Ziddiyyətli hərbi təlim...

Bakı:

12 °C

82 %

5 m/s

Əlaqə

AZ RU EN

Ana səhifə / Siyasət / Ziddiyyətli hərbi təlim...

Ziddiyyətli hərbi təlim...

15.11.2023 [10:30]

İrəvan Avropa tərəfindən məqsədli şəkildə müharibəyə sürüklənir

Son dövrlərdə Ermənistanın müharibə “ab-havası” ilə yaşaması özünü bir sıra amillərlə biruzə verməkdədir. Fransadan silah əldə etməsinin ardından İrəvan bəzi dövlətlərlə birgə təlimlərə də qoşulub. Belə ki, Ermənistan, Yunanıstan və Kiprin xüsusi təyinatlı qüvvələrinin birgə təlimləri keçirilib. KİV-də yayılan məlumatlara görə, təlimlər noyabrın 6-dan 10-dək Yunanıstanın milli müdafiəsinin baş qərargahı olan Attikanın Nea Peramos bölgəsində keçirilib. Bildirilib ki, birgə təlimlər Yunanıstan, Kipr və Ermənistan arasında 2023-cü il üçün Birgə Fəaliyyət Planının bir hissəsidir və iştirakçılar arasında qarşılıqlı anlaşma səviyyəsinin yüksəldilməsinə və təcrübə mübadiləsinə, eləcə də onların əməliyyat imkanlarının artırılmasına xidmət edir. Təlimlər sürətli döyüş atışları, snayper texnikası və taktikası, yaşayış sahəsi daxilində rəqabətin texnikası, taktikası və prosedurları, kiçik miqyaslı təlimlərin təşkilini əhatə edib.

Göründüyü kimi Ermənistanın bu kimi hərbi təlimlərə qoşulması özü həm ortaya bəzi suallar çıxarır, həm də təzad yaradır. Məsələn, KTMT üzvü olan Ermənistanın NATO üzvü olan Yunanıstanla birgə hərbi təlimlərə qoşulması ziddiyyətlidir. Nəzərə alsaq ki, hər iki strukturun təmsilçiləri konkret olaraq Ukrayna “cəbhəsində” qeyri-formal da olsa, qarşı-qarşıya dayanıblar, Ermənistanın bu addımını təmsil etdiyi quruma növbəti xəyanəti kimi də adlandırmaq olar. Bu hərbi təlimlərin xüsusilə, Yunanıstanla keçirilməsi də ayrıca bir məsələdir - hər kəsə bəllidir ki, Yunanıstan ilə Türkiyə arasında müəyyən ziddiyyətli məsələlər var və hətta bəzi anlarda bu məsələlər kritik fon alır. Bu nöqteyi-nəzərdən Ermənistanın Yunanıstan və Kipr ilə birgə təlim keçməsi Azərbaycan-Türkiyə birliyinə qarşı növbəti sabotaj kimi qiymətləndirilməlidir. Bu təlimlər nə qədər də “Birgə Fəaliyyət Planının bir hissəsi” kimi təqdim olunsa da, onun Azərbaycan-Türkiyə strateji əməkdaşlığına qarşı yönəldiyi ortadadır.

Digər bir məsələ, təcrübə mübadiləsinin “əməliyyat imkanlarının artırılması”na xidmət göstərməsi məsələsidir - Ermənistanın silahlandırılması, onun “əməliyyat imkanlarının artırılması” birmənalı şəkldə Avropanın Azərbaycana qarşı apardığı təzyiq kampaniyasının növbəti təzahürüdür. Qərb regionda sabitliyin formalaşmasına məhz bu yolla mane olmağa çalışır - gücsüz və insan resursu həddindən aşağı səviyyədə olan Ermənistanı qızışdırmaqla, silahlandırmaqla yeni eskalasiyalara zəmin yaradır. Amma Ermənistan unutmamalıdır ki, Azərbaycan Ordusu ölkəmizə qarşı planlaşdırılan bütün təxribatların qarışısını almaq iqtidarındadır. Ermənistanın arxasında hansı qüvvələrin və ya dövlətlərin dayanmasından, İrəvanı hansı güclərin dəstəkləməsindən asılı olmayaraq yeni eskalasiya arzusu Ermənistanın ən böyük səhvi olar. Təsadüfi deyil ki, noyabrın 8-də Xankəndi şəhərində keçirilən Zəfər paradında çıxış edən Prezident İlham Əliyev bildirib ki, Ermənistan rəhbərliyi əgər revanşist fikirlərlə yaşayırsa, Ermənistanın arxasında dayanan manipulyasiyaya öyrəşmiş ölkələr əgər yenə də Azərbaycan üçün hansısa məkrli plan qurursa, o, bugünkü parada bir nəzər yetirsin: “Bilsin ki, burada mindən çox igidimiz düzülübdür və bizim 100 mindən çox onlar kimi igidlərimiz var və heç bir qüvvə bizi təhdid edə bilməz. Biz istənilən müstəvidə döyüşə hazırıq, siyasi, lazım olarsa, hərbi meydanda bunu göstərmişik. XXI əsrdə heç bir ordu bizim qədər peşəkarlıq, fədakarlıq göstərməmişdir. Heç bir xalq öz doğma torpağını bu qədər əziz tutub uğrunda ölümə getməyə hazır olmamışdır. Bunu biz hamımız yaxşı bilirik, bunu dünya da bilsin”.

P.İSMAYILOV

Paylaş:

Baxılıb: 649 dəfə