Şəkidə “Azərbaycan Respublikasının Prezidenti İlham Əliyev multikulturalizmin Azərbaycan modeli haqqında” kitabının təqdimatı keçirilib

Bakı:

17 °C

88 %

3 m/s

AZ RU EN

Ana səhifə / Sosial / Şəkidə “Azərbaycan Respublikasının Prezidenti İlham Əliyev multikulturalizmin Azərbaycan modeli haqqında” kitabının təqdimatı keçirilib

Şəkidə “Azərbaycan Respublikasının Prezidenti İlham Əliyev multikulturalizmin Azərbaycan modeli haqqında” kitabının təqdimatı keçirilib

24.05.2018 [17:31]

Müasir dövrdə Azərbaycan multikulturalizmin əsas mərkəzlərindən birinə çevrilib. Multikulturalizm Azərbaycan xalqının həyat tərzi və dövlət siyasətidir. Multikulturalizmin ölkəmizdə dövlət siyasəti kimi formalaşması ulu öndər Heydər Əliyevin adı ilə bağlıdır. Bu siyasət müasir dövrdə dövlətimizin başçısı İlham Əliyev tərəfindən uğurla həyata keçirilir.

AZƏRTAC-ın bölgə müxbiri xəbər verir ki, bu fikirlər mayın 23-də Şəki şəhərində “Azərbaycan Respublikasının Prezidenti İlham Əliyev multikulturalizmin Azərbaycan modeli haqqında” kitabının təqdimat mərasimində səsləndirilib.

Təqdimat və ictimai müzakirədə Balakən, Zaqatala, Qax, Şəki, Oğuz və Qəbələ rayonlarının nümayəndələri iştirak ediblər.

Tədbir iştirakçıları əvvəlcə ümummilli lider Heydər Əliyevin şəhər icra hakimiyyətinin binası qarşısında ucaldılan abidəsi önünə gül dəstələri düzərək xatirəsini ehtiramla anıblar.

Azərbaycan, rus və ingilis dillərində nəşr olunan kitabda Prezident İlham Əliyevin 2003-cü ildən bəri müsahibə və çıxışlarında multikulturalizmin Azərbaycan modeli haqqında dəyərli fikirləri toplanıb. Nəşrdə dövlətimizin başçısının təşəbbüsü və rəhbərliyi ilə ölkəmizin multikulturalizmin, o cümlədən mədəniyyətlərarası və dinlərarası dialoqun inkişafı sahəsində həyata keçirdiyi layihələrdən, həm ölkə daxilində, həm də beynəlxalq miqyasda bu sahədə əldə edilən nailiyyətlərdən geniş bəhs olunur.

Kitabın ideya müəllifi Azərbaycan Respublikası Prezidenti Administrasiyasının rəhbəri, akademik Ramiz Mehdiyev, məsləhətçisi Azərbaycan Prezidentinin ictimai-siyasi məsələlər üzrə köməkçisi, tarix elmləri doktoru, professor Əli Həsənov, tərtibçiləri Prezident Administrasiyasının millətlərarası münasibətlər, multikulturalizm və dini məsələlər şöbəsinin müdiri, fəlsəfə elmləri doktoru, professor Etibar Nəcəfov, Bakı Beynəlxalq Multikulturalizm Mərkəzinin Himayəçilik Şurasının sədri, akademik Kamal Abdulla, AZƏRTAC-ın baş redaktoru, siyasi elmlər üzrə fəlsəfə doktoru Cavid Bədəlov və Bakı Beynəlxalq Multikulturalizm Mərkəzinin şöbə müdiri Sərxanbəy Xuduyevdir.

Tədbirdə çıxış edən Şəki Şəhər İcra Hakimiyyətinin başçısı Elxan Usubov bildirib ki, bu gün Azərbaycan dünyanın əsas multikulturalizm mərkəzlərindən biri kimi tanınır. Azərbaycan dövlətinin həyata keçirdiyi tolerantlıq siyasəti ölkədə yaşayan etnik və dini icmalar arasında dostluğun və qardaşlığın daha da möhkəmlənməsinə zəmin yaradır. Bütün bunlar ulu öndər Heydər Əliyevin əsasını qoyduğu və hazırda Prezident İlham Əliyev tərəfindən davam və inkişaf etdirilən siyasətin nəticəsidir.

Bakı Beynəlxalq Multikulturalizm Mərkəzinin analitika şöbəsinin müdiri Rəşad İlyasov Mərkəzin fəaliyyəti, həyata keçirdiyi layihələr barədə ətrafı məlumat verib. Qeyd edilib ki, Prezident İlham Əliyevin rəhbərliyi ilə aparılan multikulturalizm siyasəti ölkə daxilində inteqrasiya proseslərini möhkəmləndirir. Beynəlxalq müstəvidə isə bu siyasət mədəniyyətlərarası və dinlərarası dialoqun inkişafına güclü təsir göstərir. Prezident İlham Əliyevin təşəbbüsü ilə 2016-cı ilin ölkəmizdə “Multikulturalizm İli”, 2017-ci ilin isə “İslam Həmrəyliyi İli” elan edilməsi multikulturalizm siyasətinə dövlətin böyük önəm verməsinin bariz nümunəsidir.

Bildirilib ki, ölkəmizdə multikulturalizm artıq alternativi olmayan həyat tərzinə çevrilib. Bu gün dünyada çoxmədəniyyətli ölkə imici qazanmış Azərbaycanda müxtəlif xalqlar arasında ənənəvi dostluq və qardaşlıq münasibətlərinin, tolerantlığın hökm sürməsi tarixi nailiyyətimizdir. Ölkəmizdə yaşayan müxtəlif xalqlara öz milli mənəvi dəyərlərini, dini etiqadını, adət-ənənələrini qoruyub saxlamaq, dil və mədəniyyətini inkişaf etdirmək üçün demokratik şəraitin təmin edilməsi Azərbaycanı dünya ölkələri üçün tolerantlıq örnəyinə çevirib.

Azərbaycan Milli Elmlər Akademiyasının Memarlıq və İncəsənət İnstitutunun direktoru, AMEA-nın müxbir üzvü Ərtegin Salamzadə Azərbaycan dövlətinin multikulturalizm siyasəti sahəsində əldə etdiyi uğurlardan danışıb. Bildirilib ki, bu siyasət dünya dövlətləri, ölkəmizə gələn qonaqlar tərəfindən də etiraf edilir və yüksək qiymətləndirilir. Bütün dünyada Azərbaycanın multikulturalizm və tolerantlıq sahəsindəki təcrübəsinə artan maraq, bəzi xarici siyasətçilərin dedikləri kimi, ölkəmizin neft və təbii qazla bərabər tolerantlığı da ixrac edən dövlət imicinin qazanmasına səbəb olub.

Ərtegin Salamzadə deyib: “Bu gün təqdimatına toplaşdığımız kitabın işıq üzü görməsi Azərbaycanın siyasi və mədəni həyatında vacib, tarixi bir hadisədir. Dövlətimizin başçısının çıxış və müsahibələrində multikulturalizm Azərbaycan xalqının formalaşmasında vacib amil kimi, Azərbaycan cəmiyyətinin həyat tərzi kimi dayanır. Multikulturalizm dövlətimizin daxili və xarici siyasətinin dünyagörüşü, fəlsəfi əsasıdır. Multikulturalizm, onun Azərbaycan modeli dərin, hərtərəfli təhlilə ehtiyacı olan bənzərsiz sosial təcrübədir və dünyanın bir çox ölkələri üçün nümunədir”.

Tədbirdə Dini Qurumlarla İş üzrə Dövlət Komitəsinin Şəki bölgəsi üzrə müdiri vəzifəsini icra edən Taleh Abdullayev və Şəki rayonunun Daşüz kənd tam orta məktəbinin tarix müəllimi Sevinc İsaqova çıxış edərək, kitabın əhəmiyyətindən, o cümlədən dövlət siyasəti olaraq Azərbaycanda multikulturalizmin təbliğ və təşviqindən bəhs ediblər.

Qeyd edək ki, siyasətçilər, ölkəşünaslar, mədəniyyətşünaslar, tarixçilər və geniş oxucu kütləsi üçün nəzərdə tutulan bu kitaba daxil olan sitatlar Azərbaycan Respublikasının Prezidenti İlham Əliyevin AZƏRTAC tərəfindən yayılmış nitqlərindən, çıxışlarından və müsahibələrindən götürülüb.

Paylaş:

Baxılıb: 444 dəfə