Fərman Salmanov adına Elm və Tədris Mərkəzinin açılış mərasimi keçirilib

Bakı:

19 °C

72 %

3 m/s

Əlaqə

AZ RU EN

Ana səhifə / Sosial / Fərman Salmanov adına Elm və Tədris Mərkəzinin açılış mərasimi keçirilib

Fərman Salmanov adına Elm və Tədris Mərkəzinin açılış mərasimi keçirilib

04.10.2019 [14:52]

Oktyabrın 4-də Azərbaycan Dövlət Neft və Sənaye Universitetində (ADNSU) Fərman Salmanov adına SOCAR-ADNSU Elm və Tədris Mərkəzinin açılış mərasimi keçirilib. Əvvəlcə Mərkəzin önündə əfsanəvi azərbaycanlı geoloqun barelyefi açılıb.

Sonra tədbir iştirakçıları Fərman Salmanov adına SOCAR-ADNSU Elm və Tədris Mərkəzi ilə tanış olublar.

AZƏRTAC xəbər verir ki, universitetin konfrans zalında davam edən tədbirdə

ADNSU-nun rektoru, professor Mustafa Babanlı Fərman Salmanovun həyat yolundan və neft kəşfiyyatı sahəsində xidmətlərindən danışıb.

Tədbirdə çıxış edən Azərbaycan Milli Elmlər Akademiyasının prezidenti, akademik Akif Əlizadə bildirib ki, Fərman Salmanov bütün ömrünü neftə həsr edib. O, Qərbi Sibirdə kəşf etdiyi neft quyuları sayəsində bəşəriyyətə verdiyi töhfəyə görə Azərbaycanın və Rusiyanın sevimli cəfakeşinə çevrilib.

SOCAR-ın birinci vitse-prezidenti, akademik Xoşbəxt Yusifzadə F.Salmanovun neft kəşfiyyatı ilə yanaşı, elmi fəaliyyətini də davam etdirdiyini və SSRİ Elmlər Akademiyasının akademiki seçilməsi kimi böyük nailiyyət qazandığını vurğulayıb.

Rusiyanın Azərbaycandakı səfiri Mixail Boçarnikov ölkəsi üçün son dərəcə əhəmiyyətli olan Qərbi Sibirdə neft-qaz yataqlarını kəşf etmiş F.Salmanovun xatirəsinin rus xalqı tərəfindən hər zaman əziz tutulacağını deyib. Səfir əlavə edib ki, F.Salmanovun xidmətləri təkcə neft tapmaqla bitməyib, onun xidmətləri Rusiya ilə Azərbaycan arasında bu sahədə əməkdaşlığın inkişafına da təsir göstərib.

Daha sonra Azərbaycan Respublikası Ekologiya və Təbii Sərvətlər nazirinin müavini Novruz Quliyev, Rusiyanın Yuqra Dövlət Universitetinin rektoru Tatyana Karminskaya, Xanti-Mansi Muxtar Dairəsinin Duma sədrinin müavini Aleksandr Salnikov, SOCAR-ın Neft-Qaz Elmi-Tədqiqat Layihə İnstitutunun direktor müavini, geologiya-mineralogiya elmləri doktoru Əhməd Salmanov görkəmli geoloqun Sibirdə neft sənayesinin inkişafındakı əvəzsiz xidmətlərindən söz açıb, onun haqqında xatirələrini bölüşüblər. Qeyd olunub ki, Rusiya və Azərbaycanın dövlət başçılarının F.Salmanovun xatirəsinin əbədiləşməsinə ayırdıqları xüsusi diqqət, bu istiqamətdə yeni layihələrin həyata keçirilməsi çox sevindirici haldır və belə yüksək dəstək milyonlarla insanın sevincinə səbəb olub. Bu Mərkəz F.Salmanov kimi mütəxəssislər yetişdirən Azİİ-də bu sahənin inkişafında, görkəmli geoloqun yolunun davam etdirilməsində xüsusi rol oynayacaq.

Tədbirdə ADNSU-nun rektoru, professor Mustafa Babanlı və SOCAR-ın birinci vitse-prezidenti, akademik Xoşbəxt Yusifzadə tərəfindən elm və təhsil sahəsində əməkdaşlığa dair saziş imzalanıb. Saziş çərçivəsində Fərman Salmanov adına SOCAR-ADNSU Elm və Tədris Mərkəzi ən müasir proqram təminatı ilə təchiz olunaraq noyabrın 1-dən tələbələrin ixtiyarına veriləcək.

Daha sonra Prezident İlham Əliyevin “Fərman Salmanovun xatirəsinin əbədiləşdirilməsi haqqında” 2019-cu il 9 iyul tarixli Sərəncamına əsasən, Azərbaycan Dövlət Neft və Sənaye Universitetində təhsil alan, ən yüksək göstəriciləri olan Qaz-neft mədən fakültəsinin 2 tələbəsinə - Aytac Babayevaya və Əmrah Qulubəyliyə Fərman Salmanov adına təqaüd təqdim olunub.

Paylaş:

Baxılıb: 509 dəfə