Mərkəzi Seçki Komissiyası maarifləndirmə proqramı çərçivəsində Gəncədə seminar-müşavirə keçirib

Bakı:

15 °C

94 %

9 m/s

Əlaqə

AZ RU EN

Ana səhifə / Sosial / Mərkəzi Seçki Komissiyası maarifləndirmə proqramı çərçivəsində Gəncədə seminar-müşavirə keçirib

Mərkəzi Seçki Komissiyası maarifləndirmə proqramı çərçivəsində Gəncədə seminar-müşavirə keçirib

03.12.2019 [09:41]

Qarşıdan gələn bələdiyyə seçkiləri ilə əlaqədar Mərkəzi Seçki Komissiyasının (MSK) maarifləndirmə proqramı çərçivəsində polisin xidməti fəaliyyətinin daha da təkmilləşdirilməsi mövzusunda ilk seminar-müşavirə dekabrın 2-də Gəncədə keçirilib.
AZƏRTAC-ın bölgə müxbiri xəbər verir ki, tədbirin keçirilməsində məqsəd seçki prosesində, eləcə də səsvermə günü polisin xidməti fəaliyyətini, polis orqanları ilə seçki komissiyalarının qarşılıqlı fəaliyyətini təkmilləşdirmək, bu istiqamətdə görülmüş işlərin səmərəliliyini daha da yüksəltməkdir.
Seminar-müşavirədə Mərkəzi Seçki Komissiyasının, Daxili İşlər Nazirliyinin əməkdaşları, rayon polis idarələrinin nümayəndələri və dairə seçki komissiyalarının sədrləri iştirak ediblər.
Tədbirdə Gəncə Şəhər Baş Polis İdarəsinin rəisi Əkbər İsmayılovun, Mərkəzi Seçki Komissiyasının üzvləri Bəxşeyiş Əsgərov və İlkin Şahbazovun, Daxili İşlər Nazirliyinin Baş İctimai Təhlükəsizlik İdarəsinin nümayəndəsi Hamlet Hümbətəliyevin çıxışları dinlənilib.
Gəncə Şəhər Baş Polis İdarəsinin rəisi Əkbər İsmayılov bu cür seminar-müşavirələrin polis orqanları ilə seçki komissiyaları arasındakı əməkdaşlıq baxımından mühüm əhəmiyyət daşıdığını deyib. Vurğulanıb ki, vətəndaşlarla yanaşı, polis orqanlarında çalışan əməkdaşların da öz hüquq və səlahiyyətlərini bilməsi həm xidməti fəaliyyəti dövründə qarşılaşdıqları bir sıra problemlərin hüquqi və daha operativ həll edilməsinə, həm də ölkəmizdə keçirilən seçkilərin yüksək səviyyədə başa çatmasına şərait yaradır.
Bəxşeyiş Əsgərov çıxışında seçki qanunvericiliyi, seçki komissiyalarının sistemi, seçki prosesi, onun mərhələləri və müddətləri, seçki komissiyaları və polis orqanlarının birgə fəaliyyətinin əsaslarından danışıb.
Bildirilib ki, bələdiyyə seçkilərinə hazırlıq ərəfəsində Mərkəzi Seçki Komissiyası tərəfindən bu vaxtadək keçirilmiş seçkilərin tarixində müşahidə edilməmiş miqyasda və sayda müxtəlif mövzularda maarifləndirmə tədbirləri keçirilib. Həmin tədbirlərdən biri də daxil olmuş ərizə və şikayətlərə məhkəmə qaydasında baxılması və onların həlli ilə əlaqədar Apellyasiya Məhkəməsinin, Ali Məhkəmənin və Mərkəzi Seçki Komissiyasının ekspert qrupu üzvlərinin birgə keçirdikləri seminar müşavirələr olub. Məhz bu mövzuda keçirilmiş tədbirlər ölkəmizdə insan hüquq və azadlıqlarının təminatı sahəsində reallaşdırılmış ən mühüm addımlardan biridir.
Daxili İşlər Nazirliyinin Baş İctimai Təhlükəsizlik İdarəsinin nümayəndəsi Hamlet Hümbətəliyev seçki kampaniyası dövründə və seçkilərin keçirildiyi gün ictimai qaydanın təmin edilməsi ilə bağlı polis əməkdaşlarının hüquq və vəzifələri, seçkidən sonrakı dövrdə seçki bülletenlərinin və digər seçki sənədlərinin dairə və Mərkəzi Seçki Komissiyasına gətirilməsi zamanı təhlükəsizlik tədbirlərinin görülməsi mövzusunda çıxış edib.
Mərkəzi Seçki Komissiyasının üzvü İlkin Şahbazov çıxışında seçki subyektləri, onların hüquq və vəzifələri, seçki subyektlərinin fəaliyyətinə qanunsuz müdaxilənin yolverilməzliyi haqqında məlumat verib.
Sonda seminar-müşavirə iştirakçılarını maraqlandıran suallar cavablandırılıb.

Paylaş:

Baxılıb: 605 dəfə