Payız aylarında immunitetimizi necə gücləndirək?

Bakı:

29 °C

42 %

5 m/s

Əlaqə

AZ RU EN

Ana səhifə / Sosial / Payız aylarında immunitetimizi necə gücləndirək?

Payız aylarında immunitetimizi necə gücləndirək?

09.09.2020 [08:44]

Artıq payız fəsli yaxınlaşır. Payız elə bir fəsildir ki, orqanizm bu dövrdə özünü qışa hazırlayır. Mütəxəssislərin fikrincə, payızda insan öz qida rasionuna xüsusi diqqət yetirməlidir ki, soyuq qış aylarında xəstəlik ehtimalından uzaq olsun. Çünki havalar soyuduqca bədənin xəstəliklərə qarşı müqaviməti də aşağı düşür. Ona görə də temperaturun aşağı düşməsindən qaynaqlanan qrip, soyuqdəymə kimi xəstəliklərə yaxalanmamaq üçün immunitet sistemini gücləndirməyə ehtiyac yaranır. Araşdırmalar göstərir ki, immun sisteminin güclü olması əhəmiyyətli dərəcədə qida rasionundakı makro və mikro elementlərin normasından, eləcə də bağırsaq florasının funksiyasından asılıdır. Belə ki, qidadan alınan zülallar, karbohidratlar və yağlar qan, limfa düyünləri və mədə-bağırsaq sisteminin immun hüceyrələrinə təsir göstərir.
Öz növbəsində, düzgün qidalanmanın əsas prinsiplərindən danışan həkim-dietoloq Tutu Zeynalova deyib ki, hər mövsümdə olduğu kimi, payız aylarında da, eləcə də pandemiya dövründə balanslı və keyfiyyətli qidalanmaq vacibdir: “Payız fəslində təzə tərəvəz və meyvələrin yeyilməsi immuniteti qoruyub saxlamağa kömək edir. Eyni zamanda, müxtəlif balıq məhsulları, ət və ət məhsulları, o cümlədən qırmızı ət və toyuq əti ilə qidalanmaq immunitetin güclənməsində vacib rol oynayır. Həmçinin çərəzlər ilə qidalanmaq da çox faydalı təsir göstərir”.
Onun sözlərinə görə, soyuq aylarda enerji qaynağı sayılan və B qrupu vitaminləri ilə zəngin olan paxlalı bitkilərlə qidalanmaq zəruridir: “Heç şübhəsiz, günümüzün bəlası olan koronavirusa yoluxma riskini azaltmaq üçün düzgün qidalanma ilə yanaşı, maskalardan istifadə və gigiyenik qaydalara əməl etmək lazımdır”.
Tutu Zeynalova bildirib ki, hər gün 3 yaşıl, 3 müxtəlif rəngli və 3 kükürdlü meyvə və tərəvəz istifadə edilməlidir: “Kükürdlü tərəvəz dedikdə kələm, turp, sarımsaq, soğan, göbələk və s. nəzərdə tutulur. Gün ərzində bol maye qəbul edilməsi də orqanizm üçün xeyirlidir. Həmçinin yuxu rejimini tənzimləmək, ən azı, yarım saat fiziki hərəkətlərlə məşğul olmaq, mümkün qədər stressdən uzaq olmaq lazımdır”.
Dietoloq onu da vurğulayıb ki, sağlam qidalanmaq üçün karbohidrat, zülal, yağ, mineral və vitaminlərin düzgün qəbul edilməsi vacibdir. Bütün bunları həyata keçirmək üçün isə, ilk növbədə, orqanizmin vitaminlərə tələbatını ödəmək lazımdır. Orqanizmin ehtiyacı olan vitaminlərin, mineralların yetərli miqdarda, balanslı olaraq qəbulu mühümdür. Belə qidaların kifayət qədər qəbul edilməməsi orqanizmə mənfi təsir göstərir və insan özünü pis hiss edir, fiziki və əqli iş qabiliyyəti zəifləyir.
MÜŞFİQƏ

Paylaş:

Baxılıb: 582 dəfə