlərin inkişafına təkan verdiyini söyləyən deputat bildirib ki, Prezident İlham Əliyev aprelin 18-də keçirilən andiçmə mərasimindəki nitqində sosial siyasətin qarşıdakı illərdə də daim diqqət mərkəzində olacağını bir daha vurğuladı.
“Azərbaycan ötən 15 ildə bütün sahələr üzrə sürətli templə yüksəliş dövrünü yaşayıb”, - deyən Jalə Əliyeva qeyd edib ki, ölkəmiz iqtisadiyyatın dirçəldilməsi, sənayenin inkişafı, ordu quruculuğu, infrastruktur layihələrinin həyata keçirilməsi, sosial, mədəniyyət, səhiyyə, təhsil və s. sahələrdə əldə etdiyi uğurlarla 150 illik bir məsafə qət etdi desək, yanılmarıq: “Respublikamız, eyni zamanda, beynəlxalq arenada böyük nüfuz və söz sahibi olan bir ölkəyə çevrildi. Azərbaycanın bu illər ərzində ən böyük uğuru isə deyərdim ki, milli vəhdətə nail olmağıdır. Əlbəttə ki, bütün bu sadaladıqlarımda dövlətimizin başçısının imzası, Onun dönməz iradəsi, həyata keçirdiyi qətiyyətli və eyni zamanda, humanist siyasəti dayanır”.
Azərbaycanın möhtəşəm inkişafının bir əhəmiyyətli amilinin də bölgələrimizin böyük sürətlə dirçəlməsi olduğunu qeyd edən Milli Məclisin deputatı deyib: “Vaxt var idi ki, biz bölgələrdə seçicilərlə görüşlərimizdən qeydlərlə ayrılırdıq. Bu qeydlər nədən ibarət olurdu? Qaz! Su! İşıq! Yol! Məktəb! Xəstəxana! Bu kəlmələri məxsusi olaraq böyük hərflərlə və nida qoyaraq yazdım. Çünki görüşlərdən məhz bu istəkləri elə bu şəkildə yazaraq özümüzlə aparırdıq. Bəli, bütün kəndlərimiz bu problemlərlə üzləşirdi. İnsanlar bu problemlərin aradan qaldırılmasını arzulayırdılar. Həmin görüşlərdə biz sadalanan bütün bu məsələlərin Prezident İlham Əliyevin bir vaxtlar irəli sürdüyü “Azərbaycanda kəndlərlə şəhər arasında fərq qalmayacaq” fikrinə əsasən, ən qısa zamanda öz həllini tapacağını, həyata keçiriləcək proqramlar sayəsində bölgələrimizin böyük sürətlə inkişaf edəcəyini, öz simasını tamamilə dəyişəcəyini bildirirdik. Zaman göstərdi ki, biz yanılmamışıq. Bu gün artıq vətəndaşımız illər əvvəlki çoxsaylı arzularına, istəklərinə qovuşub və artıq görüşlərdə tələb deyil, minnətdarlıq hissləri dilə gətirilir”.
Milli Məclisin deputatı vurğulayıb ki, Prezident İlham Əliyevin bölgələrin inkişafı ilə bağlı dediyi sözlər regionlarda görülən irihəcmli işlərin miqyasını aydın əks etdirir. Dövlətimizin başçısı deyib: “2004-cü ildə mənim təşəbbüsümlə regionların sosial-iqtisadi inkişafı Dövlət Proqramı qəbul edilmişdir və bu proqramın ölkə tarixində çox böyük rolu vardır. İndi təsəvvür edin, əgər o proqram qəbul edilməsəydi, bizim bölgələrimiz hansı problemlərlə üzləşə bilərdi. Məhz bu birinci proqramın, ondan sonra ikinci, üçüncü proqramların qəbulu nəticəsində bölgələr dirçəldi, inkişaf etdi, böyük investisiya təmin edildi. 2004-cü ildən bu günə qədər Azərbaycan bölgələrinin inkişafı hesab edirəm ki, tarixi nailiyyətdir. Heç vaxt Azərbaycan tarixində belə qısa müddət ərzində bu qədər işlər görülməmişdir. Bu gün Azərbaycan bölgələrində lazım olan bütün infrastruktur layihələri icra edilib və biz sürətli inkişaf dövrünü yaşayırıq”. Prezidentin bu sözləri günümüzün reallığı, Azərbaycanımızın bütün bölgələrinin inkişafının aynasıdır.
“Hər hansı bir ölkənin Prezidentini göstərin ki, bölgələrə, ən ucqar rayon və kəndlərə bu qədər səfər etmiş olsun, insanların, vətəndaşının vəziyyəti ilə yerindəcə maraqlanmış və operativ tədbirlər görmüş olsun. Belə bir nümunə yoxdur. Bu nümunəni - xalq-dövlət birliyi nümunəsini Azərbaycan Prezidenti İlham Əliyev xalq və dövlət qarşısındakı misilsiz xidmətləri ilə yaradıb. Bu gün Azərbaycan bütün dünyaya sabit, əmin-amanlıq şəraitində inkişaf edən bir ölkə nümunəsini nümayiş etdirir. Xüsusilə son prezident seçkisi xalqın öz liderinə olan böyük sevgisinin, inamının və minnətdarlığının ifadəsinə çevrildi. Xalq daha güclü, daha qüdrətli Azərbaycana səs verdi! Ötən illərə ekskurs edərkən qarşımıza çıxan reallıqlar, faktlar, statistika və potensialımız onu deməyə əsas verir ki, bu gün bölgənin super dövləti olan Azərbaycanın adı qarşıdakı illərdə iqtisadi və siyasi sabitlik, milli inkişaf və demokratik dəyərlərə hörmət baxımından dünyanın ən qabaqcıl ölkələri ilə eyni sırada olacaq. Buna inamımız şəksizdir!”, - deyə Jalə Əliyeva bildirib.

Paylaş:

Baxılıb: 516 dəfə