Minsk qrupu Fransada qürub edir

Bakı:

18 °C

94 %

3 m/s

Əlaqə

AZ RU EN

Ana səhifə / Siyasət / Minsk qrupu Fransada qürub edir

Minsk qrupu Fransada qürub edir

24.11.2021 [10:05]

Separatçılara “qucaq açan” rəsmi Paris beynəlxalq hüququ pozur

Soltan Məmmədov: Baş verən xoşagəlməz hadisə bir daha Fransanın qərəzli mövqeyini və öz öhdəliklərini yerinə yetirə bilmədiyini göstərir

Qüdrət Həsənquliyev: Azərbaycan özünü ifşa etmiş bir ölkəni Minsk qrupundan kənarlaşdırmalıdır

Fransa Senatında senatın prezidentinin himayəsi və Ermənistan parlament nümayəndə heyətinin iştirakı ilə “Dağlıq Qarabağ Respublikasının tanınmasının zəruriliyinə dair” qərəzli qətnamənin qəbul edilməsinin ildönümünə həsr olunmuş tədbirin keçirilməsi ilə bağlı məlumat yayılıb. Qeyd edək ki, məlumatda, bu “tədbirə” bəzi erməni separatçılarının da qatıldığı vurğulanır.

İllərdir, özünü “vasitəçi” qiyafəsində təqdim edən, əslində isə birtərəfli mövqe tutan Fransa bu addımı ilə növbəti dəfə qərəzli olduğunu nümayiş etdirir. 2020-ci il Vətən müharibəsində Azərbaycanın əldə etdiyi qələbə işğal altındakı torpaqlarımızın, o cümlədən tarixi Azərbaycan torpağı olan Qarabağın azad olunmasını şərtləndirib. Fransa isə bu addımı ilə ölkəmizin ərazi bütövlüyünə qarşı hörmətsizlik nümayiş etdirir, beynəlxalq hüququn normalarını pozur. Fransanın Ermənistana bu aşırı sevgisi ciddi suallar doğurur. Bəlkə də fransızların məşhur atalar sözü bu suala ən dəqiq cavab kimi götürülə bilər: “Hər ağılsıza heyran olacaq bir ağılsız tapılar”...

Məsələ ilə bağlı fikirlərini qəzetimizlə bölüşən Milli Məclisin Azərbaycan-Fransa parlamentlərarası əlaqələr üzrə işçi qrupunun rəhbəri Soltan Məmmədov bildirib ki, erməni separatçılarının nümayəndələrinin Fransa senatında respublikaçılar fraksiyasının rəhbəri, Valans şəhərinin meri və Ron-Alp regionunun Qrenobl rayonunun rəsmiləri səviyyəsində qəbul edilməsi, Cənubi Qafqazda yaranmış yeni reallıqları düzgün qiymətləndirə bilməməyin və ikili standartların təzahürüdür. Millət vəkili qeyd edib ki, yerli hökumət nümayəndələrinin xarici siyasət sahəsində atdığı addımlar Fransa qanunvericiliyinə ziddir: “ATƏT-in Minsk Qrupunun həmsədri olan Fransanın parlamentinin hər iki palatası qərəzli və beynəlxalq hüquqa zidd qətnamələr qəbul edib. Azərbaycan torpaqlarının işğal altında olduğu dövrdə Fransanın müxtəlif şəhər və bölgələri işğalda olan ərazilərlə 28 qeyri-qanuni “sənəd” imzalayıb. Səfirliyimizin fəaliyyəti nəticəsində bunlardan 11-i məhkəmə qərarları ilə ləğv edilib, 2-si barədə isə məhkəmədə iddia qaldırılıb. ATƏT-in Minsk Qrupunun fəaliyyəti yalnız Azərbaycanla Ermənistan arasında sülhün əldə olunmasına xidmət etməlidir. Fransanın bəzi dövlət qurumları bu cür qərəzli addımlar atmaqdansa, Fransa səfirinin işğaldan azad olunmuş Ağdama dünənki (srağagünkü - red.) səfəri zamanı gördüyü dağıntılarla əlaqədar təəssüratlarını öyrənsəydilər, daha düzgün olardı”.

Millət vəkili onu da vurğulayıb ki, baş verən xoşagəlməz hadisə bir daha Fransanın qərəzli mövqeyini və Minsk Qrupunun həmsədri kimi öz öhdəliklərini yerinə yetirə bilmədiyini göstərir.

BAXCP sədri, Milli Məclisin deputatı Qüdrət Həsənquliyev də Fransanın hər zaman müsəlmanlara, xüsusilə də türklərə qarşı riyakar siyasəti ilə fərqləndiyini bildirib. Millət vəkili qeyd edib ki, Fransadan soruşmaq lazımdır ki, digər ölkələrdəki separatçıları niyə qəbul etmirsiniz: “Separatizmə dəstək olmağın adı nədir? Ləyaqət davası edən dövlət niyə ləyaqətsiz çıxış edir? Onların riyakar mənəviyyatsız siyasəti müharibədə canların getməsinə səbəb oldu. Azərbaycan özünü ifşa etmiş bir ölkəni Minsk qrupundan kənarlaşdırmalıdır”.

Pərviz Sadayoğlu

Paylaş:

Baxılıb: 944 dəfə