Pandemiya şəraitində polisin əsas məqsədi vətəndaşların təhlükəsizliyini və sağlamlığını təmin etməkdir

Bakı:

31 °C

33 %

4 m/s

AZ RU EN

Ana səhifə / Sosial / Pandemiya şəraitində polisin əsas məqsədi vətəndaşların təhlükəsizliyini və sağlamlığını təmin etməkdir

Pandemiya şəraitində polisin əsas məqsədi vətəndaşların təhlükəsizliyini və sağlamlığını təmin etməkdir

12.06.2020 [09:18]

Vüqar Seyidov: Milli birlik və yüksək məsuliyyət xüsusi karantin rejiminin tətbiq edildiyi indiki dövrün əsas tələbidir
“Məlum olduğu kimi, artıq bir neçə aydır ki, dünya yeni təhlükə ilə qarşı-qarşıya qalıb. Hazırda “gözəgörünməz düşmən” adlandırılan yeni növ koronavirus (COVİD-19) infeksiyası ilə mübarizə dünya ölkələrinin əsas gündəmini təşkil edir”. Bu fikirləri Yeni Azərbaycan Partiyası (YAP) Suraxanı rayon təşkilatının sədri Vüqar Seyidov qəzetimizə açıqlamasında deyib.
V.Seyidovun sözlərinə görə, dünyada vəziyyətin o qədər də ürəkaçan olmamasına baxmayaraq, dövlətimiz tərəfindən bu infeksiyanın geniş yayılmasının qarşısının alınması üçün bütün təxirəsalınmaz işlər görülüb və görülməkdədir: “İnfeksiyaya ilk yoluxma qeydə alındığı vaxtdan etibarən ölkəmizdə Prezident İlham Əliyevin müvafiq qərarları, tapşırıq və göstərişlərinə uyğun olaraq lazımi addımlar atılıb. Xüsusi karantin müddətində evdə qalan vətəndaşlar Prezident İlham Əliyevin və Birinci vitse-prezident Mehriban Əliyevanın müvafiq göstərişləri əsasında lazımi sosial dəstəklə təmin olunublar”.
YAP Suraxanı rayon təşkilatının sədri bildirib ki, Azərbaycan sosialyönümlü dövlət olduğunu pandemiya dövründə də sübut edib: “Ölkəmiz bir çox sahələrdə olduğu kimi, əhalinin sosial müdafiəsinin təmin edilməsi istiqamətində də böyük uğurlar qazandığını bu ağır günlərdə bir daha nümayiş etdirib. İşləyən vətəndaşların əməkhaqqı ödənilməklə növbədənkənar məzuniyyətə buraxılması, 600 min işsiz vətəndaşa iki aylıq 190 manat məbləğində birdəfəlik ödənişlərin verilməsi, sahibkarlara vergi güzəştlərinin tətbiq edilməsi, ödənilmiş vergilərin bir qisminin geri qaytarılması postpandemiya dövründə vətəndaşların yenidən öz normal həyatlarına qayıtması üçün dövlətin atdığı mühüm addımlardandır”.
V.Seyidov deyib ki, bu günlər hər birimiz üzərimizə düşən məsuliyyəti dərk etməliyik: “İki aylıq xüsusi karantin rejimindən az itki ilə çıxsaq da, vətəndaşlarımızdan bəziləri yumşaldılma dövrünə keçiddən sonra bütün xəbərdarlıqlara rəğmən, karantin qaydalarına, sosial məsafə saxlama və qoruyucu tibb vasitələrdən istifadə məsələsinə laqeyd yanaşırlar. Dövlət başçısının Özü qapalı yerlərdə tibbi maska taxaraq nümunə olmasına baxmayaraq, bəzi insanlar həm öz səhhətlərini, həm də cəmiyyətin sağlamlığını təhlükəyə atırlar”.
“İkigünlük sərtləşdirilmiş karantin rejimi də göstərdi ki, bəziləri Azərbaycan cəmiyyətinin birliyinə, həmrəyliyinə kölgə salmağa cəhd edir, böyük fədakarlıqlarla xalqımıza xidmət edən polislərə qarşı təhlükəli addımlara yol verirlər” deyən Vüqar Seyidov həmçinin bildirib ki, ölkədə ictimai asayişi, insanların təhlükəsizliyini təmin edən qüvvə Azərbaycan polisidir: “Heç kimə imkan vermək olmaz ki, Azərbaycan Respublikasının dövlətçilik atributlarını öz şərəfli formalarında daşıyan polislərə qarşı qanunazidd addımlar atsın. Unutmaq olmaz ki, karantin dövründə polisin əsas məqsədi vətəndaşların təhlükəsizliyi və sağlamlığını təmin etməkdir. Ona görə də cəmiyyət bu bəladan xilas olana qədər bir-birimizin qayğısına qalmalıyıq”, - deyə o bildirib.
Vüqar Seyidov sonda onu da əlavə edib ki, əsası Ümummilli Lider Heydər Əliyev tərəfindən qoyulmuş milli birliyin, dövlət-vətəndaş həmrəyliyinin, xalq-iqtidar birliyinin nə qədər güclü təməllərə malik olduğunu karantin günlərində xalqımız bir daha nümayiş etdirib: “Hər bir vətəndaş öz hüquqlarını bildiyi kimi, vəzifələrinin də fərqinə varıb, dövlətinin və rəhbərinin ətrafında sıx, möhkəm və monolit şəkildə birləşib. Azərbaycan xalqı müdrik xalqdır və indiyə qədər bir çox bəladan məğrur çıxmağı bacarıb. Xalq başa düşür ki, milli birlik və yüksək məsuliyyət xüsusi karantin rejiminin tətbiq olunduğu indiki dövrün əsas tələbidir”.
Qaşqay

Paylaş:

Baxılıb: 364 dəfə