Murad Mustafazadə: Özümə söz vermişdim ki, imtahanda yüksək nəticə əldə edəcəyəm

Bakı:

25 °C

69 %

8 m/s

Əlaqə

AZ RU EN

Ana səhifə / Sosial / Murad Mustafazadə: Özümə söz vermişdim ki, imtahanda yüksək nəticə əldə edəcəyəm

Murad Mustafazadə: Özümə söz vermişdim ki, imtahanda yüksək nəticə əldə edəcəyəm

09.09.2020 [08:45]

Xəbər verildiyi kimi, Dövlət İmtahan Mərkəzi (DİM) tərəfindən həm II və III ixtisas qrupları üzrə 13-14 avqust tarixlərində, həm də I və IV ixtisas qrupları üzrə 20-21 avqust tarixlərində keçirilmiş qəbul imtahanlarının nəticələri açıqlanıb. Beləliklə, ənənəyə sadiq qalaraq, bu il də yüksək bal toplayan abituriyentləri oxucularımızla tanış edirik. Və artıq oxucularımıza bu il I ixtisas qrupu üzrə maksimum - 700 bal toplayan Abşeron rayonu, Xırdalan şəhəri, 1 saylı orta məktəbin məzunu Hüseyn Abdullayev, həmçinin, III ixtisas qrupu üzrə maksimum bal toplayan Bakı şəhəri, Binəqədi rayonu 276 nömrəli tam orta məktəbin məzunu Əziz Kərimli haqqında məlumat vermişik.
Onu da vurğulamaq yerinə düşər ki, builki imtahanlarda 700 bal toplamasalar da, iki imtahanın nəticəsinə görə maksimal bal toplayıb xüsusi fərqlənən bir neçə abituriyent də var. Onlardan biri də qəbul imtahanında 688.400 toplayan II ixtisas qrupu üzrə respublika birincisi Murad Mustafazadədir. Murad Sumqayıt şəhəri, Təbiət Elmləri Təmayüllü Gimnaziyadan məzun olub. İmtahanın I mərhələsində 394.3 bal toplayan istedadlı məzun hər iki mərhələnin cəminə görə maksimal olan 688.4 bal toplayıb və bu, II ixtisas qrupu üzrə bu ilki imtahanlarda ən yüksək baldır.
Həmçinin Fənn Olimpiadalarının Respublika turunda Coğrafiya üzrə III yeri tutan abituriyent qəzetimizə açıqlamasında bildirib ki, əslində, pandemiya şəraitində imtahanlara hazırlaşmaq o qədər də asan olmayıb: “Məlum olduğu kimi, pandemiya şəraiti təhsil sistemində müəyyən problemlər yaratdı. Müəllimlərlə üz-üzə görüşmə imkanı olmadığı üçün bütün hazırlıqlar onlayn qaydada aparıldı. Buna baxmayaraq, əlavə zaman qazanmış olduq. Öz üzərimizdə daha çox məşğul olmaq və dəfələrlə təkrar etmək fürsəti əldə etdik”.
Diqqətsizlik üzündən etdiyi səhv nəticəsində 700 bal toplamaq şansını itirən həmsöhbətimiz deyir ki, nəticə yenə də onun istədiyi kimi olub: “Buraxılış imtahanında diqqətsizlikdən yaranan səhvimə görə özümə söz vermişdim ki, ikinci mərhələdə yüksək nəticə əldə edəcəyəm. Onu da deyim ki, universitet hazırlığına başlayandan valideynlərim mənə dəstək oldular. Bu uğurda onların payı danılmazdır. Həmçinin məktəb və məşğələ müəllimlərimə də təşəkkür edirəm. Universitet seçimim isə UNEC olacaq. Bu universitetdə Maliyyə ixtisasına daxil olmağı düşünürəm”.
Murad Mustafazadənin həmçinin beynəlxalq dərəcəli sertifikatları var. Eləcə də o Türkiyə burslarına müraciət edib. Birinci mərhələni uğurla keçən Murad ikinci mərhələnin cavabını gözlədiyini deyir.
MÜŞFİQƏ

Paylaş:

Baxılıb: 592 dəfə