Türkdilli Dövlətlərin Siyasətinə Dəstək Fondu Qırğızıstan prezidentini təltif edib

Bakı:

23 °C

76 %

15 m/s

Əlaqə

AZ RU EN

Ana səhifə / Siyasət / Türkdilli Dövlətlərin Siyasətinə Dəstək Fondu Qırğızıstan prezidentini təltif edib

Türkdilli Dövlətlərin Siyasətinə Dəstək Fondu Qırğızıstan prezidentini təltif edib

04.12.2009 [23:07]

Prezident Kurmanbek Bakiyev türkdilli dövlətlər arasında əməkdaşlığın möhkəmləndirilməsi istiqamətində misilsiz xidmətlərinə görə bu mükafata layiq görülüb
Qırğızıstan Respublikasının prezidenti Kurmanbek Bakiyev “Türkdilli Dövlətlərin Siyasətinə Dəstək Fondu”nun “Qızıl medal”ına layiq görülüb. İki gün öncə isə Bişkekdə mükafatın təqdimetmə mərasimi keçirilib. Mərasimdə çıxış edən fondun sədri Nüsrət Məmmədov türkdilli dövlətlər arasında əməkdaşlığın möhkəmləndirilməsi istiqamətində dövlət başçısının əvəzsiz xidmətləri olduğunu qeyd edib. “Siz, həqiqətən də türkdilli dövlətlərin əməkdaşlıqlarının genişləndirilməsi istiqamətində, qardaş xalqlar arasında qarşılıqlı anlaşma və dostluq münasibətinin möhkəmləndirilməsində böyük işlər görmüsünüz. Və bu mükafat sizin bu sahədəki xüsusi xidmətlərinizin təzahürüdür”, - deyə N.Məmmədov söyləyib.
Prezident Kurmanbek Bakiyev isə öz növbəsində fəaliyyətinə verilən böyük qiymətə görə minnətdarlığını ifadə edib: “çox mürəkkəb hadisələrin yaşandığı indiki dövrdə ölkələrimiz arasında əməkdaşlığı hər sahədə möhkəmləndirmək və genişləndirmək olduqca vacibdir. Və bu iş təkcə dövlət institutları səviyyəsində aparılmamalıdır. Axı xalq diplomatiyası, mədəni-humanitar əlaqələr, xalqlar arasında qarşılıqlı anlaşma və dostluq münasibətlərinin möhkəmləndirilməsində böyük əhəmiyyət kəsb edir”.
Rəsmi çıxışlardan sonra fondun prezidenti Nüsrət Məmmədov “Qızıl medal”ı Qırğızıstan Respublikasının prezidenti Kurmanbek Bakiyevə təqdim edib.
Qeyd edək ki, fond tərəfindən təsis edilən “Qızıl medal” XX yüzilliyin görkəmli dövlət xadimi, Azərbaycan xalqının ümummilli lideri Heydər Əliyevin barelyefindən ibarətdir və təmiz qızıldan hazırlanıb. Bu mükafata, əsasən, türkdilli dövlətlərin dostluğuna töhfələr verən görkəmli siyasi və ictimai xadimlər layiq görülür.
Əlavə edək ki, Türkdilli Dövlətlərin Siyasətinə Dəstək Fondu 2005-ci ildən Bişkekdə rəsmi şəkildə fəaliyyətə başlayıb. Eyni zamanda, fondun Azərbaycanda da filialı var. Fondun fəaliyyətinin əsas istiqaməti türkdilli dövlətlərin liderlərinin müxtəlif ölkələrdə geniş təbliğatını təşkil etmək, xalqlarımız arasında birlik və əlaqələrin formalaşmasında dahi siyasətçilərin rolunu daha geniş auditoriyaya çatdırmaqdır. Fondun bu günə qədər gerçəkləşdirdiyi tədbirlər həm rəsmi, həm də ictimai dairələrdə böyük maraqla qarşılanıb.
TURANƏ

Paylaş:

Baxılıb: 1282 dəfə