ADA Universiteti Aİ məsələləri üzrə Bilik Mərkəzinin təşkilatçılığı ilə Regional Enerji Təhlükəsizliyi Simpoziumu keçirilib

Bakı:

19 °C

72 %

2 m/s

AZ RU EN

Ana səhifə / Sosial / ADA Universiteti Aİ məsələləri üzrə Bilik Mərkəzinin təşkilatçılığı ilə Regional Enerji Təhlükəsizliyi Simpoziumu keçirilib

ADA Universiteti Aİ məsələləri üzrə Bilik Mərkəzinin təşkilatçılığı ilə Regional Enerji Təhlükəsizliyi Simpoziumu keçirilib

15.08.2020 [01:05]

ADA Universitetinin Avropa İttifaqı məsələləri üzrə Bilik Mərkəzi ABŞ Hərbi Dəniz Qüvvələrinin Ali Məktəbi (“Naval Postgraduate School’’ - NPS), Azərbaycan Respublikası Dövlət Neft Şirkəti, NATO Enerji Təhlükəsizliyi Bilik Mərkəzi (ENSEC COE) və BP ilə birgə Azərbaycan, Gürcüstan və Türkiyədə enerji və beynəlxalq təhlükəsizlik sahəsində çalışan dövlət qulluqçuları və peşəkarlar üçün avqustun 11-dən 14-dək Regional Enerji Təhlükəsizliyi Simpoziumu keçirib. Mövcud pandemiya vəziyyəti nəzərə alınaraq, Simpozium ilk dəfə virtual formatda baş tutub.

AZƏRTAC xəbər verir ki, Simpoziumun əsas məqsədi müvafiq sahədə çalışan peşəkarların enerji təhlükəsizliyinin geosiyasi və iqtisadi əhəmiyyəti, bu sahədəki müasir təhdidlər və təhlükələr, risk və ehtimallar, onların növləri və səbəbləri, təhlükələr ilə mübarizə yolları və onların aradan qaldırılması üçün atılacaq addımlar, habelə enerji təhlükəsizliyi sahəsində dövlət siyasətinin qurulmasının əsasları haqqında biliklərini təkmilləşdirmək və bu sahədə olan xarici təcrübəni öyrənməkdir.

“Artıq üçüncü ildir ki, NATO Enerji Təhlükəsizliyi Bilik Mərkəzi ADA Universiteti və ilə birgə enerji təhlükəsizliyi üzrə regional proqramı həyata keçirir və biz bundan məmnunluq duyuruq. Bu il Simpoziumu virtual formatda təşkil etmək zərurəti yarandı. Bu format bizə əvvəlki illərlə müqayisədə regiondan, xüsusilə Türkiyə və Gürcüstandan daha çox iştirakçı cəlb etmək imkanı verdi. Ümid edirəm ki, növbəti il ABŞ, Azərbaycan, Türkiyə və Gürcüstanın, habelə NATO və Aİ-nın qarşılıqlı maraqlarını bölüşdüyü bu strateji əhəmiyyəti olan mövzunu müzakirə etmək üçün ənənəvi formatda toplaşa biləcəyik”, - deyə Simpoziumun təşkilatçılarından olan ABŞ Hərbi Dəniz Qüvvələrinin Ali Məktəbinin professoru Daniel Nussumbaum tədbirin bağlanışında bildirib.

Simpoziumda Azərbaycan, Gürcüstan və Türkiyədən enerji və təhlükəsizlik məsələləri üzrə məsul 40-a yaxın hökumət, qeyri-hökumət və biznes strukturlarının nümayəndələri iştirak edib. Proqram dörd gün ərzində davam edib və proqram çərçivəsində SOCAR-ın vitse-prezidenti Elşad Nəsirov, ABŞ-ın Azərbaycandakı sabiq səfiri Riçard Morninqstar, ABŞ-ın Azərbaycandakı səfiri Li Litzenberqer, Türkiyənin Azərbaycandakı səfiri Erkan Özoral, ABŞ Hərbi Dəniz Qüvvələrinin Ali Məktəbinin professoru xanım Brenda Şaffer çıxış ediblər.

ABŞ-ın Azərbaycandakı səfiri Li Litzenberqer vurğulayıb ki, ABŞ Azərbaycan müstəqillik əldə etdiyi gündən bəri iqtisadiyyatın bütün sahələrində əməkdaşlıq edərək ölkənin müstəqilliyini, sabitliyini, rifahını həmişə dəstəkləyib və bundan sonra da dəstəkləməyə davam edəcək. ABŞ, həmçinin “Cənub Qaz Dəhlizi” layihəsini və ona qoşulan şirkətləri dəstəkləyir.

Türkiyənin Azərbaycandakı səfiri Erkan Özoral Azərbaycan ilə Türkiyə arasında qardaşlıq münasibətlərini yüksək qiymətləndirib. O, Türkiyənin böyük nümayəndə heyətinin bu günlərdə Azərbaycana səfərinin bunun əyani ifadəsi olduğunu vurğulayıb.

Çıxışlar və müzakirələr çərçivəsində Azərbaycan neft və qaz nəqli sistemlərinin önəmi və təhlükəsizliyi, regionda geosiyasi iqlim, dövlət-özəl tərəfdaşlığı və digər mühüm mövzular müzakirə olunub.

Paylaş:

Baxılıb: 1385 dəfə