Muğam Azərbaycan xalqının sərvətidir

Bakı:

25 °C

50 %

0 m/s

Əlaqə

AZ RU EN

Ana səhifə / Siyasət / Muğam Azərbaycan xalqının sərvətidir

Muğam Azərbaycan xalqının sərvətidir

09.04.2010 [10:21]

Leyla Əliyeva: Bizim üçün muğam bir növ genetik koddur. O, dilimiz, incəsənətimiz və ədəbiyyatımızla yanaşı durur
Moskvada, Qlinka adına Dövlət Mərkəzi Musiqi Mədəniyyəti Muzeyində Azərbaycan səfirliyinin və Heydər Əliyev Fondunun Rusiya nümayəndəliyinin təşkilatçılığı ilə Azərbaycan muğamı gecəsi keçirilib. Azərbaycanın Rusiyadakı səfiri Polad Bülbüloğlu, Heydər Əliyev Fondunun RF nümayəndəliyinin başçısı Leyla Əliyeva, habelə çoxsaylı qonaqlar rəngarəng xalılardan, milli geyimlərdən, musiqi alətlərindən, Azərbaycan muğamının tarixini və müasir vəziyyətini əks etdirən kitab və vəsaitlərdən ibarət sərgiyə maraqla tamaşa ediblər.
Rusiya mədəniyyət nazirinin müavini Andrey Busıgin təşkilatçıları və qonaqları salamlayaraq deyib ki, Azərbaycanın musiqi mədəniyyəti incilərini Moskvada təqdim edən bu tədbir olduqca maraqlı hadisədir.
Heydər Əliyev Fondunun Moskva nümayəndəliyinin başçısı Leyla Əliyeva tədbirin təşkilatçılarına, qonaqlara, habelə Dövlət Mərkəzi Musiqi Mədəniyyəti Muzeyinin rəhbərliyinə minnətdarlığını bildirərək deyib ki, muğam Azərbaycan xalqının sərvətidir, onun kökləri çoxəsrlik bir tarixə gedib çıxır. O deyib: “Muğam həmişə Azərbaycanın incisi olmuşdur. Azərbaycan xalqı muğamı həmişə sevmiş və qiymətləndirmişdir. Bizim üçün muğam bir növ genetik koddur. O, dilimiz, incəsənətimiz və ədəbiyyatımızla yanaşı durur. Muğam özündə bir çox yeni musiqi janrlarını - muğam operasını, caz muğamı və s. təcəssüm etdirir. Azərbaycan mədəniyyətinin üzeyir Hacıbəyli, Niyazi, Vaqif Mustafazadə kimi böyük xadimlərinin adları muğamla bağlıdır. Sevindirici haldır ki, son illər getdikcə daha çox gənc muğamı öyrənməyə meyil edir, yeni-yeni istedadlı muğam ifaçıları ortaya çıxır.
Bu yaxınlarda Bakıda Beynəlxalq Muğam Mərkəzinin açıldığını, elmi simpoziumun və Beynəlxalq muğam festivalının keçirildiyini xatırladan Leyla Əliyeva deyib: “çox xoşdur ki, bu tədbir Qlinka adına Dövlət Muzeyində keçirilir, çünki musiqi xalqları və millətləri birləşdirməyə qadirdir və onun üçün heç bir sərhəd yoxdur”.
Leyla Əliyeva tədbirin ev sahiblərinə minnətdarlığını bildirərək, Azərbaycanın milli musiqi alətləri olan ud və sazı Qlinka adına muzeyə hədiyyə etmişdir.
Muğam gecəsinin təşkilatçılarına və şəxsən Leyla Əliyevaya minnətdarlığını bildirən Qlinka adına Dövlət Mərkəzi Musiqi Mədəniyyəti Muzeyinin direktoru Mixail Brızqalov bu hadisəni Rusiya paytaxtının musiqi və mədəni həyatında əlamətdar hadisə adlandıraraq vurğulayıb ki, Heydər Əliyev Fondunun hədiyyəsi olan Azərbaycanın milli musiqi alətləri muzeyin zəngin kolleksiyasında layiqli yer tutacaq.
Azərbaycanın Rusiyadakı səfiri Polad Bülbüloğlu Rusiya Mədəniyyət Nazirliyinə, Qlinka adına Dövlət Mərkəzi Musiqi Mədəniyyəti Muzeyinin və Heydər Əliyev Fondunun rəhbərliyinə minnətdarlığını bildirərək diqqətə çatdırıb ki, Leyla Əliyeva əsası Ulu öndər Heydər Əliyev tərəfindən qoyulmuş ənənələri davam etdirir. Səfir bildirib ki, məhz Heydər Əliyevin hakimiyyəti dövründə muğam YUNESKO-nun Qeyri-maddi mədəni irs siyahısına salınıb. Prezident İlham Əliyev də bu gözəl ənənəni davam etdirir. Azərbaycanın birinci xanımı, Heydər Əliyev Fondunun prezidenti Mehriban Əliyeva muğamın təbliğində böyük rol oynayır.
Sonra Azərbaycan muğamının tarixi və müasir vəziyyəti haqqında sənədli film nümayiş etdirilib, Bakıda keçirilmiş Beynəlxalq muğam müsabiqəsinin qaliblərinin və laureatlarının iştirakı ilə konset olub.

Paylaş:

Baxılıb: 1156 dəfə