ADİU-da 20 Yanvar faciəsinin 25-ci ildönümünə həsr olunan tədbir keçirilib

Bakı:

30 °C

44 %

6 m/s

Əlaqə

AZ RU EN

Ana səhifə / Sosial / ADİU-da 20 Yanvar faciəsinin 25-ci ildönümünə həsr olunan tədbir keçirilib

ADİU-da 20 Yanvar faciəsinin 25-ci ildönümünə həsr olunan tədbir keçirilib

20.01.2015 [09:35]

20 yanvar faciəsi ilə bağlı Azərbaycan Dövlət İqtisad Universitetinin (ADİU) bütün tədris binalarında silsilə tədbirlər keçirilib. Universitetdə quraşdırılan monitorlarda 20 Yanvar hadisələrini əks etdirən sənədli filmlər nümayiş olunub, ADİU-nun “İqtisadçı” qəzetinin 20 Yanvar hadisələrinə həsr olunan xüsusi sayı çapdan çıxıb.
Yanvarın 19-da Azərbaycan Dövlət İqtisad Universitetində 20 Yanvar faciəsinin 25-ci ildönümünə həsr olunan anım mərasimi keçirilib.
Mərasim iştirakçıları ali təhsil ocağında şəhid-tələbələrin xatirəsinə ucaldılan memorial xatirə kompleksini ziyarət ediblər. Vətənimizin azadlığı uğrunda canlarından keçən şəhidlərin əziz xatirəsi bir dəqiqəlik sükutla yad edilib.
Tədbirdə çıxış edən ADİU-nun rektoru, professor Ədalət Muradov bildirib ki, 20 Yanvar xalqımızın tarixinə sınaq, qəhrəmanlıq və inam günü kimi yazılıb. Rektor qeyd edib ki, 20 Yanvar faciəsinə ilk siyasi-hüquqi qiyməti 1990-cı il yanvarın 21-də Ümummilli lider Heydər Əliyev verib. O, öz həyatını təhlükə qarşısında qoyaraq, Azərbaycanın Moskvadakı daimi nümayəndəliyinə gələrək, M.Qorbaçov hakimiyyətinin törətdiyi cinayəti ifşa edib və kəskin etirazını bildirib. Ümummilli lider Heydər Əliyev bəyanatda xalqımıza qarşı törədilən qanlı cinayətin məsuliyyətinin o dövrkü SSRİ və Azərbaycan rəhbərlərinin üzərinə düşdüyünü bildirib və bütün azərbaycanlıları həmrəyliyə çağırıb. Az sonra Heydər Əliyevin təşəbbüsü ilə Naxçıvan Muxtar Respublikasının Ali Məclisi 21 noyabr 1990-cı ildə yanvar hadisələrinə ilk siyasi-hüquqi qiymət verib.
Milli Məclisin deputatı, professor Xanhüseyn Kazımlı çıxışında bildirib ki, 20 Yanvar hadisələri, hər şeydən əvvəl, Azərbaycan xalqının milli oyanışından, azadlıq və müstəqillik mücadiləsindən xəbər verən tarixi bir gerçəklikdir.
Azərbaycan tarixi kafedrasının professoru Abbas Seyidov isə çıxış edərək, 20 Yanvar faciəsinin siyasi-tarixi səbəblərini geniş şərh edib. Azadlıq mübarizəsinin şanlı səhifəsi kimi xalqımızın yaddaşına əbədi həkk olunan 20 Yanvar faciəsinin heç bir zaman unudulmayacağını deyib. Bildirib ki, 20 Yanvar şəhidləri Azərbaycan xalqının yaddaşında azadlıq mücahidləri kimi daim yaşayacaq, xatirələri dərin ehtiramla yad ediləcək.
Sonra ADİU-nun şəhid-tələbələri Əbülhəsənov İlqarın qardaşı Yavər Əbülhəsənov, Əzizov Habilin anası Zinayə Əzizova çıxış edərək şəhidlərin keçdiyi həyat yolundan danışıblar. Şəhidlərin ailə üzvləri dövlət tərəfindən şəhid ailələrinə göstərilən qayğı və diqqəti yüksək qiymətləndiriblər.
Tədbir 20 Yanvar hadisələrini əks etdirən videofilmin nümayişi ilə davam edib.

Paylaş:

Baxılıb: 992 dəfə