Paşinyanın etirafları...

Bakı:

24 °C

57 %

1 m/s

Əlaqə

AZ RU EN

Ana səhifə / Siyasət / Paşinyanın etirafları...

Paşinyanın etirafları...

27.11.2021 [10:01]

Və ya məğlub ölkənin son şansı

Xəbər verildiyi kimi, Ermənistanın baş naziri Nikol Paşinyan Zəngəzurun icra orqanlarının rəhbərləri ilə görüş zamanı Qarabağla bağlı etiraflar səsləndirib. O, Qarabağın Azərbaycanın olduğunu söyləyib və görüşdə iştirak edənlərdən də bu fikri qəbul etmələrini istəyib. “Qarabağ Azərbaycanındır, bizi 30 il ərzində aldadıblar, məsələnin sonu da baş verənlər kimi olmalıydı”,- deyən baş nazir faktiki olaraq Ermənistanın Zəngəzur dəhlizinin açılmasına əngəl olacaq gücdə olmadığını da etiraf edib. Onun sözlərinə görə, Ermənistan Zəngəzurdan keçib Naxçıvana gedən yolu bağlaya bilməz. “Çünki Azərbaycan Prezidenti İlham Əliyev buna hərbi yolla nail olmağa çalışacaq. Bizim isə qarşıdurma üçün resursumuz yoxdur”.

Azərbaycanın yaratdığı yeni geostrateji reallıqların nəticəsi

Əlbəttə, Paşinyanın etirafı Azərbaycanın yaratdığı yeni geostrateji reallıqların təzahürü və nəticəsidir. İkinci Qarabağ müharibəsində möhtəşəm qələbə qazanaraq tarixi ədaləti və öz ərazi bütövlüyünü bərpa edən Azərbaycan 10 noyabr 2020-ci il tarixli üçtərəfli Bəyanatın bütün tələblərinin tam yerinə yetirilməsi ilə əlaqədar qətiyyətli mövqe nümayiş etdirir. Xüsusilə də, bu gün sərhədlərin delimitasiyası və demarkasiyası, Zəngəzur dəhlizinin reallaşdırılması, kommunikasiya xətləri ilə əlaqədar Azərbaycanın yanaşması dəqiq, konkret və birmənalıdır. Reallıqlar da onu deməyə əsas verir ki, Azərbaycan bütün strateji hədəflərinə addım-addım irəliləyir. Elə bu aspektdən yanaşdıqda əminliklə söyləmək olar ki, ölkəmiz Zəngəzur dəhlizinin açılmasına da nail olacaq. Ermənistan bunu istəsə, məsələ daha tez və daha asan həllini tapmış olacaq. Əgər məğlub ölkə bəhs olunan geostrateji kommunikasiyanın yaradılmasına süni əngəl törətməyə çalışacaqsa, istəyinə nail ola bilməyəcək...

Ermənistanın alternativ imkanı yoxdur

Ümumiyyətlə, hazırkı şəraitdə Ermənistan rasional və praqmatik mövqe nümayiş etdirmək, revanşist iddialardan əl çəkmək məcburiyyətindədir. Məğlub ölkənin alternativ şansı - imkanı yoxdur, ona görə də tarixi reallıqlardan və siyasi gerçəkliklərdən dərs almalı, müvafiq nəticələr çıxarmalı, öz üzərinə düşən öhdəlikləri zamanında və qeyd-şərtsiz yerinə yetirməlidir. Ermənistan siyasi dairələri xüsusilə nəzərə almalıdır ki, bu ölkə regional və beynəlxalq proseslərə təsir etmək, yeni geostrateji reallıqları dəyişdirmək iqtidarında deyil. Ermənistan 30 ilə yaxın davam edən işğalçılıq siyasəti səbəbindən regionda təcrid vəziyyətinə düşüb, bütün layihələrdən kənarda qalıb, hər hansı bir geosiyasi və geoiqtisadi imkanlara malik deyil.

Beləliklə, Paşinyanın etirafları, əslində, Ermənistanın son şansından faydalanmaq məcburiyyətində olduğunu göstərir.

Nurlan QƏLƏNDƏRLİ

Paylaş:

Baxılıb: 1072 dəfə