Azərbaycan inkişaf etmiş ölkədir...

Bakı:

13 °C

94 %

6 m/s

Əlaqə

AZ RU EN

Ana səhifə / Siyasət / Azərbaycan inkişaf etmiş ölkədir...

Azərbaycan inkişaf etmiş ölkədir...

22.01.2010 [13:51]

Aydın Hüseynov: Artıq Azərbaycanın sosial-iqtisadi siyasət təcrübəsi digər ölkələrdə etibarlı istinad mənbəyi kimi qəbul edilir
“2009-cu ilin sosial-iqtisadi göstəriciləri bir daha sübut edir ki, Azərbaycan inkişaf etmiş ölkədir”. Bunu qəzetimizə açıqlamasında YAP Siyasi Şurasının üzvü, partiyanın Qaradağ rayon təşkilatının sədri Aydın Hüseynov deyib. Aydın Hüseynovun sözlərinə görə, Prezident İlham Əliyevin rəhbərliyi ilə həyata keçirilən sosial-iqtisadi islahatlar nəticəsində 2009-cu ildə də ölkəmizdə hərtərəfli inkişaf qeydə alınıb: “ötən il Azərbaycanda ümumi daxili məhsul 9,3 faiz, sənaye istehsalı 8,6 faiz, kənd təsərrüfatı 3,5 faiz artıb. 2009-cu ildə neftin qiymətinin aşağı düşməsinə baxmayaraq, cənab Prezident İlham Əliyevin rəhbərliyi ilə həyata keçirilmiş tədbirlər nəticəsində ölkədə makroiqtisadi sabitlik qorunub saxlanılıb, inflyasiyanın səviyyəsi 1,5 faiz olub. Bununla yanaşı, 2009-cu ildə Azərbaycana investisiya qoyuluşu 9,2 milyard dollar olub ki, bunun da 7,3 milyardı daxili sərmayələrdir. Digər tərəfdən, keçən il 74 min yeni iş yeri açılıb. Bütövlükdə, bu gün Azərbaycanın valyuta ehtiyatları 20,4 milyard dollar təşkil edir. Bütün bu göstəricilər, real nailiyyətlər Azərbaycanın düzgün istiqamətdə siyasət həyata keçirdiyinə əyani sübutdur. Artıq Azərbaycanın sosial-iqtisadi siyasət təcrübəsi digər ölkələrdə etibarlı istinad mənbəyi kimi qəbul edilir”.
ölkədə yoxsulluğun səviyyəsinin yenidən aşağı düşməsinə diqqət çəkən Aydın Hüseynov bunu yüksək qiymətləndirib: “ümumiyyətlə, müxtəlif ekspertlərin fikrincə, dünya təcrübəsində yoxsulluğun həddi 16 faiz götürülür. Yəni, yoxsulluğun səviyyəsi bu həddən aşağıdırsa, demək o ölkədə sosial-iqtisadi vəziyyət yaxşıdır. Əgər yuxarıdırsa, demək ki, vəziyyət normadan aşağıdır. Azərbaycanda yoxsulluğun səviyyəsinin 11 faizə enməsi çox yaxşı göstəricidir. Beynəlxalq təcrübəyə nəzər salsaq görərik ki, bu göstəriciyə görə, Azərbaycan inkişaf etmiş ölkələr sırasındadır. Qeyd edim ki, Avropa İttifaqı ölkələrinin əhalisinin təxminən 17 faizi yoxsulluq şəraitində yaşayır, 10 faizinin isə bu qış evini qızdırmaq üçün kifayət qədər maliyyə imkanı yoxdur. Avropa İttifaqının 27 ölkəsində yoxsulluğun səviyyəsi 2005-ci ildən dəyişməz qalır. İttifaqın 500 milyon əhalisinin 17-18 faizi yoxsuldur. Yoxsulların sayı Latviyada 26 faiz, Rumıniyada 23 faiz, Bolqarıstanda 21 faizdir. Hollandiya və Slovakiyanın hər birində yoxsullar əhalinin 11 faizini təşkil edir.
Amma bizdə vəziyyət tamamilə fərqlidir. Belə ki, əgər 6 il bundan əvvəl Azərbaycan vətəndaşlarının təxminən 50 faizə yaxını yoxsulluq səviyyəsində yaşayırdısa, bu gün həmin göstərici 11 faizdir. Bu onu göstərir ki, hətta böhranlı ildə Azərbaycanda yoxsulluğa qarşı çox ciddi mübarizə aparılıb”.
Aydın Hüseynov, həmçinin, Xalq-iqtidar birliyinin ölkəmiz, xalqımız üçün verdiyi uğurlu nəticələrdən də danışıb: “Dövlətin idarə olunması haqqında nəzəriyyələrdə qeyd edilir ki, insanların rihaf halına xidmət edən dövləti formalaşdırmaq üçün vətəndaşların dövlətçilik, vətənpərvər ruhda tərbiyə olunması, ədalətli qanunların qəbul edilməsi, xeyriyyə məqsədli fəaliyyətlərin artırılması kimi şərtlər tələb olunur. Bu gün Azərbaycanda insanların düzgün istiqamətdə tərbiyə olunması, onların rihaf halının yüksəldilməsi, eyni zamanda, digər şərtlər çərçivəsində hüquqi, əməli-praktik addımlar atılır. Məhz bunun nəticəsidir ki, ölkədə milli birlik formalaşıb. Xalq-iqtidar birliyinin möhkəm tellərlə bağlı olması uğurlu nəticələrin, nailiyyətlərin əldə edilməsinə gətirib çıxarıb. Əminəm ki, Azərbaycanın qeyd olunan şərtlər daxilində uğurlu inkişafı gələcəkdə də davam edəcək”.
Ramil VƏLİBƏYOV

Paylaş:

Baxılıb: 1157 dəfə