Karantin qaydalarına əməl etməsək, COVID-19 həyatımızdan çəkilib getməyəcək

Bakı:

24 °C

66 %

3 m/s

Əlaqə

AZ RU EN

Ana səhifə / Sosial / Karantin qaydalarına əməl etməsək, COVID-19 həyatımızdan çəkilib getməyəcək

Karantin qaydalarına əməl etməsək, COVID-19 həyatımızdan çəkilib getməyəcək

08.12.2020 [09:16]

Son həftələrdə dünyada, o cümlədən Azərbaycanda yeni növ koronavirus (COVID-19) infeksiyasına yoluxma sayında artım müşahidə olunur. Ümumiyyətlə, havaların soyuması COVID-19-un və digər mövsümi xəstəliklərin aktivləşməsinə şərait yaradır. Çünki havaların soyuması nəticəsində immun sistemi zəifləyir, insanlar qapalı şəraitdə daha çox vaxt keçirir, otaqlar gec-gec havalandırılır ki, bu da həm infeksion xəstəliklərə, həm də hazırda dünyada tüğyan edən yeni növ koronavirus infeksiyasına yoluxma sayınının artmasına səbəb olur. Tibbi ekspertlərin vurğuladıqları kimi, payız-qəş aylarında COVİD-19-a yoluxma sayının artımı gözlənilən olsa da, burada vətəndaşların məsuliyyətsizliyi də rol oynadı.
Məsələ ilə bağlı həkim-pulmonoloq Günay Əliyeva qəzetimizə açıqlamasında bildirib ki, hazırda ikiqat məsuliyyətli davranmaq, həmrəy olmaq dövrüdür: “Sağlamlığımızı qoruyaraq həkimlərə, dövlətimizə kömək etmiş olacağıq. İlk gündən bəri koronavirusa yoluxmanın qarşısını almaq üçün mütəxəssislərin dönə-dönə tövsiyə etdiyi qaydalar dəyişməzdir. Bu qaydalara həm özümüz əməl etməliyik, həm də ətrafımızdakıların əməl etməsinə səbəb olmalıyıq. İctimai qınaq olmalıdır. Tibbi maskadan düzgün istifadə olunmalı, əllər su ilə 20 saniyə yuyulmalı, sosial məsafə gözlənilməlidir. İlk simptomlarda sahə həkimlərinə müraciət olunmalıdır”.
Onun sözlərinə görə, kütləvi toplaşma məkanlarında, ictimai nəqliyyatdan istifadə edərkən mütləq tibbi maska taxılmalı, həmin məkanı tərk etdikdən, avtobusdan düşdükdən sonra imkan varsa, əllər yuyulmalı və ya dezinfeksiya olunmalıdır: “Tibbi maska düzgün taxılmalı, ağız və burun boşluğunu tam tutmalıdır. Onu günlərlə istifadə etmək düzgün deyil, mütləq yenisi ilə əvəzlənməlidir. Tibbi maskanı cibdə gəzdirmək, büküb əldə saxlamaq onun qoruyuculuğunu azaldır. Ünsiyyətdə olarkən hər iki tərəfin maskada olması yoluxma ehtimalının 1 faiz və ondan az olmasına səbəb olur. Bu, böyük rəqəmdir”.
“Xəstə həkimə gec müraciət etdikdə onun həyatını xilas etmək daha da çətinləşir, ya uzunmüddətli müalicəyə ehtiyac yaranır, ya da görülən tədbirlər nəticəsiz qalır. Əhaliyə məsləhət görürəm ki, xəstəliyə ötəri yox, ciddi yanaşsınlar, həkim məsləhəti olmadan özbaşına, kimsənin sözü ilə və ya başqa bir xəstənin qəbul etdiyi dərman preparatlarını qəbul etməsinlər. COVİD-19-un əlamətlərini hiss etdikdə dərhal sahə həkiminə müraciət etmək tövsiyə olunur. Bu zaman həmin şəxs nəzarətə götürülür, əgər vəziyyəti xəstəxanaya yerləşdirilməyi tələb edirsə, tibb müəssisəsinə yerləşdirilir. Bununla yanaşı, hər kəsə karantin rejiminin qaydalarına əməl etməyi, tövsiyələrə məsuliyyətlə yanaşmağı məsləhət görürəm”, - deyə G.Əliyeva bildirib.
MÜŞFİQƏ

Paylaş:

Baxılıb: 667 dəfə