Paşinyan-Vardanyan “döyüşü”...

Bakı:

20 °C

68 %

8 m/s

Əlaqə

AZ RU EN

Ana səhifə / Siyasət / Paşinyan-Vardanyan “döyüşü”...

Paşinyan-Vardanyan “döyüşü”...

24.12.2022 [11:00]

Maraqların döyüşündəki “piyada”ların son aqibəti necə olacaq?

2020-ci ildə Vətən müharibəsi ilə başa çatan Qarabağ münaqişəsi regionda yeni siyasi reallıqlar formalaşdırdı. 30 ilə yaxın davam etmiş işğal faktı regionda sabitliyin və təhlükəsizliyin formalaşmasına mane olmuşdu.

Bu isə özlüyündə iqtisadi inkişafı da ləngitmişdi - mühüm regional və hətta qlobal layihələr üçün münbit ərazi sayılan Cənubi Qafqaz məhz bu işğal faktı nəticəsində illərlə diqqətdən kənarda qalmışdı. İşğal faktının yekunlaşması ilə isə bu amil özünün real dəyərini ortaya qoydu. Azərbaycanın təşəbbüsü ilə başlanan əməkdaşlıq platformaları üzrə müzakirələrə dünyanın bir sıra gücləri də qatılmaq niyyətini biruzə verdi - bu faktdır. Nəzərdə tutulan Zəngəzur dəhlizi isə Avropa ilə Asiyanı birləşdiəcək yeni iqtisadi aorta ola bilər. Beynəlxalq aləmin regiona əsas marağı da məhz buna istiqamətlənib.

Qeyd edilən amillər regiondakı maraq mübarizəsini də aktuallaşdırır. Məsələn, Azərbaycan ilə Ermənistan arasındakı münasibətlərin normallaşması prosesinə vasitəçilik etmək uğrunda gedən mübarizə bunu özündə real olaraq əks etdirir. Bu prosesdə həm Avropa, həm də Rusiya önə çıxmağa çalışır. Bunun nəticəsidir ki, danışıq raundları ənənəvi olaraq bir-birini əvəz edir.

Paşinyanla Vardanyanın timsalında Qərb-Rusiya dueli...

Burada bir əsas məqam diqqət çəkir - Qərb ilə Rusiya arasında üstünlük qazanmaq istiqamətində gedən yarışda əsas “alət” rolunda Ermənistan çıxış edir. Ölkədə güclü dövlət idarəçiliyi institutunun olmaması, xalqın etirazları, ağır sosial vəziyyət, o cümlədən, ortadakı məğlub durum Ermənistanı hər iki gücün əlində oyuncağa çevirib. Məsələn, son hadisələr bir reallığı da ortaya çıxarıb - Vardanyan ilə Paşinyanın “dueli” Qərb ilə Rusiya arasında gedən savaşın görünməyən tərəfidir. Belə ki, Araik Arutyunyanın işə yaramaması, onun son dövrlərdə daha çox Qərbə meyil etməsi (Fransa turnesi) Vardanyanın Qarabağda daha çox “populyarlaşdırılmasına” yol açıb. Adi bir fakt - R.Vardanyanın Ağdərə şəhərində və Xocavənd rayonunun mərkəzində keçiridiyi təxribat xarakterli görüşlərı zamanı yersiz və heç bir əsasa söykənməyən pafosa üstünlük verməsi onu “revanşist güc” kimi tanıtmağa hədəflənib. Beləliklə də Vardanyan və ona yol göstərənlər 30 ilə yaxın Ermənistanın işğal altında saxladığı Azərbaycan ərazisində yaradılmış qondarma rejimin “ömürünü uzatmağa” çalışırlar. Hətta son dövrlərdə iki ölkə arasında gedən sülh danışıqları prosesində yeni manipulyasiyalara əl atılır - qondarma qurumun “tərəf” kimi Azərbaycanla danışıqlar aparması istiqamətində səylər göstərilir. Məqsəd ermənilərin Azərbaycanın daxilində hansısa statusla yaşamasını təmin etməkdir ki, Azərbaycanın məsələdəki mövqeyi qətidir - Bu olmayacaq...

Moskvadan Qarabağa çox aydın gündəliklə göndərilən Vardanyan...

Vardanyanın regiona gəlməsinin səbəbləri bəllidir. Onu buraya göndərənlər Azərbaycanın prosesdəki üstünlüyünə kölə salmaq, danışıqları bu yolla uzatmaq niyyətindədirlər. Amma bunu düşünənlər unutmamalıdırlar ki, Qarabağa kimin gəlməsindən, yaxud göndərilməsindən asılı olmayaraq heç nə dəyişmir. Hətta Qarabağda rusiyalı milyarder Ruben Vardanyan, keçmiş nazir Vardan Oskanyan və digər şəxslərdən ibarət “komandanın” formalaşdırılması belə situasiyanı dəyişmək iqtidarında deyil. Prezident İlham Əliyev Avropa İttifaqının Şərq Tərəfdaşlığı üzrə xüsusi elçisinin rəhbərlik etdiyi nümayəndə heyətini qəbul edərkən də bildirdi ki, əgər onlar Qarabağda ermənilərin hüquqları və təhlükəsizliyi barədə söhbət aparmaq istəyirlərsə, bu alınmayacaq: “Biz bu haqda Qarabağda yaşayan ermənilərlə danışmağa hazırıq, amma Moskvanın göndərdiyi, ciblərində rus xalqından oğurladığı milyardlarla pula sahib Vardanyan kimi insanlarla yox. O, Moskvadan oraya çox aydın gündəliklə göndərilib”.

Prezident İlham Əliyevin bu fikirləri Azərbaycanın qəti mövqeydir. Vardanyanın Qarabağa gəliş niyyəti hər kəsə bəllidir - sadəcə olaraq, onu Moskvadan Qarabağa göndərənlərin “planları” düzgün getmir. Azərbaycanın prosesə nəzarəti hər şeyi alt-üst edir. Vardanyan isə yalançı pafosdan başqa heç bir işə yaramır...

Paşinyan Vardanyanın ona rəqib olacağını anlayır

Paşinyan isə onun ətrafında oynanılan oyunları görür. Ard-arda Qərbə etdiyi səfərlər, KTMT-dən çıxış uğrunda “apardığı mübarizə” və ən əsası sülh prosesini yekunlaşdırmaq arzusu onun da sonunu gətirə bilər. Prosesi təhlil etdikdə bir fakt aydın görünür - Paşinyan bütün gücünü Vardanyanın fiaskosuna yönəldib. Təsadüfi deyil ki, bu iki şəxs arasında gedən qarşılıqlı mübarizə bütün çılpaqlığı ilə ortadadır. Məsələn, Vardanyan Ermənistanın, bu ölkənin siyasi rəhbərliyinin Qarabağdakı erməniləri unutduğunu “göstərməyə” çalışır. Paşinyan isə bütün dünyaya separatçılarla hər hansı bir əlaqəsinin olmadığını, onları tanımadığını nümayiş etdirməyə səy göstərir. Onun ard-arda atdığı addımlar, verdiyi bəyanatlar bunu deməyə əsas verir. Məsələn, oktyabrın 6-da Praqada Azərbaycanın ərazi bütövlüyünü tanıdığını bəyan edən Paşinyan bir ay keçməmiş, dekabrın 3-də Xankəndidən (separatçıların olduğu ərazilərdən) ağır hərbi texnikanın böyük partiyasını çıxarmağı tapşırıb. Bu barədə erməni mediası yazıb. “Paşinyan çalışıb ki, Xankəndini tərk-silah etdiyini göstərsin. Lakin bu alçaldıcı addım Paşinyanı xilas edə bilmədi. Cəmi bir neçə həftə sonra Laçın dəhlizində aksiya keçirən azərbaycanlılar yolu bağladılar”, - məlumatda iddia edilir.

Bəli, Paşinyan da görür ki, yol bitir. İlin sonu yolun da sonunu gətirə bilər. Bu baxımdan, özünü xilas etmək üçün bütün mümkün qabaqlayıcı tədbirləri görməyə çalışır. Paşinyan anlayır ki, Qarabağdakı silahlı birləşmələrin ərazini tərk etməsinə lap az qalıb. Bu mənada, Vardanyan artıq Paşinyanın özünə “rəqib” ola bilər. Bunun olmaması üçün də erməni baş nazir Vardanyanı elə Qarabağda “tərk-silah” etməyə çalışır...

SADİQ

Paylaş:

Baxılıb: 531 dəfə