"Qız Qalası" Beynəlxalq incəsənət festivalı öz işinə yekun vurub

Bakı:

26 °C

49 %

1 m/s

Əlaqə

AZ RU EN

Ana səhifə / Siyasət / "Qız Qalası" Beynəlxalq incəsənət festivalı öz işinə yekun vurub

"Qız Qalası" Beynəlxalq incəsənət festivalı öz işinə yekun vurub

01.06.2010 [11:49]

ölkəmizin birinci xanımı Mehriban Əliyevanın da əsəri sözügedən festivalda sərgilənib
Heydər Əliyev Fondu, Azərbaycan Respublikasının Nazirlər Kabineti yanında “İçərişəhər” Dövlət Tarix-Memarlıq Qoruğu İdarəsi, Müasir İncəsənət Muzeyi və “Qız Qalası” incəsənət qalereyasının təşkilatçılığı ilə İçərişəhərdə “Qız Qalası” adlı Beynəlxalq incəsənət festivalı keçirilib. üç gün davam edən festivalda 17 ölkənin 20-dən artıq tanınmış rəssamı iştirak edib. İştirakçılar Qız Qalasının kiçik maketlərini öz milli üslublarında naxışlarla bəzəyərək fərqli mədəniyyət və adət-ənənələrin sintezini və qarşılıqlı mübadiləsini əks etdirən əsərlər sərgiləyiblər.
Festivalın bağlanış mərasimində çıxış edən Heydər Əliyev Fondunun icraçı direktoru Anar Ələkbərov iştirakçıları Azərbaycanın birinci xanımı, Fondun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın adından salamlayaraq tədbirin əhəmiyyətindən danışıb. Festivalın Heydər Əliyev Fondunun növbəti layihələrindən biri olduğunu söyləyən A.Ələkbərov, Fondun mədəniyyət və tarixi abidələrin qorunması sahəsində çox böyük işlər gördüyünü diqqətə çatdırıb. Onun sözlərinə görə, bu yaxınlarda yeni “Qala” adlı festivalın keçirilməsi nəzərdə tutulub.
“İçərişəhər” Dövlət Tarix-Memarlıq Qoruğu İdarəsinin rəisi Mikayıl Cabbarov isə çıxışında festivalın məqsədindən söhbət açıb. O, bildirib ki, festival Azərbaycanın ən qədim abidələrindən biri olan Qız Qalasının daha geniş tanınması və populyarlaşdırılması məqsədini daşımaqla yanaşı, mədəniyyətlərarası dialoqa da öz layiqli töhfəsini verib. İdarə rəisi layihənin reallaşmasında göstərdiyi dəstəyə görə, Azərbaycanın birinci xanımı, Heydər Əliyev Fondunun prezidenti Mehriban Əliyevaya minnətdarlığını bildirib.
Festivalda diqqət çəkən məqamlardan biri isə Heydər Əliyev Fondunun prezidenti Mehriban xanım Əliyevanın da Qız Qalası mövzusunda yaratdığı əsərin sərgilənməsi olub. Mehriban xanımın əsərində bir sıra ölkələrin müxtəlif tarixi və mədəniyyət abidələri əks etdirilib. Maketin üzərində isə mədəni irsin qorunmasına rəmzi çağırış mənasını daşıyan çətir qurulub. YUNESKO-nun xoşməramlı səfiri Mehriban xanım Əliyeva bu əsəri ilə bütün dünyanı mədəni irsin qorunmasına bir çağırış edib.
Beləliklə, Heydər Əliyev Fondunun milli mədəni və tarixi abidələrimizin təbliği, qorunması və dünyada tanıdılması istiqamətində həyata keçirdiyi daha bir layihə uğurla başa çatıb.

Paylaş:

Baxılıb: 1211 dəfə