İslam Konfransı Təşkilatının yaranmasından 40 il keçir

Bakı:

23 °C

81 %

16 m/s

Əlaqə

AZ RU EN

Ana səhifə / Siyasət / İslam Konfransı Təşkilatının yaranmasından 40 il keçir

İslam Konfransı Təşkilatının yaranmasından 40 il keçir

10.12.2009 [10:19]

Dünən İslam Konfransı Təşkilatının (İKT) təsis günü idi. özündə 60-a yaxın dövləti birləşdirən təşkilat 1969-cu ildə Mərakeşin paytaxtı Rabatda müsəlman ölkələrinin dövlət və hökumət başçılarının konfransında yaradılıb. ümummilli lider Heydər Əliyevin 1994-cü ilin iyulunda Səudiyyə Ərəbistanına səfəri, səfər əsnasında müqəddəs Kəbədə ümrə ziyarəti, həmçinin, keçirilən müxtəlif görüşlər İslam Konfransı Təşkilatı ilə əməkdaşlığın gələcək inkişafına zəmin yaradıb. 1994-cü ilin noyabrında Prezident Heydər Əliyevin təşkilatın baş katibi ilə Bakıdakı görüşü, həmin ilin dekabrında İKT dövlət və hökumət başçılarının Kasablankada keçirilən 7-ci zirvə toplantısında iştirakı Azərbaycanın təşkilat daxilində mövqeyini xeyli möhkəmlədib. Nəticədə İKT zirvə görüşləri tarixində ilk dəfə Kasablankada keçirilən zirvə toplantısında “Ermənistan-Azərbaycan münaqişəsi haqqında” siyasi qətnamə qəbul edilib. Son illər Azərbaycan-İKT münasibətləri keyfiyyətcə yeni mərhələyə qədəm qoyub, çoxşaxəli, qarşılıqlı maraq əsasında əməkdaşlıq əlaqələri genişlənib. Prezident İlham Əliyevin İKT-nin Məkkədə keçirilən üçüncü fövqəladə zirvə toplantısında iştirakı, Onun təşəbbüsü ilə İKT xarici işlər nazirlərinin 33-cü sessiyasının, İslam ölkələrinin ali təhsil və elm nazirlərinin 4-cü konfransının Bakıda keçirilməsi əlaqələrin yüksək səviyyədə olmasını təsdiq edir. ölkəmizlə İKT-nin müxtəlif təşkilatları arasında münasibətlərin möhkəmlənməsində Azərbaycanın birinci xanımı, Heydər Əliyev Fondunun Prezidenti, YUNESKO-nun və İSESKO-nun xoşməramlı səfiri Mehriban xanım Əliyevanın fəaliyyəti xüsusilə təqdirəlayiqdir.
İSESKO-nun xoşməramlı səfiri Mehriban xanım Əliyevanın təşəbbüsü ilə Bakıda keçirilən “Mədəniyyətlərarası dialoqda qadınların rolunun genişləndirilməsi” mövzusunda beynəlxalq forumda qurumun baş katibi Ekmaləddin İhsanoğlu humanitar sahədəki fəaliyyətinə görə “İKT-nin humanitar məsələlər üzrə xüsusi elçisi” statusuna dair diplomu Azərbaycanın birinci xanımına təqdim edib.
Mehriban xanım Əliyeva islam ölkələrinin daxil olduğu təşkilatın bu yüksək adlarına layiq görülən ilk qadındır. Bakının 2009-cu ildə İslam mədəniyyətinin paytaxtı elan edilməsi ilə bağlı qərar da İKT ilə əməkdaşlığın bəhrəsi və Azərbaycanın birinci xanımının yorulmaz fəaliyyətinin nəticəsidir.
ölkəmizlə bu qurum arasında sıx əlaqələri daha bir fakt təsdiq edir. 2008-ci il martın 14-də BMT Baş Məclisinin 62-ci sessiyasında Azərbaycan nümayəndə heyətinin təqdim etdiyi “Azərbaycanın işğal edilmiş ərazilərində vəziyyət” adlı qətnamənin qəbul edilməsində İKT-yə üzv olan dövlətlərin mövqeyi həlledici rol oynayıb.
Bu gün İslam Konfransı Gənclər Forumunun fəaliyyəti, onun proqram və layihələri də diqqəti çəkir. İslam Konfransı Gənclər Forumunun Mədəniyyətlərarası Dialoq üzrə Baş Əlaqələndiricisi, Heydər Əliyev Fondunun Rusiyadakı nümayəndəliyinin rəhbəri Leyla Əliyevanın təşəbbüsü ilə 2008-ci il mayın 8-də elan edilən “Xocalıya ədalət” kampaniyası çərçivəsində keçirilən tədbirlərdə məqsəd Xocalıda ermənilər tərəfindən insanlığa qarşı törədilən ağlasığmaz cinayəti dünya ictimaiyyətinə çatdırmaq, bu cinayətə hüquqi-siyasi qiymətin verilməsinə nail olmaq, dünyada sülh, əmin-amanlıq uğrunda mübarizə aparmaqdır. Məhz gənclərin fəaliyyətinin inkişafındakı müstəsna xidmətlərinə, verdiyi dəyərli töhfələrə görə Leyla Əliyevaya təşkilatın yüksək mükafatı təqdim edilib.
Bu gün Azərbaycanı İslam Konfransı Təşkilatı ölkələri ilə təkcə milli mənəvi dəyərlər deyil, beynəlxalq siyasi arenada birgə fəaliyyət də ciddi şəkildə bağlayır. Bu məsələdə Azərbaycanın siyasi aləmdə qazandığı imic və tutduğu mövqe xüsusi rol oynayır.

Paylaş:

Baxılıb: 1242 dəfə