Bakıda regional tranzitin inkişaf məsələlərinə dair seminar keçirilir

Bakı:

27 °C

48 %

3 m/s

Əlaqə

AZ RU EN

Ana səhifə / Sosial / Bakıda regional tranzitin inkişaf məsələlərinə dair seminar keçirilir

Bakıda regional tranzitin inkişaf məsələlərinə dair seminar keçirilir

14.11.2018 [10:02]

Noyabrın 13-də Ümumdünya Gömrük Təşkilatının (ÜGT) Bakı şəhərindəki Potensialın Gücləndirilməsi üzrə Avropa Regional Ofisində ÜGT-nin Avropa və Asiya-Sakit Okean üzrə Regional Tranzit Seminarı öz işinə başlayıb.
Dövlət Gömrük Komitəsinin mətbuat və ictimaiyyətlə əlaqələr idarəsindən AZƏRTAC-a bildirilib ki, tədbirdə Azərbaycan da daxil olmaqla Türkiyə, Rusiya, Almaniya, Monteneqro, Serbiya, Makedoniya, Belarus, Çin, Gürcüstan, İran, Qazaxıstan, Qırğızıstan, Moldova, Monqolustan, Pakistan, eləcə də bir sıra beynəlxalq təşkilatlar - Asiya İnkişaf Bankı, Avropa Komissiyası, BMT İP və Ümumdünya Gömrük Təşkilatının nümayəndələrinin iştirakı ilə “Tranzit əməliyyatlar üzrə təlimat” sənədinin icra vəziyyəti müzakirə edilir.
Seminarın açılış mərasimində çıxış edən Azərbaycan Respublikası Dövlət Gömrük Komitəsinin sədrinin müavini, gömrük xidməti general-mayoru Cavad Qasımov bildirib ki, yüklərin sürətli, maneəsiz və təhlükəsiz daşınması beynəlxalq ticarətin əsas amillərindən biridir və tranzit ölkələr bu istiqamətdə mühüm rola malikdir.
Ölkələrin, o cümlədən Azərbaycanın iqtisadi inkişafında tranzitin əhəmiyyətinə toxunan komitə sədrinin müavini gömrük orqanlarının tranzit əməliyyatlarının sadələşdirilməsi və tənzimlənməsində mühüm rol oynadığını diqqətə çatdırıb. Qeyd edilib ki, coğrafi mövqe baxımından Azərbaycanın “Şimal-Cənub” və “Şərq-Qərb” nəqliyyat dəhlizləri üzərində yerləşməsi ölkənin tranzit potensialının inkişafı üçün münbit şərait yaradır. Prezident İlham Əliyevin imzaladığı müvafiq Sərəncama əsasən, Azərbaycandan keçən tranzit dəhlizlərinin səmərəliliyinin və rəqabətqabiliyətliliyinin artırılması, yükdaşımaların sürətləndirilməsi, risk analizlərinin tətbiqi hesabına sərhədkeçmə prosedurlarının sadələşdirilməsi məqsədilə gömrük orqanları bir sıra tədbirlər həyata keçirir. Hazırda Azərbaycanın Avropa məkanında tətbiq edilən Yeni Kompüterləşdirilmiş Tranzit Sistemində (NCTS) qeyri-formal müşahidəçi statusunu daşıdığı və tam üzvlük istiqamətində mühüm addımlar atıldığı diqqətə çatdırılıb.
Ümumdünya Gömrük Təşkilatının Bakı şəhərindəki Potensialın Gücləndirilməsi üzrə Avropa Regional Ofisinin nümayəndəsi Aydın İmaşev seminarın əhəmiyyətindən bəhs edib və müzakirə olunacaq məsələlərin regional tranzitin inkişafına mühüm töhfələr verəcəyinə əminliyini ifadə edib.
ÜGT-nin eksperti Vyara Filipova təlimin təşkilində göstərilən dəstəyə görə Dövlət Gömrük Komitəsinin rəhbərliyinə təşəkkürünü bildirib, təmsil etdiyi qurumun region ölkələrinin tranzit potensialının inkişafına, bu istiqamətdə biliklərin artırılmasına, qabaqcıl təcrübələrin öyrənilməsinə daim yardım edəcəyini söyləyib.
Çin Xalq Respublikası gömrük xidmətinin nümayəndəsi Vaven Pan beynəlxalq ticarətin davamlılığının və səmərəliliyinin təmin olunması məqsədilə görülən işlər barədə məlumat verib, seminarın tranzitin inkişafında region ölkələrinin rolunun artırılmasında mühüm rol oynayacağını və təmsil etdiyi qurumun bu istiqamətdə lazımi dəstək göstərəcəyini deyib.
Seminar noyabrın 15-dək davam edəcək. Bu müddət ərzində seminarda ÜGT-nin ekspertləri Vyara Filipova, Fərid Vəliyev və iştirakçı ölkələrin nümayəndələri tranzit əməliyyatlar üzrə təlimat, tranzit üzrə hüquqi çərçivə, gömrük tranziti üzrə Avropa İttifaqının Gömrük Məcəlləsi çərçivəsində anlayış, Pakistanın tranzit sistemi və təcrübəsi, informasiya-kommunikasiya texnologiyaları (İKT) və səmərəli məlumatın idarə edilməsi, NCTS - tranzitin təhlükəsizliyi, tranzit zamanı İKT-dən istifadə, tranzit sistemlərinin elektronlaşdırılması, Türkiyə təcrübəsi və layihələri, zəmanət sistemi, e-TIR zəmanət konsepsiyası ilə bağlı təqdimatlarla çıxış edəcək.

Paylaş:

Baxılıb: 514 dəfə