Koronavirusa qarşı mübarizədə həlledici amil vətəndaş məsuliyyətidir

Bakı:

18 °C

82 %

6 m/s

Əlaqə

AZ RU EN

Ana səhifə / Sosial / Koronavirusa qarşı mübarizədə həlledici amil vətəndaş məsuliyyətidir

Koronavirusa qarşı mübarizədə həlledici amil vətəndaş məsuliyyətidir

12.08.2020 [09:06]

Ekspertlərin fikrincə, pandemiyaya qarşı mübarizənin effektiv olması üçün insanlar müəyyən olunmuş qaydalara ciddi riayət etməlidirlər
Azərbaycanda dövləti yeni növ koronavirus (COVID-19) infeksiyasının ölkə ərazisində geniş yayılmasının qarşısını almaq və vətəndaşların sağlamlığını qorumaq üçün ardıcıl və məqsədyönlü tədbirlərini davam etdirir. Bununla yanaşı, ekspertlərin qənaətinə görə, COVİD-19-la mübarizənin səmərəli olması üçün dövlətin gördüyü işlərə ictimai dəstəyin davamlı olması zəruridir. Yəni vətəndaşların üzərinə düşən əsas vəzifə tətbiq olunan müvafiq qaydalara əməl etmək, sosial məsafəni gözləmək və qoruyucu vasitələrdən istifadə etməkdir.
Sanitar-gigiyenik normalara əməl edilməli və tibbi maskadan istifadə olunmalıdır
Məsələ ilə bağlı fikirlərini bölüşən Milli Məclisin deputatı Kamilə Əliyeva deyib ki, yumşalmalardan sonrakı mərhələdə belə karantin rejiminin qaydalarına riayət olunmalıdır. Onun sözlərinə görə, tibbi maskadan istifadə, sosial məsafənin saxlanılması, sanitar-gigiyenik qaydalara riayət olunması mütləq şərtdir: “Unutmaq olmaz ki, pandemiya hələ sona çatmayıb. Koronavirusun yayılması prosesi bütün dünyada tüğyan edir. Bəzi Avropa ölkələrində yenidən sərt karantin rejimi tətbiq olunur. Əgər sərt karantin rejimi şəraitində yaşamaq istəmiriksə, məsuliyyətli olaq və qayda-qanunlara riayət edək. Hazırda sağalanların sayı gündəlik yoluxmanın sayını bir neçə dəfə üstələyir. Hesab edirəm ki, ciddi karantin nəticəsində əhalinin daha çox evdə qalması, kütləvi toplantıların, gəzintilərin olmaması, insanlar arasında yaxın təmasların kəskin azalması bu nəticənin əldə olunmasında mühüm rol oynadı”.
Deputatın sözlərinə görə, hər kəs bilməlidir ki, bütün görülən tədbirlərin müsbət nəticə verməsi üçün vətəndaş məsuliyyəti mühüm əhəmiyyət kəsb edir.
Çimərliklərdə ara məsafəsinin qorunmaması COVİD-19-a yoluxma riskini dəfələlərlə artırır
Tibb üzrə fəlsəfə doktoru Yazgül Abdiyeva isə bildirib ki, hazırda insan kütləsi ilə dolu olan çimərliklər COVİD-19-a yoluxma baxımından ən riskli ərazilər hesab edilə bilər, buna görə də əhali bu amili mütləq nəzərə almalıdır. Onun sözlərinə görə, insanların çox toplaşdığı çimərliklərdə ara məsafənin qorunmaması COVİD-19-a yoluxma riskini dəfələlərlə artırır. İnsanların sıx toplaşdığı çimərliklərə getməyin riskli olduğunu deyən Y.Abdiyeva bildirib ki, çimərliklərlə bağlı istifadəyə verilən “cimerlik.az” saytı bu məkanlardakı son vəziyyəti öyrənmək üçün ən yaxşı imkandır: “Əgər biz öz həyatımızı, eləcə də yaxınlarımızın həyatını qorumaq istəyiriksə, diqqətli olaq və belə məqamları unutmayaq, onlara xüsusi diqqət edək. Bizim kiçik bir səhlənkarlığımız bu virusa yoluxma sayını yenidən artıra bilər”.
“Düzdür, hazırda yoluxma sayı azalır və bu, bizi sevindirir. Ancaq unutmayaq ki, təhlükə hələ bizimlədir və məsuliyyətsiz davranış nəticəsində yoluxma sayı istənilən vaxt arta bilər”, - deyə Yazgül Abdiyeva əlavə edib.
Pərviz SADAYOĞLU

Paylaş:

Baxılıb: 534 dəfə