Əli Əhmədov: ATƏT-in Demokratik Təsisatlar və İnsan Haqları Bürosunun fərqli hesabat səsləndirməsi ən başlıcası qərəzlilik və qeyri-obyektivlikdir

Bakı:

17 °C

67 %

6 m/s

AZ RU EN

Ana səhifə / Siyasət / Əli Əhmədov: ATƏT-in Demokratik Təsisatlar və İnsan Haqları Bürosunun fərqli hesabat səsləndirməsi ən başlıcası qərəzlilik və qeyri-obyektivlikdir

Əli Əhmədov: ATƏT-in Demokratik Təsisatlar və İnsan Haqları Bürosunun fərqli hesabat səsləndirməsi ən başlıcası qərəzlilik və qeyri-obyektivlikdir

28.01.2011 [10:02]

“Azərbaycan demokratiya yolunu seçib və qətiyyətlə bu yolla gedir. Demokratiya bizim seçdiyimiz yol olaraq Azərbaycanın inkişafına xidmət edən resurs kimi qiymətləndirilir. Biz demokratik inkişaf yolunu ona görə seçməmişik ki, ATƏT-in özü və hər hansı bir qurumu, o cümlədən, Demokratik Təsisatlar və İnsan Haqları Bürosu bu yolu seçdiyimizə görə bizə hansısa qiymət versin, bizi bəyənsin və ya bəyənməsin”. Bu fikirləri SİA-ya açıqlamasında Yeni Azərbaycan Partiyasının Sədr müavini, İcra katibi, millət vəkili Əli Əhmədov ATƏT-in Demokratik Təsisatlar və İnsan Haqları Bürosunun açıqladığı hesabata münasibət bildirərkən deyib. Onun sözlərinə görə, biz azad və ədalətli seçki dedikdə, Azərbaycan vətəndaşlarının siyasi iradəsinin ifadə olunmasını nəzərdə tutur və sözün həqiqi mənasında ədalətli seçkidə xalqın siyasi iradəsinin ifadə olunması üçün imkanlar yaradırıq.
“ölkəmizdə keçirilən istər prezident, istər parlament, istərsə də bələdiyyə seçkilərində həmişə Azərbaycan xalqı öz siyasi iradəsini ifadə etmək imkanı əldə edib. O cümlədən də, 2010-cu ilin noyabr ayında keçirilən parlament seçkilərində xalq öz iradəsini ifadə etmək imkanı qazandı, bundan bəhrələndi və öz iradəsini ifadə edərək Milli Məclisdə təmsil olunmaq üçün layiq hesab etdiyi insanlara səs verdi. O insanlar da Azərbaycan xalqını Milli Məclisdə təmsil edirlər. Biz hesab edirik ki, xalqın iradəsinin ifadə olunması hər hansı bir siyasi partiyanın parlamentdə təmsil olunması və yaxud təmsil olunmamasından daha yüksək dəyərdir. Biz xalqın iradəsinin ifadə olunması dedikdə, heç də onu nəzərdə tutmuruq ki, hansısa partiyanın namizədləri qanunverici orqanda təmsil olunmaq imkanı əldə ediblər. önəmli olan xalqın öz iradəsini ifadə etmək hüququnu reallaşdırmasıdır”, - deyə o əlavə edib.
Ə.Əhmədov təəssüf hissi ilə qeyd edib ki, bəzi hallarda bir sıra beynəlxalq təşkilatlar, o cümlədən, ATƏT-in Demokratik Təsisatlar və İnsan Haqları Bürosu kimlərinsə, hansısa siyasi təşkilatların seçkidə uğur qazanmamasını, parlamentdə təmsil olunmaq hüququnu əldə etməməsini seçkilərin demokratikliyi, insanların öz iradəsini ifadə etməsi ilə əlaqələndirməyə çalışırlar. Seçki prosesinə qoşulmuş insanların heç də hamısının uğur qazana bilmədiyini deyən Əli Əhmədov qeyd edib ki, uğur qazananlara insanların rəğbət bəsləməsi prizmasından yanaşmaq lazımdır. Onun sözlərinə görə, Azərbaycanda ötən ilin noyabr ayında keçirilən parlament seçkiləri bütün parametrləri ilə demokratik normalara uyğun olub. Ə.Əhmədov vurğulayıb ki, Azərbaycan xalqı kimə rəğbət bəsləyib, kimin parlamentdə təmsil olunmasını layiq bilibsə, onlara da səs verib.
“ölkədə keçirilən parlament seçkilərini 1000-dən çox beynəlxalq müşahidəçi izləyib. Onların böyük əksəriyyəti ölkədə keçirilən seçkilərin obyektivliyini xüsusi olaraq vurğulayıblar. Belə olan halda yalnız bir qurumun digərlərindən kəskin şəkildə fərqlənən rəy verməsi ən azından yumşaq desək, qeyri-obyektivlikdir, qərəzliliyin ifadəsidir. Biz bütün müşahidəçilərə eyni gözlə baxırıq və həm də arzu edirik ki, seçkiləri izləmiş bütün müşahidəçilər seçkilərə eyni gözlə qiymət verməyə çalışsınlar. Beynəlxalq müşahidəçilərin əksəriyyətinin Azərbaycanda keçirilən seçkilərin nəticələrini obyektiv qiymətləndirməsi və bunu xalqın iradəsinin düzgün ifadəsi kimi səciyyələndirməsi fonunda bir qurum nümayəndələrinin, həm də tərkibində fikir birliyi olmayan qurumun fərqli bir hesabat səsləndirməsi digər beynəlxalq müşahidəçilərin fikirlərinə hörmətsizlik, ən başlıcası isə qərəzlilik və qeyri-obyektivlikdir. Seçkilərin nəticələrinə obyektivlikdən uzaq qiymət verilməsini pisləyirəm. Beynəlxalq müşahidəçilərin məqsədi ondan ibarət olmamalıdır ki, onların nəzərdə tutduğu kimlərsə seçilmədikdə seçkiləri pisləmək kimi xoşagəlməyən addım atsınlar. Seçkiyə qatılan insanlar xalqın rəğbətinə ilk növbədə güvənməli və xalqın səsini qazanmalıdır. Hər bir seçkidə iştirak edən qüvvələr üçün ən başlıca meyar xalqın münasibəti, rəğbəti və dəstəyi olmalı, müşahidəçi isə ilk növbədə xalqın rəyinə, iradəsinə hörmətlə yanaşmağı bacarmalıdır. Təəssüf hissi ilə qeyd etmək istəyirəm ki, ATƏT-in Demokratik Təsisatlar və İnsan Hüquqları Bürosunun hazırladığı hesabatda məhz xalqın iradəsinə hörmət elementini görmək mümkün deyil”, - deyə o əlavə edib.

Paylaş:

Baxılıb: 975 dəfə