Səfir: Latviya Azərbaycanla münasibətlərin inkişafına böyük əhəmiyyət verir

Bakı:

26 °C

58 %

13 m/s

Əlaqə

AZ RU EN

Ana səhifə / Siyasət / Səfir: Latviya Azərbaycanla münasibətlərin inkişafına böyük əhəmiyyət verir

Səfir: Latviya Azərbaycanla münasibətlərin inkişafına böyük əhəmiyyət verir

06.11.2020 [09:39]

Noyabrın 5-də Milli Məclisin sədri Sahibə Qafarova Latviyanın ölkəmizdəki səfiri Daynis Qarançs ilə görüşüb.
Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildirilib ki, parlamentin sədri Azərbaycan dövlətinin dost və tərəfdaş Latviya ilə həyatın müxtəlif sahələrində əlaqələrin inkişafına böyük önəm verdiyini deyib. Qeyd edilib ki, ölkələrimiz dövlət müstəqilliklərini bərpa etdikdən sonra ikitərəfli münasibətlərimizin tarixində yeni dövr başlayıb, siyasi, iqtisadi və humanitar sahələrdə əməkdaşlığımız uğurlu inkişafı yoluna qədəm qoyub.
Əlaqələrimizin inkişafında dövlət başçılarının rolundan danışan spiker ölkə liderlərinin qarşılıqlı səfərlərinin əhəmiyyətini xüsusi qeyd edib. Bildirilib ki, münasibətlərimiz qarşılıqlı hörmət və bərabərhüquqlu əməkdaşlıq prinsiplərinə söykənir. İkitərəfli və beynəlxalq təşkilatlar çərçivəsində əlaqələr ölkələrimizin maraqlarına cavab verir. Azərbaycan ilə Latviya arasında Avropa strukturları, Şərq Tərəfdaşlığı və digər beynəlxalq platformalarda da sıx əməkdaşlıq mövcuddur.
Görüşdə dövlətlərarası münasibətlər sistemində parlamentlərin rolundan danışan Sahibə Qafarova hər iki ölkənin qanunvericilik orqanlarında dostluq qruplarının fəaliyyət göstərməsinin əhəmiyyətini vurğulayıb, deputatların qarşılıqlı səfərlərinin pandemiyadan sonra da davam etdirilməsinin təcrübə və informasiya mübadiləsi baxımından vacibliyini bildirib.
Söhbət zamanı Ermənistan-Azərbaycan Dağlıq Qarabağ münaqişəsinə toxunan Milli Məclisin sədri cəbhə bölgəsindəki vəziyyətdən danışıb, erməni tərəfinin təxribatları barədə geniş məlumat verib.
Görüşdə COVID-19 pandemiyasına qarşı mübarizədə Azərbaycanda və Latviyada həyata keçirilən tədbirlərlə bağlı da fikir mübadiləsi aparılıb, bu sahədə beynəlxalq əməkdaşlığın rolu qeyd olunub.
Səmimi qəbula görə minnətdarlığını ifadə edən səfir Dainis Qarançs ölkəsinin Azərbaycanla münasibətlərin inkişafına böyük əhəmiyyət verdiyini qeyd edib. Diplomat ölkələrimiz arasında münasibətlərin daha da inkişaf etdirilməsi üçün səylərini əsirgəməyəcəyini söyləyib, dövlətlərarası münasibətlərdə parlament diplomatiyasının rolunu yüksək qiymətləndirib.
Səfir qeyd edib ki, Cənubi Qafqazın baş verən proseslər onların da diqqət mərkəzindədir. O, regional münaqişələrin həllində beynəlxalq hüququn norma və prinsiplərinə əməl olunması barədə dövlətinin mövqeyini bir daha səsləndirib.
Həmçinin parlamentlərarası əlaqələrin mövcud vəziyyəti və inkişaf perspektivləri, ikitərəfli və beynəlxalq platformalarda əməkdaşlığın müxtəlif aspektləri, tərəfləri maraqlandıran digər məsələlər barədə fikir mübadiləsi aparılıb.

Paylaş:

Baxılıb: 546 dəfə