Səhiyyənin görünməyən qəhrəmanları...

Bakı:

30 °C

53 %

9 m/s

Əlaqə

AZ RU EN

Ana səhifə / Sosial / Səhiyyənin görünməyən qəhrəmanları...

Səhiyyənin görünməyən qəhrəmanları...

25.09.2025 [08:32]

Əczaçıların peşə bayramıdır

Bu gün dərman qutuları ilə birlikdə ümid paylayan, hər sualımıza səbirlə cavab verən əczaçıların bayramıdır. Əczaçılıq sadəcə bir peşə deyil, elm və insan sevgisinin vəhdətidir. Onlar səhiyyənin görünməyən qəhrəmanlarıdır: pandemiyada da, gecə növbəsində də, hər çağırışda da işləyən səssiz fədakarlardır...

Əczaçı olmaq sadəcə bir dərmanı şkafdan çıxarıb alıcıya təqdim etmək deyil. Bu, uzun illər təhsil, diqqət, dəqiqlik və məsuliyyət tələb edən bir peşədir. Belə ki, əczaçı hər bir dərmanın tərkibini, dozasını, təsirini, əks göstərişlərini və digər dərmanlarla qarşılıqlı təsirini bilməlidir. Yanlış məlumat, səhv doza - bütün bunlar insan həyatına ciddi təhlükə yarada bilər. Bu səbəbdən əczaçı savadlı, soyuqqanlı və diqqətli olmalıdır.

Onlar həmişə ayaqda idi...

Pandemiyada maskanın arxasında nəfəs almaqda çətinlik çəkən, qapılar bağlananda belə aptekləri açıq saxlayan onlar idi. Hər sual verən, hər qorxmuş xəstəyə “narahat olmayın, burdayıq” deyən də onlar idi. Bəzən əczaçıların təbəssümü antibiotikdən də güclü təsir edir. Onların diqqəti xəstənin gözündə həyat qədər qiymətlidir.

Əczaçılar bəzən gecəni gündüzə qatır, bəzən bir dərmanın tərkibindəki dəyişiklik həyat qurtarır. Bu baxımdan onların işi səhvsiz olmalıdır, çünki adi bir səhv insan taleyinə yazıla bilər.

Çox zaman dəyəri görünməyən peşə

Bu gün, səhiyyənin digər sahələri qədər əczaçılığın da inkişafına, bu peşə sahiblərinin cəmiyyət tərəfindən tanınmasına və qiymətləndirilməsinə ehtiyac var. Əczaçılar bəzən tibb işçiləri arasında ən az yad olunanlardır. Amma unutmayaq ki, bir reseptin düzgün yerinə yetirilməsi, bir dərmanın vaxtında verilməsi, dozaların düz təyin olunması həyat və ölüm arasındakı xətt ola bilər. Bu xətti qoruyanlar da məhz əczaçılardır.

2009-cu ilin 25 sentyabr tarixində Beynəlxalq Əczaçılıq Federasiyası tərəfindən İstanbulda keçirilən Konqresdə Beynəlxalq Əczaçı Günü təsis edilib. Bu günün qeyd edilməsi səhiyyə sistemində əczaçıların əhəmiyyətini bilmək üçün yaxşı bir fürsətdir və maarifləndirici istiqamətdir.

Əczaçıya hər bir evdə, hər bir ailədə ehtiyac var. Onların əməyini görmək və dəyərləndirmək hər birimizin borcudur. Çünki təhlükəsiz dərman istifadəsinin təminatçısı məhz əczaçılardır. Fürsətdən istifadə edib səbirlə bizə xidmət edən, gecə növbəsində belə bizi qarşılayan, yorğun, amma gülümsəməyi unutmayan əczaçıları peşə bayramı münasibətilə təbrik edirik.

Yeganə BAYRAMOVA

Paylaş:

Baxılıb: 599 dəfə