“Ermənistan-Azərbaycan münaqişəsinin humanitar nəticələri” qəbul edildi

Bakı:

27 °C

63 %

10 m/s

Əlaqə

AZ RU EN

Ana səhifə / Siyasət / “Ermənistan-Azərbaycan münaqişəsinin humanitar nəticələri” qəbul edildi

“Ermənistan-Azərbaycan münaqişəsinin humanitar nəticələri” qəbul edildi

29.09.2021 [15:24]

AŞPA-nın payız sessiyasında Ermənistanın həm Birinci, həm də İkinci Qarabağ müharibəsində törətdiyi cinayətlər ifşa olundu

Məlum olduğu kimi, Avropa Şurası Parlament Assambleyasının (AŞPA) payız sessiyasında “Ermənistan-Azərbaycan münaqişəsinin humanitar nəticələri” adlı məruzə qəbul edilib. Məruzədə 1991-1994-cü illərdə baş verən Birinci Qarabağ müharibəsi və 2020-ci ildə 44 günlük İkinci Qarabağ müharibəsi zamanı həlak olanlar, itkin, qaçqın, məcburi köçkün düşənlər, mədəni irsə dəyən ziyanlar, minalanmış ərazilər və digər məsələlər yer alıb.

Məruzənin müzakirəsi zamanı çıxış edən AŞPA üzvləri mina xəritələrinin Azərbaycana verilməsinin bundan sonrakı insan ölümünün qarşısının alınması üçün vacib olduğunu xüsusi vurğulayıblar. Məsələ ilə bağlı Azərbaycanın AŞPA-dakı nümayəndə heyətinin rəhbəri Səməd Seyidov sosial şəbəkə hesabında bildirib ki, sənəddə Azərbaycan nümayəndə heyətinin təklif etdiyi düzəlişlərin əksəriyyəti qəbul olunub. Birinci Qarabağ müharibəsi ilə bağlı, xüsusilə də Xocalı soyqırımı, Ermənistanın törətdiyi cinayətlər məruzəyə daxil edilib. Erməni deputatlar çox çalışdılar ki, mane olsunlar, ancaq bacarmadılar.

Onun sözlərinə görə, məruzə ətrafında çıxış edənlər ərazilərimizin Ermənistan tərəfindən minalanması məsələsinə toxundular. Qeyd etdilər ki, Ermənistan mina xəritələrini verməlidir. Beləliklə, azad edilmiş ərazilərimizin minalardan təmizlənməsi, münaqişə zonasından uzaq olan Azərbaycan şəhərlərinin - Gəncə, Bərdə, Tərtər, Bakının raket atəşinə məruz qalması kimi məsələlər məruzəyə salınıb.

“Qarabağ Azərbaycan ərazisi olduğu üçün məruzədə Ermənistanın məsuliyyət daşıdığı qeyd edilib. Ümumiyyətlə, Azərbaycan tərəfinin təklif etdiyi düzəlişlərin 90 faizi qəbul olundu. Xüsusi vurğulamalıyıq ki, proseslərin bu şəkildə davam etməsi erməni lobbisinin istəyinə uyğun gəlmir və onlar tamamilə biabır olurlar”, - deyən S.Seyidov onu da söyləyib ki, Birinci Qarabağ müharibəsində minlərlə azərbaycanlının itkin düşməsi, ermənilərin törətdiyi cinayətlərin araşdırılması, Ermənistanın məsuliyyət daşıması kimi məsələlər də məruzədə yer alıb. Erməni deputatların Şuşa kilsəsinin adını dəyişdirmək cəhdləri qəbul olunmadı.

Nümayəndə heyətinin rəhbəri qeyd edib ki, əslində, məruzənin qəbulu Ermənistanın məğlubiyyətidir, sənəd Azərbaycanın ifadə etdiyi bütün reallıqları əks etdirir. Məruzənin müzakirəsi zamanı ermənilərin maneçilik törətmək cəhdlərindən söz açan S.Seyidov bildirib ki, sessiyanın sədri dəyişikliklə bağlı eyni fikri 3 dəfə təkrar etdiyini və erməni deputatın bunu hələ də başa düşməyibsə, bunun onun problemi olduğunu deyərək plenar iclası davam etdirib, ermənilərin cəhdlərinə məhəl qoymayıb. Artıq beynəlxalq təşkilatlar, AŞPA kimi təsisatlar erməni lobbisinin təzyiqlərinə baxmayaraq, Azərbaycanın yaratdığı reallığı qəbul etməyə məcburdur. Ermənilər bəzi qıcıqlandırıcı sözlərlə heç nəyə nail ola bilməyəcəklər.

“Azərbaycan mövqeyini bildirib, mübarizəni davam etdirəcəyik. Nümayəndə heyətimizin bütün üzvləri müzakirələrdə fəal iştirak etdilər və ölkəmizin milli maraqları ilə bağlı fikirləri məruzəyə daxil etməyə nail oldular. Ermənilər müxtəlif hiylələrə əl ataraq nəyəsə nail olmaq istəsələr də, artıq reallıqlar buna imkan vermir”, - deyə nümayəndə heyətinin rəhbəri vurğulayıb.

Nardar BAYRAMLI

Paylaş:

Baxılıb: 460 dəfə