Almaniya Beynəlxalq Əməkdaşlıq Cəmiyyəti jurnalistlər üçün növbəti təlim-seminar keçirib

Bakı:

22 °C

88 %

2 m/s

Əlaqə

AZ RU EN

Ana səhifə / Sosial / Almaniya Beynəlxalq Əməkdaşlıq Cəmiyyəti jurnalistlər üçün növbəti təlim-seminar keçirib

Almaniya Beynəlxalq Əməkdaşlıq Cəmiyyəti jurnalistlər üçün növbəti təlim-seminar keçirib

11.02.2019 [17:20]

KİV təmsilçilərinin qatıldıqları budəfəki seminar-təlim "Əlilliyi olan şəxslərin hüquqları: Qanunvericilik və onun tətbiqi" mövzusuna həsr olunub
Almaniya Beynəlxalq Əməkdaşlıq Cəmiyyətinin (GİZ) "Cənubi Qafqazda Avropa standartlarına hüquqi yaxınlaşma" regional proqramı çərçivəsində 9-10 fevral tarixlərində Şabran rayonundakı Qalaaltı sanatoriyasında jurnalistlər üçün növbəti seminar-təlim keçirilib. Ölkəmizin aparıcı KİV-lərinin təmsilçilərinin qatıldıqları budəfəki seminar-təlim "Əlilliyi olan şəxslərin hüquqları: Qanunvericilik və onun tətbiqi" mövzusuna həsr olunub.
İki gün davam edən təlimin açılış mərasimində çıxış edən Almaniya Beynəlxalq Əməkdaşlıq Cəmiyyətinin əməkdaşı Şakir Səfərbəyov öncə "Cənubi Qafqazda Avropa standartlarına hüquqi yaxınlaşma" regional proqramının məqsəd və vəzifələri, həmçinin bu proqram çərçivəsində təşkil edilən seminarların əhəmiyyəti barədə ətraflı məlumat verib. Bu vaxta kimi GİZ tərəfindən jurnalistlər üçün "Mülkiyyət hüququnun müdafiəsi", "Media və uşaq hüquqları: uşaqlar haqqında informasiya hazırlanmasının şərtləri", "Gender hüququ: Gender balansın təşviq edilməsində medianın rolu", "İnformasiya əldə etmək hüququ", "Şəhərsalma və Tikinti Məcəlləsinin tətbiqi məsələləri", "Azərbaycanda İnzibati hüquq" və digər mövzularda seminarların təşkil edildiyini deyən Şakir Səfərbəyov, eyni zamanda, bir sıra mövzularla bağlı KİV təmsilçiləri üçün yazı müsabiqələrinin keçirildiyini də bildirib.
Təmsil etdiyi təşkilat seminarların mövzularını müəyyən edərkən jurnalistlərin də fikirlərini nəzərə aldığını deyən Şakir Səfərbəyov gələcəkdə də media nümayəndələrini maraqlandıran mövzularda təlim-seminarların davam etdiriləcəyini bildirib.

Sonra seminarın məruzəçisi, Vətəndaşların Əmək Hüquqlarını Müdafiə Liqası İcraiyyə Komitəsinin sədri, vəkil Sahib Məmmədov "Əlilliyi olan şəxslərin hüquqları: Qanunvericilik və onun tətbiqi" mövzusunda ətraflı məlumat verib. Sahib Məmmədov təlimin birinci günü əlillik, beynəlxalq və milli normalarda əks olunan anlayışlar, əlilliyin dərki, etiket və davranış qaydaları, əlilliyi olan şəxslərin hüquqları haqqında BMT Konvensiyası və milli qanunvericilik, əlilliyi olan şəxslərin əmək bazarına çıxışı və məşğulluqlarının təmin olunması istiqamətində məlumatları diqqətə çatdırıb. BMT-nin sözügedən Konvensiyasının qəbulunu şərtləndirən amillər haqqında danışan Sahib Məmmədov bildirib ki, dünya əhalisinin təqribən 650-800 milyon nəfəri və ya 10-12 faizi əlilliyi olan şəxslərdir. Qadınlar arasında olan əlillik isə kişilərə nisbətən daha çoxdur. Küçə uşaqlarının isə 30 faizdən çoxu əlildir. Maraqlıdır ki, inkişaf etməkdə olan ölkələrdə yaşayan əlilliyi olan uşaqların 90 faizi təhsil ala bilmir. Bütün əlilliyi olanların 368 milyon nəfəri əmək qabiliyyəti olsa da, onların 80 faizə qədəri işsizdir. O da qeyd edildi ki, ÜST-nin məlumatına görə, əlilliyin dörddə biri yaralanmaq və ya zorakılıq nəticəsində sonradan əldə edilir. Tədqiqatlara görə, əlilliyi olan uşaqlar öz sağlam həmyaşıdlarına nisbətən 1,7 dəfə daha çox zorakılıq qurbanı olurlar.

Eyni zamanda, təlimin mövzusuna aid sənədli film nümayiş olunub.
Təlimin ikinci günündə isə S.Məmmədov əlilliyi olan şəxslərin fundamental və sosial hüquqlarının təminatı, müyəssərlik və əlverişli mühit barədə media mənsublarına ətraflı məlumat verib. Günün sonunda təlim iştirakçıları əlilliyi olan şəxslər, o cümlədən əlilliyi olan uşaqlar mövzusunda kiçik esselər hazırlayıb və təqdim ediblər.
Qeyd edək ki, qarşılıqlı fikir mübadiləsi şəraitində keçən təlimin hər iki günündə jurnalistləri maraqlandıran suallar da ətraflı cavablandırılıb.
Nadir AZƏRİ

Paylaş:

Baxılıb: 713 dəfə