Tehran-23...

Bakı:

26 °C

66 %

8 m/s

Əlaqə

AZ RU EN

Ana səhifə / Siyasət / Tehran-23...

Tehran-23...

25.10.2023 [10:40]

Yeni reallıqları bir daha təsdiqlədi

Bir çox mühüm məqamları ilə yadda qalan “Tehran görüşü” həm də region ölkələrinin yeni reallıqları təsdiqləməsi ilə seçildi. Belə ki, artıq sülh və əməkdaşlıq anonsları verən xarici siyasət idarə rəhbərləri Azərbaycanın Qarabağda apardığı antiterror tədbirlərindən sonrakı mərhələdə gözlənilən perspektivlərlə bağlı fikirlərini də bölüşdülər. Başqa sözlə, verilən bəyanatlarda Azərbaycanın ərazi bütövluyünə dəstək, Qarabağ münaqişəsinin tarixə çevrilməsi, qarşıdakı mərhələnin fərqli məsələlərə həsr olunmasının vacibliyi öz əksini tapdı.

Praktiki addımlar atılmalıdır...

Bu mənada, Rusiya XİN rəhbərinin açıqlamaları xüsusilə qeyd edilməlidir. Rusiya xarici işlər naziri Sergey Lavrov Tehranda baş tutan Cənubi Qafqaz üzrə “3+3” regional platformasının XİN başçılarının toplantısının yekunları ilə bağlı keçirdiyi

brifinqdə bildirib ki, Ermənistan-Azərbaycan münaqişəsi böyük ölçüdə həll olunub, Qarabağ Azərbaycana məxsusdur. Onun sözlərinə görə, indi Ermənistanla Azərbaycan arasında münasibətlərin tam normallaşması ilə bağlı praktiki addımların atılması qalır: “Hər şeydən öncə, sülh müqaviləsinin hazırlanması, sərhədlərin delimitasiyası və hansısa maneə olmadan nəqliyyat və iqtisadi əlaqələrin qurulması qalır. Ermənistan-Azərbaycan münasibətlərinin normallaşması prosesinə dair bu aspektlər birbaşa olaraq “3+3” formatında müzakirə olunmur. Tərəflərin razılaşdığı kimi bunun üçün ayrıca kanallar var. Rusiya bütün bu proseslərdə əlaqələndirici rolunu oynayır”.

Lavrovdan öncə Putin...

44 günlük Vətən müharibəsindən sonrakı prosesdə Rusiyanın münasibətlərin normallaşması istiqamətində addımları olduqca mühüm əhəmiyyət daşıyıb. Soçidə, Moskvada baş tutan üçtərəfli görüşlər, danışıqlar prosesin istiqamətinin müəyyənləşməsində olduqca əhəmiyyət?? rol oynayıb - Rusiya hər zaman Azərbaycanın ərazi bütövlüyünə dəstək nümayiş etdirib və dövlətlərarası münasibətlər yüksək səviyyədədir. 2020-ci il 10 noyabr, 2021-ci il 11 yanvar və 26 noyabr bəyanatları problemin həlli ilə bağlı mühüm aspektləri özündə əks etdirib. Bu bəyanatlar prosesin inkişafına müsbət təsir göstərməklə yanaşı, qarşıdakı dövr üçün əsaslı perspektiv yaradıb. Rusiya hər zaman problemin sülh yolu ilə həllində vasitəçi kimi rolunu yüksək səviyyədə təqdim edib. Qeyd edək ki, Rusiyanın mövqeyi bu ayın əvvəlində Valday Diskussiya Klubundakı müzakirələr zamanı Rusiya Prezidenti tərəfindən də dilə gətirilmişdi. Rusiya Prezidenti vurğulamışdı ki, Ermənistan Qarabağı Azərbaycan ərazisi kimi tanıyıb: “Ermənistan Qarabağın statusu məsələsini həll edib. Qarabağ rəsmi olaraq Azərbaycanın tərkibinə keçib”.

Bu mövqe səsləndirildiyi zaman da birmənalı olaraq siyasi ekspertlər tərəfindən yüksək qiymətləndirilmişdi - Putinin “Qarabağ Azərbaycan torpağıdır” fikri geosiyasi münasibətlərin hazırki durumunun ən real dəyərləndirilməsi kimi vurğulanmışdı.

Azərbaycan-Rusiya münasibətləri...

Lavrovun da vurğuladığı kimi, “3+3” formatı iqtisadi münasibətlərin genişləndirilməsi üçün yaradılan formatdır və bu imkanlardan Azərbaycan və Rusiya hər zaman müsbət formada istifadə edir. Ümumiyətlə, dialoqa əsaslanan ikitərəfli siyasi münasibətlər iqtisadi əlaqələrin ə inkişafında əsaslı rol oynayıb. Azərbaycan-Rusiya əlaqələri çoxşaxəli səciyyə daşıyır. Həyatın elə bir sahəsi yoxdur ki, iki qonşu ölkə sıx əməkdaşlıq etməsin. Azərbaycanla Rusiya arasında siyasi, humanitar və mədəni əməkdaşlığın yüksək səviyyəsinə uyğun olaraq ikitərəfli iqtisadi əlaqələr də çox uğurla inkişaf edir. Bu ilin ilk yarısında Rusiya Azərbaycanın üçüncü xarici ticarət tərəfdaşı olub. 2023-cü ilin yanvar-iyun aylarında Azərbaycan ilə Rusiya arasında ticarət dövriyyəsi 2 milyard 164 milyon 562 min dollar təşkil edib. Bu göstərici 2022-ci ilin yanvar-iyun ayları ilə müqayisədə 37,6 faiz çoxdur. Bu dövrdə Azərbaycanın ümumi xarici ticarət dövriyyəsinin 8,27 faizi Rusiya ilə ticarət əməliyyatlarının payına düşüb və Rusiya Azərbaycanın üçüncü xarici ticarət tərəfdaşı olub.

Eyni zamanda, qarşılıqlı səfərlər münasibətlərimizin inkişafına xüsusi töhfə verir. Rusiya regionlarının Azərbaycanın bölgələri, hətta Bakı rayonları ilə dostluq əlaqələri qurması, qarşılıqlı səfərlərin reallaşması münasibətlərin dinamizm qazanmasına xüsusi töhfə verir. Əlaqələrin inkişafı isə dövlətlərarası münasibətlərin yüksələn xətlə inkişafında əsaslı rol oynayır...

SADİQ

Paylaş:

Baxılıb: 681 dəfə