Azərbaycan öz humanitar missiyasını məsuliyyətlə icra edir

Bakı:

25 °C

61 %

3 m/s

Əlaqə

AZ RU EN

Ana səhifə / Sosial / Azərbaycan öz humanitar missiyasını məsuliyyətlə icra edir

Azərbaycan öz humanitar missiyasını məsuliyyətlə icra edir

17.07.2021 [16:51]

İyulun 13-də Qoşulmama Hərəkatının Xarici işlər nazirlərinin onlayn formatda aralıq konfransı keçirilib. Konfransda Azərbaycan Respublikasının Prezidenti İlham Əliyevin videoformatda çıxışı təqdim olunub. Dövlət başçısı çıxışında ölkələrin suverenliyinə və ərazi bütövlüyünə hörmət, habelə ölkələrin daxili işlərinə qarışmamaq və digər prinsipləri təşviq edən tarixi "Bandunq prinsipləri"nin Azərbaycanın xarici siyasətinin prioritetləri ilə tam uyğun olduğunu qeyd edib. Ölkə başçısı bildirib ki, bu səbəbdən 10 il əvvəl Azərbaycan Qoşulmama Hərəkatı ailəsinin üzvü olub. Eyni zamanda, 2016-cı ildə bütün üzv dövlətlərin yekdil qərarı ilə Azərbaycana 2019-2022-ci illər üçün Qoşulmama Hərəkatına sədrlik həvalə edilib.

Qeyd etmək lazımdır ki, 2019-cu ilin oktyabr ayında Azərbaycan Bakıda Qoşulmama Hərəkatının XVIII Zirvə görüşünü uğurla təşkil edib. Ötən müddət ərzində ölkəmiz beynəlxalq müstəvidə Qoşulmama Hərəkatı ölkələrinin legitim maraqlarının müdafiəsi, ədalət və beynəlxalq hüququn qorunması naminə əməli addımlar atıb. Qoşulmama Hərəkatının sədri qismində Azərbaycan pandemiyaya qarşı qlobal səylərin səfərbər edilməsi üçün bir sıra beynəlxalq təşəbbüslərlə çıxış edib. Zirvə görüşü zamanı Azərbaycan Qoşulmama Hərəkatı adından BMT Baş Assambleyasının dövlət və hökumət başçıları səviyyəsində koronavirusla mübarizəyə həsr edilmiş Xüsusi sessiyasının keçirilməsini təklif edib. Ümumilikdə, həmin təşəbbüs BMT-yə üzv olan 150-dən çox dövlət tərəfindən dəstəklənib və 2020-ci il dekabrın 3-4-də Xüsusi sessiya baş tutub.

Dövlət başçısı Qoşulmama Hərəkatının sədri qismində Azərbaycanın COVID-19 pandemiyasına qarşı qlobal səylərin səfərbər edilməsi üçün bir sıra beynəlxalq təşəbbüslərlə çıxış etdiyində diqqətə çatdırıb. Azərbaycan pandemiya ilə mübarizə sahəsində Qoşulmama Hərəkatı ölkələri də daxil olmaqla 30-dan çox ölkəyə humanitar və maliyyə yardımı edib. Bununla yanaşı, Azərbaycan Ümumdünya Səhiyyə Təşkilatına 10 milyon ABŞ dolları həcmində könüllü maliyyə töhfəsi edib ki, bunun da yarısı Qoşulmama Hərəkatının üzv dövlətləri üçün nəzərdə tutulub.

Azərbaycan Qoşulmama Hərəkatı ölkələrinin beynəlxalq hüquqa və BMT Təhlükəsizlik Şurasının qətnamələrinə uyğun olaraq ölkəmizin ərazi bütövlüyünə və suverenliyinə müntəzəm dəstəyini yüksək qiymətləndirir. Məlum olduğu kimi, Bakı Zirvə görüşünün Yekun Sənədində Qoşulmama Hərəkatı ölkələri ərazilərin güc yolu ilə zəbt olunmasının yolverilməzliyini vurğuladılar və təsdiq etdilər ki, heç bir dövlət Azərbaycan Respublikasının ərazilərinin işğalı nəticəsində yaranmış vəziyyətin qanuniliyini tanımayacaq.

Nəticə etibarilə, Azərbaycan Qoşulmama Hərəkatında uğurla təmsil olunur və hazırda quruma müvəffəqiyyətlə sədrlik edir. Qoşulmama Hərəkatına üzv dövlətlərin 3 illik sədrliyi 2022-ci ildə bitməli olan respublikamıza Hərəkata əlavə bir il də sədrlik etməsi barədə müraciət etməsi isə ölkəmizə olan inam və etimadın növbəti nümunəsidir.

Əfəndi İbrahimli

YAP Səbail rayon təşkilatının baş məsləhətçisi

Paylaş:

Baxılıb: 838 dəfə