Tərtərdə seçki hüququ üzrə ixtisaslaşdırılmış kurslar başlayıb

Bakı:

23 °C

49 %

2 m/s

Əlaqə

AZ RU EN

Ana səhifə / Sosial / Tərtərdə seçki hüququ üzrə ixtisaslaşdırılmış kurslar başlayıb

Tərtərdə seçki hüququ üzrə ixtisaslaşdırılmış kurslar başlayıb

20.02.2018 [10:03]

Fevralın 19-da 95 saylı Tərtər seçki dairəsi dairə seçki komissiyasında (DSK) aşağı seçki komissiyalarının katibləri, üzvləri və məntəqə seçki komissiyalarının sədrləri üçün seçki hüququ üzrə ixtisaslaşdırılmış kurslara başlanılıb. Kurslar Azərbaycan Prezidentinin 2011-ci il 27 dekabr tarixli Sərəncamı ilə təsdiq edilmiş “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı” əsasında dairə seçki komissiyalarının üzvləri və məntəqə seçki komissiyalarının sədrlərinin maarifləndirilməsi məqsədilə təşkil olunub.
AZƏRTAC-ın bölgə müxbiri xəbər verir ki, dairə seçki komissiyasının 9 üzvünün, 38 seçki məntəqəsi sədrinin, habelə qaçqın və köçkün rayonların seçki məntəqələri sədrlərinin iştirak etdikləri kursun ilk günündə Tərtər Rayon İcra Hakimiyyəti başçısının müavini Ramiz Şabanov “Seçici siyahıları ilə işin aparılması, seçkiqabağı təşviqatın aparılmasına şərait yaradılması, bildirişlərin seçicilərə çatdırılması və s. bu kimi istiqamətlərdə yerli icra və bələdiyyə qurumlarının rolu və onların seçki komissiyaları ilə səmərəli qarşılıqlı əlaqələrinin qurulması” mövzusunda məruzəsi dinlənilib.
Kursda Tərtər Rayon Məhkəməsinin hakimi Mübariz Məmmədov çıxış edərək, seçkidə iştirak hüququ və onun təminatının qanunvericilik əsasları, aşağı seçki komissiyaları və məhkəmələr tərəfindən seçki hüququnun qorunması mexanizmləri, həmçinin vətəndaşların Konstitusiyada təsbit olunmuş hüquqları barədə ətraflı danışıb.
95 saylı Tərtər seçki dairəsi DSK-nın sədri Həmid Mehdiyev DSK üzvləri və məntəqə seçki komissiyalarının sədrlərinin peşəkarlıq səviyyəsinin yüksəldilməsi və seçki hüququ ilə bağlı biliklərinin artırılması baxımından kursların əhəmiyyətini yüksək qiymətləndirib. Bildirib ki, kurslar komissiya üzvlərinin maarifləndirilməsi məqsədi daşımaqla yanaşı, həm də onların siyasi biliklərinin artırılmasında, həyata keçirdikləri hər bir seçki hərəkətinə məsuliyyətlə yanaşmalarında, seçkilərin demokratik və şəffaf keçirilməsində mühüm rol oynayır.
Kurs çərçivəsində keçirilən seminarda DSK-nın sədri seçici siyahıları ilə iş qaydası barədə geniş məlumat verib, mövzular ətrafında fikir mübadiləsi aparılıb.
Fevralın 19-da 48 saylı Yevlax, 49 saylı Yevlax-Mingəçevir, 81 saylı Beyləqan, 82 saylı Ağcabədi, 83 saylı Ağcabədi-Füzuli, 84 saylı Füzuli, 93 saylı Bərdə şəhər, 94 saylı Bərdə kənd, 118 saylı Ağdam şəhər, 119 saylı Ağdam kənd, 121 saylı Laçın seçki dairəsi dairə seçki komissiyalarında da müvafiq ixtisaslaşdırılmış kurslara start verilib.

Paylaş:

Baxılıb: 480 dəfə