Türkiyənin nüfuzlu “Milliyet” qəzetinin internet bloqunda AzərTAc-ın Naxçıvan Muxtar Respublikasındakı bürosu rəhbərinin məqaləsi yerləşdirilib

Bakı:

24 °C

66 %

3 m/s

AZ RU EN

Ana səhifə / Xarici siyasət / Türkiyənin nüfuzlu “Milliyet” qəzetinin internet bloqunda AzərTAc-ın Naxçıvan Muxtar Respublikasındakı bürosu rəhbərinin məqaləsi yerləşdirilib

Türkiyənin nüfuzlu “Milliyet” qəzetinin internet bloqunda AzərTAc-ın Naxçıvan Muxtar Respublikasındakı bürosu rəhbərinin məqaləsi yerləşdirilib

30.12.2014 [09:12]

Dekabrın 29-da qardaş Türkiyənin nüfuzlu “Milliyet” qəzetinin internet bloqunda “Azərbaycan Respublikasının Naxçıvan Muxtar Respublikası 2014-cü ildə böyük uğurlar qazandı” sərlövhəli məqalə yerləşdirilib.
AzərTAc xəbər verir ki, müəllifi AzərTAc-ın Naxçıvan Muxtar Respublikasındakı bürosunun rəhbəri Rauf Əliyevin olduğu məqalədə 2014-cü ilin Naxçıvanda “Muxtariyyət ili” elan edildiyi bildirilib və muxtariyyətin qədim diyarın Azərbaycanın tərkibində saxlanılmasında, onun inkişafında, təhlükəsizliyinin təminində oynadığı mühüm roldan bəhs edilib.
Qeyd olunub ki, bütün bunları nəzərə alan Azərbaycan Respublikasının Prezidenti İlham Əliyev 2014-cü il yanvarın 14-də Naxçıvan Muxtar Respublikasının 90 illik yubileyinin keçirilməsi haqqında Sərəncam imzalayıb, Naxçıvan Muxtar Respublikası Ali Məclisinin Sədri Vasif Talıbov 2014-cü ili muxtar respublikada “Muxtariyyət ili” elan edib. Naxçıvan Muxtar Respublikası Ali Məclisinin Sədrinin bununla bağlı təsdiq etdiyi Tədbirlər Planına uyğun olaraq 2014-cü ildə muxtar respublikanın idarə və təşkilatlarında, elm və təhsil müəssisələrində bir sıra tədbirlər keçirilib. Həmçinin Türkiyə, ABŞ, Bolqarıstan, Cənubi Afrika Respublikasında və digər ölkələrdə muxtariyyətin 90 illiyi ilə bağlı silsilə tədbirlər reallaşıb.
Naxçıvan Muxtar Respublikasının sosial-iqtisadi inkişafının yekunları ilə əlaqədar dördüncü çağırış Naxçıvan Muxtar Respublikası Ali Məclisinin onuncu sessiyasında çıxış edən Naxçıvan Muxtar Respublikası Ali Məclisinin Sədri Vasif Talıbovdan sitatlar verilən məqalədə qədim diyarın intibah dövrünü yaşadığı vurğulanıb.
Bildirilib ki, bu il Azərbaycan Prezidenti İlham Əliyevin səfəri zamanı Naxçıvan Beynəlxalq Hava Limanının və Naxçıvan Muxtar Respublikası Hərbi Prokurorluğunun inzibati binaları, Gənclər Mərkəzi, Naxçıvan-Şahbuz-Batabat magistral avtomobil yolu, Naxçıvan Şəhər Su Anbarı və Sutəmizləyici Qurğular Kompleksi, Kəngərli Rayon Mərkəzi Xəstəxanası, “Arpaçay-1” və “Arpaçay-2” Su Elektrik stansiyaları istifadəyə verilib.
Məqalədə nəzərə çatdırılıb ki, artıq bu gün muxtar respublikada 352 növdə məhsul istehsal edilir. 107-si ərzaq və 229-u qeyri-ərzaq olmaqla, 336 növdə məhsula olan tələbat tamamilə yerli istehsal hesabına ödənilir. 2014-cü ildə muxtar respublikanın şəhər və rayonlarında 47 yeni istehsal və xidmət sahəsi yaradılıb. Ümumilikdə, il ərzində 19 tam orta məktəb binasında tikinti, yenidənqurma və əsaslı təmir işləri həyata keçirilib. 2014-cü ilin ötən dövründə xarici ticarət əməliyyatlarının həcmi 515 milyon 194 min ABŞ dolları təşkil edib. Bu, blokada vəziyyətində olan Naxçıvan üçün mühüm əhəmiyyətə malik nəticələrdir.
Bütün bunların Azərbaycan Prezidenti İlham Əliyevin strateji mövqedə yerləşən Naxçıvan Muxtar Respublikasına diqqət və qayğısı nəticəsində əldə olunduğu məqalədə xüsusi vurğulanıb, naxçıvanlıların vətənpərvərliyi, işgüzarlığı, Ulu öndərimiz Heydər Əliyev siyasi xəttinə sədaqətinin örnək təşkil etdiyi bildirilib.

Paylaş:

Baxılıb: 1607 dəfə