Azərbaycan polisi öz vəzifə borcunu ləyaqətlə yerinə yetirir

Bakı:

16 °C

94 %

5 m/s

Əlaqə

AZ RU EN

Ana səhifə / Sosial / Azərbaycan polisi öz vəzifə borcunu ləyaqətlə yerinə yetirir

Azərbaycan polisi öz vəzifə borcunu ləyaqətlə yerinə yetirir

04.07.2020 [09:49]

102-ci ildönümünü qeyd edən daxili işlər orqanlarının əməkdaşları pandemiya şəraitində də vətəndaşların təhlükəsizliyinin qorunması istiqamətində səmərəli və fədakar fəaliyyət nümunəsi ortaya qoyurlar

İyulun 2-də Azərbaycanda polis orqanlarının yaranmasının 102-ci ildönümü qeyd edilib. Məlum olduğu kimi, Daxili İşlər Nazirliyi və onun təşkilati strukturu olan polis orqanları 1918-1920-ci illərdəki fəaliyyəti dövründə böyük vətənpərvərliklə müstəqil dövlətimizin milli maraqlarının müdafiəsində mühüm rol oynayıblar. Azərbaycan Xalq Cümhuriyyəti süqut etsə də, ölkəmizin hüquq-mühafizə orqanları sovet dövründə də fəaliyyətini davam etdirib, ictimai asayişin qorunmasında yüksək nəticələr və zəngin təcrübə əldə edib.

Ümummilli Lider Heydər Əliyevin SSRİ dövründə respublikamıza rəhbərlik etdiyi dönəm Daxili İşlər Nazirliyinin tarixinə çox mühüm mərhələ kimi düşüb. Bu dövrdə Ulu Öndər böyük uzaqgörənliklə daxili işlər orqanlarının təşkilati və ideoloji cəhətdən möhkəmlənməsi, peşəkar kadrların irəli çəkilməsi ilə bağlı mühüm qərarlar qəbul edib. Şəxsi heyətin məhz milli ruhda formalaşmasının nəticəsi idi ki, 1988-ci ildə Ermənistanın Azərbaycana qarşı hərbi təcavüzünü ilk olaraq dəf edən nizami qüvvə daxili işlər orqanlarının bölmələri olub. Bu döyüşlərdə 1695 polis əməkdaşı və hərbi qulluqçu şəhidlik zirvəsinə ucalıb, 1710 nəfər isə yaralanıb. Göstərdikləri şücaət və igidliklərə görə 67 nəfər Azərbaycanın Milli Qəhrəmanı adına, 1143 nəfər orden və medallara layiq görülüb.

Azərbaycan Respublikası müstəqillik elan etdikdən sonrakı illərdə də daxili işlər orqanlarının fəaliyyəti uğurlu olub. Ümummilli Lider Heydər Əliyevin 1998-ci ildə imzaladığı Fərmanla iyulun 2-si Azərbaycan Polisi Günü elan olunub. Həmin vaxtdan 2 iyul ölkəmizdə Polis Günü kimi qeyd edilir.

Prezident İlham Əliyevin ölkəmizə rəhbərlik etdiyi 17 ilə yaxın müddət ərzində həyata keçirilən hərtərəfli islahatlar çərçivəsində daxili işlər orqanlarının daha da müasirləşməsi üçün bütün lazımi tədbirlər görülüb. Dövlət başçısının diqqət və qayğısı sayəsində davamlı inkişafda olan daxili işlər orqanları ölkədə cinayətkarlığa qarşı mübarizədə, asayişin və təhlükəsizliyin təmin olunmasında mühüm xidmətləri ilə seçilir.

Yeri gəlmişkən qeyd edək ki, son aylarda dünyada geniş yayılmış koronavirus pandemiyası ilə mübarizədə də Azərbaycan polisi üzərinə düşən öhdəlikləri ən yüksək səviyyədə yerinə yetirir, vətəndaşımızın sağlamlığının qorunması üçün gecə-gündüz fasiləsiz xidmət aparır. Buna görə də pandemiya dövründə Azərbaycan polisinin xidmətləri, polis əməkdaşlarının nümunəvi fəaliyyəti yüksək qiymətləndirilir.

Onu da vurğulamaq yerinə düşər ki, polis əməkdaşları pandemiya ilə mübarizə şəraitində xüsusi karantin rejiminin təmin olunması üçün öz peşə borclarını layiqincə yerinə yetirirlər. İctimai asayişi və qanunçuluğu qoruyan polis əməkdaşları əsl fədakarlıq nümayiş etdirir, gücləndirilmiş iş rejimində çalışmaqla yanaşı, sərtl karantin rejiminə nəzarəti yüksək səviyyədə təmin edirlər.

Bir sözlə, hər bir polis əməkdaşı qanun çərçivəsində hərəkət edərək insanların köməyinə çatmaq, onların həyati problemlərinin həllinə yardımçı olmaq, müraciətlərə həssaslıqla yanaşmaq, habelə qanun-qaydaları pozan şəxslərə qarşı mübarizədə qətiyyət nümayiş etdirməklə mühüm funksiya yerinə yetirir.

Qaşqay ZİYƏDDİNOĞLU

Paylaş:

Baxılıb: 489 dəfə