Korrupsiyaya qarşı mübarizə sahəsində beynəlxalq təşkilatlarla əməkdaşlıq uğurla davam etdirilir

Bakı:

22 °C

94 %

3 m/s

Əlaqə

AZ RU EN

Ana səhifə / Sosial / Korrupsiyaya qarşı mübarizə sahəsində beynəlxalq təşkilatlarla əməkdaşlıq uğurla davam etdirilir

Korrupsiyaya qarşı mübarizə sahəsində beynəlxalq təşkilatlarla əməkdaşlıq uğurla davam etdirilir

19.04.2019 [10:09]

Azərbaycan Respublikasının Prezidenti İlham Əliyev tərəfindən həyata keçirilən islahatlar çərçivəsində ölkəmizdə beynəlxalq standartlar səviyyəsində mütərəqqi antikorrupsiya qanunvericiliyi formalaşdırılmaqla yanaşı, dövlətimizin bu sahədə beynəlxalq əlaqələri daim inkişaf etdirilir.
Baş Prokurorluğun mətbuat xidmətindən AZƏRTAC-a bildiriblər ki, səmərəli əməkdaşlıq əlaqələrinin davamı olaraq, aprelin 17-də Moskvada “Hakimlər və prokurorların fəaliyyətində maraqlar toqquşmasının qarşısının alınması və korrupsiyaya qarşı mübarizənin təmin edilməsi” mövzusunda beynəlxalq konfrans keçirilib.
Avropa Şurasının İnsan Hüquqları və Qanunun Aliliyi Baş İdarəsinin, Korrupsiyaya Qarşı Mübarizə Aparan Dövlətlər Qrupunun (GRECO), Beynəlxalq Prokurorlar Assosiasiyası (IAP), Rusiya Federasiyası Baş Prokurorluğunun, Xarici İşlər Nazirliyinin və Moskva Beynəlxalq Əlaqələr Dövlət İnstitutunun birgə təşkilatçılığı ilə keçirilən tədbirdə IAP-ın vitse-prezidenti qismində Assosiasiyanı təmsil edən baş prokurorun müavini - Baş Prokuror yanında Korrupsiyaya Qarşı Mübarizə Baş İdarəsinin rəisi Kamran Əliyevin rəhbərliyi ilə nümayəndə heyəti iştirak edib.
Rusiya Federasiyası baş prokurorunun birinci müavini Aleksandr Busmanın, Avropa Şurasının İnsan Haqları və Qanunun Aliliyi Baş İdarəsinin baş direktoru Xristos Yukomolosun, GRECO-nun prezidenti Marin Mrçelanın və digər ali vəzifəli nümayəndələrin iştirak etdikləri tədbirin yüksəksəviyyəli hissəsində çıxış edən Kamran Əliyev Rusiya Federasiyası Baş Prokurorluğunun Beynəlxalq Prokurorlar Assosiasiyasının işinə verdiyi töhfələrin, eləcə də Assosiasiyanın rəsmi saytının Azərbaycan Respublikasının Baş Prokurorluğu tərəfindən aparılan rus dili versiyasının hazırda Rusiya Federasiyasının Prokurorluğu tərəfindən davam etdirilməsinin qurum tərəfindən yüksək qiymətləndirildiyini vurğulayıb.
Bununla yanaşı, Kamran Əliyev ölkəmizdə də aparılan sistemli korrupsiyaya qarşı mübarizə siyasəti, Prezident İlham Əliyevin rəhbərliyi ilə həyata keçirilən geniş məhkəmə-hüquq islahatları barədə iştirakçılara məlumat verib, bu siyasətin mühüm hissəsini beynəlxalq tərəfdaşlarla əməkdaşlığın təşkil etdiyini vurğulayıb. Buna bariz nümunə kimi Beynəlxalq Prokurorlar Assosiasiyası ilə Azərbaycan Respublikasının prokurorluq orqanları arasında yüksələn xətt üzrə inkişaf edən səmərəli tərəfdaşlıq münasibətlərinin mövcud olduğu göstərilib.
Kamran Əliyev çıxışında, həmçinin təmsil etdiyi beynəlxalq qurumun maraqlar toqquşmasının qarşısının alınması və korrupsiyaya qarşı mübarizənin təmin olunması istiqamətində fəaliyyətinin təşkili ilə bağlı ümumi məsələlərə də toxunub, iştirakçılara IAP-ın Korrupsiyaya Qarşı Mübarizə üzrə Prokurorlar Şəbəkəsinin (NACP) fəaliyyəti barədə ətraflı məlumat verib.
Tədbir çərçivəsində Azərbaycan nümayəndə heyəti ilə Rusiya Federasiyası baş prokurorunun birinci müavini Aleksandr Busman, Yunanıstan Respublikasının Ali Məhkəməsinin baş prokuroru Kseni Dimitriou-Vasilipolu və digər ölkələrin, habelə bir sıra beynəlxalq təşkilatların təmsilçiləri arasında ikitərəfli görüşlər keçirilib, əməkdaşlığın perspektivləri müzakirə olunub.
Sonda tədbirin proqramına uyğun olaraq dinlənilən məruzələr müzakirə edilib. Müzakirələrdə hakimlərin və prokurorların fəaliyyətində maraqlar toqquşmasının qarşısının alınması və korrupsiyaya qarşı mübarizənin təmin edilməsi istiqamətində səmərəli fikir mübadiləsi aparılıb.
Tədbir çərçivəsində Kamran Əliyev Moskva Beynəlxalq Əlaqələr Dövlət İnstitutunda təhsil alan azərbaycanlı tələbələrlə də görüşərək, onların təhsili ilə maraqlanıb, suallarını cavablandırıb.

Paylaş:

Baxılıb: 794 dəfə