Qafqaz Müsəlmanları İdarəsinin sədri KAICIID-in birgə sessiyasında iştirak edib

Bakı:

26 °C

61 %

9 m/s

Əlaqə

AZ RU EN

Ana səhifə / Sosial / Qafqaz Müsəlmanları İdarəsinin sədri KAICIID-in birgə sessiyasında iştirak edib

Qafqaz Müsəlmanları İdarəsinin sədri KAICIID-in birgə sessiyasında iştirak edib

02.04.2021 [08:52]

Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə martın 31-də KAICIID Beynəlxalq Dinlərarası və Mədəniyyətlərarası Dialoq Mərkəzinin Tərəflər Şurası və Direktorlar Şurasının videokonfrans formatında keçirilən birgə sessiyasında iştirak edib.
QMİ-nin mətbuat xidmətindən AZƏRTAC-a bildiriblər ki, birgə sessiyada KAICIID Təşkilatının Baş katibi Feysal bin Müəmmar, Direktorlar Şurasının və Mərkəzin təsisçi dövlətlərini təmsil edən Tərəflər Şurasının üzvləri - Səudiyyə Ərəbistanı Krallığının Avstriya Respublikasındakı səfiri, şahzadə əlahəzrət Abdullah bin Xalid bin Sultan bin Əbdüləziz Al Səud, Avstriyanın Avropa və Beynəlxalq Məsələlər üzrə Federal Nazirliyinin siyasi direktoru səfir Qreqor Kössler, İspaniya Krallığının Avstriya Respublikasındakı səfirinin müavini Migel Alonso Berrio və Vatikanın Dinlərarası Dialoq üzrə Pontifik Şurasının sədri Kardinal Migel Ayuso iştirak ediblər.
Şeyxülislam A.Paşazadə ilə bərabər, Direktorlar Şurasında təmsil olunan Konstantinopol Ekumenik Patriarxatının Ekzarxı Mitropolit Emmanuel, “Shanti Ashram” təşkilatının direktoru Kezevino Aram, Livan Milli Xristian-Müsəlman Dialoq Komitəsinin Baş katibi Məhəmməd Sammak, Yaponiya Rizxo Kosey-Kay Buddist Təşkilatının prezidenti Koşo Nivano, Beynəlxalq Mərkəzin Baş katibinin müavini Alvaro Albacete, İmam Məhəmməd bin Saud Universitetinin təmsilçisi Hamad əl-Məcid, Amerika Yəhudi Komitəsinin Dinlərarası məsələlər üzrə beynəlxalq direktoru baş ravvin David Rosen də birgə sessiyada iştirak ediblər.
Tədbirdə bir sıra önəmli məsələlər, o cümlədən mərkəzin idarəetmə sistemi ilə bağlı, KAICIID-in inkişaf strategiyası ətrafında müzakirələr aparılıb. Toplantının proqramına dinlərarası dialoqa dair beynəlxalq dövlətlərarası koordinasiya məsələləri, həmçinin təşkilatın inkişaf perspektivləri, genişlənmə prosesi çərçivəsində yeni üzv dövlətlərin qəbulu, təşkilati məsələlər və sair daxil idi. Beynəlxalq Mərkəzin qərargahının yeni ünvanı məsələsi də müzakirə edilib. Bildirilib ki, bir neçə Avropa ölkəsi öz namizədliyini verib. Namizəd dövlətlər arasında Portuqaliyanın adı xüsusi qeyd olunub və qərara gəlinib ki, yaxın günlərdə seçimin nəticələrinə dair rəsmi açıqlama veriləcək.
Həmçinin Beynəlxalq Mərkəzin Tərəflər Şurasının sıralarının genişlənməsi də gündəmdə olub.
Məlumat üçün bildirək ki, KAICIID Beynəlxalq Dinlərarası və Mədəniyyətlərarası Dialoq Mərkəzi Səudiyyə Ərəbistanı, İspaniya, Avstriya tərəfindən təsis olunmuş və Vatikan dövlətinin baş müşahidəçi kimi çıxış etdiyi beynəlxalq hökumətlərarası təşkilatdır. Qərargahı Vyana şəhərində yerləşir. Hazırda Tərəflər Şurasının üzvləri məhz bu təsisçi dövlətlərdir.
Dünyanın ən nüfuzlu beynəlxalq hökumətlərarası təşkilatlarından olan KAICIID-in 9 nəfərlik Direktorlar Şurasında yer alan müsəlman dini lider şeyxülislam Allahşükür Paşazadə yekdilliklə yenidən növbəti 4 il üçün Direktorlar Şurasının üzvü seçilib.
Şeyxülislam Allahşükür Paşazadə videosessiyada Azərbaycan, Qafqaz müsəlmanlarının səmimi salamlarını və xeyir-dualarını iştirakçıların diqqətinə çatdırıb. Direktorlar Şurasının üzvü kimi A.Paşazadə pandemiya şəraitinə baxmayaraq, KAICIID təşkilatının proqram üzrə layihə və təşəbbüslərin həyata keçirilməsi yönündə səylərinin davam etdirildiyini rəğbətlə vurğulayıb və Azərbaycanda bu istiqamətdə görülən işlərdən bəhs edib. Birgə sessiya iştirakçıları tərəfindən Azərbaycan dövlətinin dünyada dinlərarası dialoq və əməkdaşlığa verdiyi töhfələr qeyd olunub.
Onlayn sessiya məhsuldar keçib.

Paylaş:

Baxılıb: 831 dəfə