“Azərbaycanşünaslığın aktual problemləri” mövzusunda beynəlxalq elmi konfrans keçirilib

Bakı:

30 °C

58 %

5 m/s

Əlaqə

AZ RU EN

Ana səhifə / Sosial / “Azərbaycanşünaslığın aktual problemləri” mövzusunda beynəlxalq elmi konfrans keçirilib

“Azərbaycanşünaslığın aktual problemləri” mövzusunda beynəlxalq elmi konfrans keçirilib

08.05.2019 [09:26]

Mayın 7-də Bakı Slavyan Universitetində (BSU) Ümummilli Lider Heydər Əliyevin anadan olmasının 96-cı ildönümünə həsr olunan “Azərbaycanşünaslığın aktual problemləri” mövzusunda beynəlxalq elmi konfrans keçirilib.
Əvvəlcə konfrans iştirakçıları Fəxri xiyabana gələrək xalqımızın Ümummilli Lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini dərin ehtiramla yad edib, məzarı önünə əklil qoyublar. Görkəmli oftalmoloq-alim, akademik Zərifə xanım Əliyevanın da xatirəsi ehtiramla anılıb, məzarı üzərinə gül dəstələri düzülüb.
Beynəlxalq elmi konfransda çıxış edən BSU-nun rektoru, professor Nurlana Əliyeva bildirib ki, hər il universitetdə Ümummilli Lider Heydər Əliyevin anadan olmasının ildönümünə həsr olunan silsilə tədbirlər təşkil edilir. Həmin tədbirlərdə xarici ölkələrdən gələn qonaqların, ölkəmizdəki səfirlərin, müxtəlif beynəlxalq təşkilatların nümayəndələrinin, hökumət adamlarının, Milli Məclisin üzvlərinin iştirakı ənənəvi hal alıb. Bugünkü konfransda azərbaycanşünaslığın aktual problemlərinin araşdırılması müasir dövlətçiliyimizin strategiyasının dahi şəxsiyyətin qoyduğu prinsiplərdən kənara çıxmadığının bir göstəricisi kimi dəyərləndirilməlidir.
Rektor bildirib ki, Ümummilli Lider Heydər Əliyev Azərbaycanın bütün istiqamətlərdə sürətli inkişaf strategiyasını yaradıb, dünya dövlətləri arasında ölkəmizin mövqeyini möhkəmləndirən beynəlxalq müqavilələrə imza atıb. Ulu Öndər elm və təhsili müstəqil dövlətimizin prioritet istiqamətinə çevirib. İqtisadi və siyasi böhrandan uğurlu sıçrayış, nəhəng enerji layihələrinin həyata keçirilməsi, qloballaşan yeni dünya və inkişaf etmiş Avropa dəyərlərinin sintez edilərək ölkəmizdə tətbiqi məhz Ümummilli Liderin adı ilə bağlıdır. Görkəmli dövlət xadimi Heydər Əliyevin uzaqgörən siyasəti nəticəsində bu gün Azərbaycanın səsi dünyanın hər yerindən gəlir. Çətin və şərəfli tarixi yol keçən Azərbaycan dövləti bu gün möhkəm təməllər üzərində irəliləyir və böyük tarixi uğurlara imza atır.
Konfransda çıxış edənlər Ümummilli Lider Heydər Əliyevin xalqımız və dövlətimiz qarşısındakı misilsiz xidmətlərindən söz açıb, azərbaycanşünaslığın aktual problemlərinin araşdırılmasında konfransın əhəmiyyətini qeyd ediblər.
Sonra konfrans işini bölmə iclaslarında davam etdirib. “Heydər Əliyev və azərbaycançılıq ideologiyası”, “Müasir beynəlxalq münasibətlər sistemində Azərbaycan”, “Azərbaycan dili və ədəbiyyatının aktual problemləri”, “Azərbaycan tarixi və mədəniyyətinin aktual problemləri”, “İctimai-siyasi elmlərin aktual problemləri” və digər mövzularda davam edən bölmə iclaslarında yerli və xarici alimlərin məruzələri dinlənilib.
Ləman SƏMƏDOVA

Paylaş:

Baxılıb: 850 dəfə