Beynəlxalq hüquqa sayğısızlıq sindromu...

Bakı:

25 °C

40 %

3 m/s

Əlaqə

AZ RU EN

Ana səhifə / Siyasət / Beynəlxalq hüquqa sayğısızlıq sindromu...

Beynəlxalq hüquqa sayğısızlıq sindromu...

17.09.2021 [14:45]

Yaxud Fransua Pupponi hələ də bu mərəzdən xilas ola bilmir?

Beynəlxalq hüquq normalarında təsbit edilən başlıca məqamlardan biri ölkələrin ərazi bütövlüyünə və suverenliyinə hörmət göstərilməsidir. Bu prinsipə zidd mövqe sərgiləmək və qeyri-adekvat addımlar atmaq həm siyasi təxribat, həm də illeqal (qeyri-qanuni) fəaliyyət kimi səciyyələndirilir. Milli dövlətlərin ərazilərinə qeyri-qanuni səfərlərin həyata keçirilməsi də bu kateqoriyadan olan hüquq pozuntusu kimi dəyərləndirilir.

Yeri gəlmişkən, Fransa Milli Assambleyasının üzvü Fransua Pupponi növbəti dəfə Azərbaycan ərazisinə qanunsuz səfər etməklə təxribatçı davranışa yol verib. Anti-Azərbaycan əhvalında olan və siyasi ovqatını ermənipərəst mövqeyinin müəyyənləşdirdiyi bu şəxsin Azərbaycanın Xankəndi şəhərinə illeqal səfəri haqlı olaraq respublikamızın ictimaiyyəti tərəfindən ciddi narazılıqla qarşılanıb. Xarici İşlər Nazirliyinin Mətbuat xidməti idarəsinin rəisi Leyla Abdullayeva bu məsələyə münasibət bildirərkən qeyd edib ki, Azərbaycan qanunvericiliyini pozduğu üçün deputatın adı ölkəmizə girişi qadağan olunan xarici ölkə vətəndaşlarının siyahısındadır: “Fransa Milli Assambeyasının üzvünü bu qanunsuz səfərdə müşayiət edən Fransanın Arnuvil şəhərinin meri, Sarsel şəhərinin nümayəndəsinə qarşı da Azərbaycana giriş qadağası tətbiq ediləcək. Fransa nümayəndələrinin bu məsuliyyətsiz və təxribatçı davranışı qəbuledilməzdir və bölgədə münaqişə sonrası sülh quruculuğu səylərinə xələl gətirir”.

Azərbaycan həmişə bu cür qanunazidd hərəkətlərin cavabını verir, müvafiq tədbirlər görür. Elə qeyri-qanuni səfərlər edən şəxslər ölkə qanunvericiliyinə uyğun olaraq məsuliyyətə cəlb olunur, onların ölkəmizə gəlişinə qadağa qoyulur. Lakin bütün hallarda bu cür illeqal davranışlar zərərli və qəbuledilməzdir.

Əlbəttə, postkonflikt dövründə regionda etimad, dayanıqlı sülh, etibarlı təhlükəsizlik mühitinin formalaşdırılmasına ehtiyac və zərurətin olduğu bir şəraitdə belə addımlar sadəcə pozucu və təxribatçı xarakter daşıyır. Bu, eyni zamanda, siyasi məsuliyyətsizlik nümunəsidir. Görünən odur ki, Milli Assambleyanın üzvü olsa da, hələ də qanundan və qaydadan “bixəbər” olan Fransua Pupponi beynəlxalq hüquq normalarına sayğısızlıq sindromundan qurtula bilmir. Bu, paradoks olmaqla yanaşı, mənfi presedent yaradan neqativ haldır. Xüsusilə nəzərə almaq lazımdır ki, qanunsuz səfərlər təkcə Azərbaycana münasibətdə beynəlxalq hüquq normaları və prinsiplərinin pozulması deyil, bütövlükdə milli dövlətlərin, ərazi bütövlüyü və suverenliyinin heçə sayılmasıdır!

Nurlan QƏLƏNDƏRLİ

Paylaş:

Baxılıb: 443 dəfə