Kardioloq: Güclü maqnit qasırğaları zamanı ürək ən həssas orqana çevrilir

Bakı:

11 °C

87 %

7 m/s

Əlaqə

AZ RU EN

Ana səhifə / Sosial / Kardioloq: Güclü maqnit qasırğaları zamanı ürək ən həssas orqana çevrilir

Kardioloq: Güclü maqnit qasırğaları zamanı ürək ən həssas orqana çevrilir

08.11.2025 [19:20]

ABŞ-ın Milli Okean və Atmosfer Administrasiyasının (NOAA) məlumatına əsasən, Yer kürəsi hazırda G3 səviyyəsində qiymətləndirilən güclü geomaqnit qasırğası yaşayır. Qasırğa maqnitlənmiş plazmanın güclü axını nəticəsində yaranıb. Bu fəallığın əsas səbəbi Günəşin 11 illik aktivlik dövrünün pik nöqtəsinə, yəni “Günəş maksimumu” fazasına daxil olmasıdır ki, bu da Günəş alovlarının sayının artmasına gətirib çıxarır. ABŞ Kosmik Hava Proqnozu Dövlət Mərkəzi xəbərdarlıq edib ki, qasırğa artıq Yerə təsir göstərir və növbəti bir neçə gün ərzində bu hal davam edəcək.

Bakı Dövlət Universitetinin fizika fakültəsinin astrofizika kafedrasının məlumatına görə, noyabrın 7-də yüksək enliklərdə maqnit qasırğasının gücü 10 ballıq Kp şkalası üzrə 6–7 bal təşkil edib, növbəti günlərdə isə bu göstərici tədricən azalaraq normal səviyyəyə qayıdacaq. Orta enliklərdə, o cümlədən Azərbaycanda, noyabrın 7-də maqnit qasırğasının gücü 6 bal olub və yaxın günlərdə də azalaraq fon səviyyəsinə enəcəyi gözlənilir.

Güclü geomaqnit qasırğaları zamanı xüsusilə meteohəssas insanların sağlamlığında problemlər yarana bilər. Müşahidələr və elmi araşdırmalar göstərir ki, Günəşdəki mövcud fəallıq qan dövranının zəifləməsinə, qan təzyiqinin dəyişməsinə, aritmiyaya və tromb yaranması riskinin artmasına səbəb ola bilər. Bu isə xroniki ürək-damar xəstəlikləri olan şəxslər üçün xüsusi təhlükə yaradır.

AZƏRTAC-ın müxbiri ilə söhbətində Səhiyyə Nazirliyinin akademik C.Abdullayev adına Elmi-Tədqiqat Kardiologiya İnstitutunun direktoru, professor Gülnaz Dadaşova meteohəssas insanların bu dövrdə qarşılaşdıqları problemlər barədə ətraflı danışıb.

“Güclü maqnit qasırğaları zamanı ürək insan orqanizmində ən həssas orqana çevrilir. Ürək və beyin elektromaqnit mərkəzlər kimi fəaliyyət göstərdiyindən, maqnit qasırğaları ilk növbədə ürək-damar sisteminə təsir göstərir. Bu təsiri xüsusilə aritmiyaya, yüksək təzyiqə və stresə meyilli insanlar daha güclü hiss edirlər. Maqnit qasırğası zamanı bədəndə yaranan narahatlığı “görünməz təzyiq” kimi təsvir etmək olar, bu, vizual olaraq görünmür, lakin tədricən damarlara və sinir sisteminə sıxıcı təsir göstərir”, – deyə kardioloq bildirib.

Onun sözlərinə görə, hamilə qadınlar bu dövrdə daha həssas olurlar: “Hamiləlik zamanı ürəyin fəaliyyəti güclənir, çünki o, iki nəfərin qan dövranını təmin edir. Maqnit qasırğaları zamanı oksigen dövranında və təzyiqdə cüzi dəyişikliklər müşahidə oluna bilər. Qadınlar zəiflik, ürəkbulanma, yuxusuzluq və əsəbilik hiss edə bilərlər. Sağlam hamilələr üçün bu hallar təhlükə yaratmır, belə ki, onlara sadəcə dincəlmək və sakitlik lazımdır. Lakin ürək-damar və təzyiq problemi olan hamilələr bu günlərdə xüsusilə ehtiyatlı olmalıdırlar.”

Professor meteohəssas insanlara sakitliyi qorumağı tövsiyə edib: “Həddən artıq çox danışmaq, mübahisə etmək və əsəbiləşmək ürəyi yorur. Orqanizmdə balansı saxlamaq üçün kifayət qədər su içmək vacibdir. Su, belə demək mümkünsə, bədənin maqnit izolyasiyası rolunu oynayır. Qəhvə və enerji içkilərindən uzaq durmaq, onların əvəzində yaşıl çay və ya kakao qəbul etmək tövsiyə olunur. Dərin nəfəs məşqləri ürək ritmini sabitləşdirməyə və əzələ gərginliyini azaltmağa kömək edir. Sinə ağrısı və ya nəbzin sürətlənməsi hiss edilərsə, dərhal həkimə müraciət etmək lazımdır”, – deyə G. Dadaşova vurğulayıb.

Paylaş:

Baxılıb: 455 dəfə