Azərbaycanda korrupsiyaya qarşı mübarizə gücləndirilir

Bakı:

22 °C

88 %

9 m/s

Əlaqə

AZ RU EN

Ana səhifə / Sosial / Azərbaycanda korrupsiyaya qarşı mübarizə gücləndirilir

Azərbaycanda korrupsiyaya qarşı mübarizə gücləndirilir

17.09.2020 [09:47]

Ölkəmizdə bu istiqamətdə həyata keçirilən tədbirlər ardıcıl, sistemli və hərtərəfli xarakter daşıyır
Cənubi Qafqaz regionunun lider dövləti olan Azərbaycanın dinamik inkişafını təmin edən mühüm strateji amillərdən biri də məhz bütün sahələri əhatə edən islahatların ardıcıl olaraq davam etdirilməsidir. Belə ki, Prezident İlham Əliyev tərəfindən həyata keçirilən dərin islahatlar kursu ölkəmizin sosial, iqtisadi, siyasi, ictimai, mədəni həyatını əhatə edir, şəffaf və ədalətli idarəçilik sisteminin daha da gücləndirilməsini, vətəndaş məmnunluğunun təmin edilməsini başlıca vəzifələrdən biri kimi qarşıya qoyur. Eyni zamanda, ölkəmizdə korrupsiya, rüşvətxorluq, bürokratiya, süründürməçilik və digər bu kimi neqativ halların aradan qaldırılması islahatlar kursu çərçivəsində əsas hədəflərdən biridir.
Ümumiyyətlə, əksər ekspertlərin də vurğuladıqları kimi, Azərbaycanın korrupsiyaya qarşı mübarizə təcrübəsi sistemli, hərtərəfli və innovativ xarakter daşıyır. Bu istiqamətdə müvafiq proqramlar, qanunvericilik aktları qəbul olunub, bəhs olunan sahədə yeni strateji baxışlar və vəzifələr müəyyən edilib, korrupsiyaya qarşı mübarizə keyfiyyətcə yeni müstəviyə keçib. Həmçinin, dövlət orqanlarının fəaliyyətində şəffaflığın daha da artırılması üçün ictimai nəzarət mexanizmlərinin tətbiqinin genişləndirilməsi, ictimai şuraların fəaliyyətinin səmərəliliyi təmin olunması istiqamətində addımlar atılması da bu baxımdan xüsusi əhəmiyyətə malikdir. Təbii ki, ciddi qanun pozuntularına yol vermiş vəzifəli şəxslərin məsuliyyətə cəlb olunması, həmçinin ictimai nəzarət mexanizmlərinin formalaşdırılması və bu sahədə vətəndaş cəmiyyəti institutlarının fəallığının təşviq edilməsi də ayrıca qeyd edilməlidir.
Bu istiqamətdə vaxtaşırı olaraq qərarların qəbul edilməsi, həmçinin verilən müvafiq tapşırıqlara uyğun olaraq davamlı addımların atılması öz növbəsində onu deməyə əsas verir ki, ölkəmizdə bundan sonra da korrupsiyaya və rüşvətxorluğa qarşı mübarizə qətiyyətlə davam etdiriləcək. Yeri gəlmişkən, Azərbaycan Respublikasının Korrupsiyaya qarşı mübarizə üzrə Komissiyasının yeni tərkibdə ilk iclasında da bu məsələlər diqqət mərkəzində olub. Komissiyanın sədri Samir Nuriyev qeyd edib ki, korrupsiyaya qarşı mübarizə sahəsində müasir çağırışlara uyğun səmərəli mexanizmlərin tətbiqi üçün yeni təşəbbüslərin irəli sürülməsi zəruridir. Vurğulanıb ki, bu sahədə icra edilən tədbirlər korrupsiyaya şərait yaradan halların səbəblərinin müəyyən edilməsinə və bu kimi mənfi halların qarşısının alınması üçün səmərəli mexanizmlərin yaradılmasına yönəldilməlidir.
Nəticə etibarilə, Azərbaycanda korrupsiyaya qarşı mübarizə gücləndirilir. Bu isə, şübhəsiz ki, vətəndaş məmnunluğunun yüksəlməsinə xidmət etməklə yanaşı, dövlətimizin milli gücünün artması baxımından da strateji əhəmiyyətli faktor kimi mühüm önəm daşıyır.
Nardar BAYRAMLI

Paylaş:

Baxılıb: 570 dəfə