“Gənc jurnalistlərin ictimai-siyasi mövzular üzrə ixtisaslaşması” layihəsi çərçivəsində növbəti tədbir keçirilib

Bakı:

28 °C

58 %

9 m/s

AZ RU EN

Ana səhifə / Sosial / “Gənc jurnalistlərin ictimai-siyasi mövzular üzrə ixtisaslaşması” layihəsi çərçivəsində növbəti tədbir keçirilib

“Gənc jurnalistlərin ictimai-siyasi mövzular üzrə ixtisaslaşması” layihəsi çərçivəsində növbəti tədbir keçirilib

23.09.2015 [10:24]

Dünən Gənc Politoloqlar Mərkəzinin Azərbaycan Respublikasının Prezidenti yanında Gənclər Fondunun maliyyə dəstəyi ilə “Gənc jurnalistlərin ictimai-siyasi mövzular üzrə ixtisaslaşması” layihəsi çərçivəsində növbəti tədbir keçirilib. Tədbiri giriş sözü ilə açan layihə rəhbəri Elşən Orucov layihə haqqında iştirakçılara ətraflı məlumat verib. O, layihənin əsas məqsədinin hüquqi-demokratik cəmiyyətin fəal iştirakçısı olan gənclərin siyasi, hüquqi təhsil və biliklərinin artırılmasına və təkmilləşdirilməsinə dəstək olmaqdan ibarət olduğunu bildirib. Layihə rəhbəri, həmçinin, layihənin əsas vəzifəsinin məhz gənclərin ideya-siyasi və mənəvi tərbiyəsində mühüm rol oynayan peşəkar jurnalistlərin yetişməsinə kömək etməkdən ibarət olduğunu da söyləyib: “Layihədən faydalananlar ali məktəbi bitirmiş və KİV sahəsində çalışan, ictimai-siyasi mövzularda reportajlar hazırlayan gənc jurnalistlər olacaqlar. Gənc jurnalistlər əsasən sosial şəbəkələrdə təbliğat aparmaqla, ali məktəblərə və müxtəlif KİV-lərə göndərilən məktublar və həmçinin, onlara verilən elanlar vasitəsi ilə cəlb olunacaqlar. Layihədən 100-dən artıq gənc jurnalist faydalana biləcək. Layihə çərçivəsində gənc jurnalistlərin ixtisaslarının artırılması üçün müxtəlif treninqlər, konfranslar, diskussiyalar, eləcə də viktorinaların keçirilməsi nəzərdə tutulub”.
Daha sonra Odlar Yurdu Universitetinin rektoru, professor Əhməd Vəliyev çıxış edərək ölkəmizin müstəqillik əldə etdikdən sonra qısa müddət ərzində iqtisadi, siyasi və mənəvi sahələrdə çox böyük uğurlar əldə etdiyini vurğulayıb. O, ölkəmizin qarşısında duran daxili və xarici məsələlərin həlli və vətəndaşların dövlət quruculuğu prosesində aktiv iştirakını təmin etmək üçün ideya-siyasi təbliğat işlərinin daha da artırılmasına böyük ehtiyac olduğunu söyləyib. Bu baxımdan, layihənin olduqca əhəmiyyətli olduğunu deyən Əhməd Vəliyev gənc jurnalistlərin bu layihə çərçivəsində daha da təkmilləşəcəyini, eyni zamanda, onlar üçün faydalı ola biləcəyini də bildirib.
Dünya Azərbaycanlıları Milli Birliyinin sədri Cavad Derəxti də layihənin əhəmiyyəti barədə məlumat verərək vətənpərvər, dövlətə və xalqa sədaqətli olan gənc jurnalistlərə bu gün daha çox ehtiyac olduğunu bilidirib. O, həmçinin ictimai-siyasi mövzular üzrə aktuallıq kəsb edən problemlər barədə mütəmadi olaraq gənc jurnalistlərin ixtisasının artırılmasına da ciddi ehtiyac olduğunu qeyd edib. Bu baxımdan, layihənin olduqca faydalı ola biləcəyini deyən Cavad Derəxti müxtəlif KİV-lərdə çalışan jurnalistləri bu layihəyə dəstək olmağa çağırıb.
Çıxışlarda həmçinin layihə çərçivəsində görüləcək işlər barədə ətraflı məlumat verilib. Bildirilib ki, 100-dən artıq KİV nümayəndələrinin qatılacağı layihə çərçivəsində gənc jurnalistlər üçün layihənin ilk ayı ərzində jurnalistika, siyasi elmlər, politologiya və hüquq sahəsində tanınmış alimlərin və ekspertlərin iştirakı və rəhbərliyi ilə müxtəlif mövzularda seminar-treninqlər keçiriləcək.
Qeyd edək ki, layihənin üç ay müddətində başa çatdırılması nəzərdə tutulub. Layihə çərçivəsində növbəti tədbirin isə İsmayıllıda keçirilməsi nəzərdə tutulub.
Daha sonra tədbir diskussiya formasında davam etdirilib.
Vüsalə CAVANŞİR

Paylaş:

Baxılıb: 868 dəfə