G20 ölkələrinin xarici işlər nazirləri görüşür

Bakı:

25 °C

64 %

7 m/s

Əlaqə

AZ RU EN

Ana səhifə / Xarici siyasət / G20 ölkələrinin xarici işlər nazirləri görüşür

G20 ölkələrinin xarici işlər nazirləri görüşür

07.07.2022 [10:45]

Toplantıdan hansı gözləntilər var?

Nardar BAYRAMLI

7-8 iyul tarixlərində İndoneziyanın Bali adasında Böyük İyirmilik (G20) ölkələrinin xarici işlər nazirlərinin toplantısı keçiriləcək. Görüş öncəsi Avropa İttifaqının Xarici siyasət və təhlükəsizlik məsələləri üzrə Ali Nümayəndəsi Cozep Borrell Ukraynanın xarici işlər naziri Dmitri Kuleba ilə Aİ-nin rəsmi Kiyevə dəstək planlarını müzakirə edib. C.Borrell bildirib ki, nazirlərin görüşü zamanı Aİ Ukraynaya güclü dəstəyini bir daha təsdiqləyəcək, qlobal ərzaq böhranının nəticələrini müzakirə edəcək və Rusiya tərəfini Qara dəniz limanlarını açmağa çağıracaq.

Ukraynanın xarici işlər naziri Dmitri Kuleba isə qeyd edib ki, tərəflər Ukraynanın Aİ-yə namizəd ölkə olduqdan sonra gələcək addımları və G20 ölkələrinin xarici işlər nazirləri toplantısı öncəsi əlaqələndirilmiş mövqeləri müzakirə ediblər. “Aİ-nin Rusiyaya qarşı yeddinci sanksiya paketinin zəruriliyi barədə razıyıq və bunun üzərində işləyirik” - deyə Kuleba vurğulayıb.

G20 ölkələrinin xarici işlər nazirlərinin toplantısından gözləntilər barədə qəzetimizə açıqlama verən politoloq Yeganə Hacıyeva bildirib ki, toplantı çərçivəsində bir sıra vacib qərarlar qəbul ediləcək. Onun sözlərinə görə, nazirlərin görüşündə, ilk növbədə, Ukraynaya maliyyə və hərbi dəstək ifadə olunacaq. Eyni zamanda, Rusiya-Ukrayna müharibəsinin dayandırılması üçün sülhyaratma təşəbbüsləri də irəli sürülə bilər. Politoloq deyib ki, müharibənin dayandırılması üçün daha çox Türkiyə təşəbbüslər göstərir: “Türkiyə-Ukrayna-Rusiya formatında görüşlərin keçirilməsi yenə gündəmə gələ bilər. Proseslər onu göstərir ki, Rusiya və Ukraynaın xarici işlər nazirləri arasında növbəti görüş baş tuta bilər. Bu görüşün də Türkiyənin vasitəçiliyi ilə reallaşması daha inandırıcıdır. “Rusiyanın xarici işlər naziri Sergey Lavrovun da toplantıda iştirakını nəzərə alsaq, belə bir görüşün keçirilməsi ehtimalı böyükdür. Ümumilikdə, Rusiya üçün beynəlxalq platformalarda təmsil olunmaq çox vacibdir. Əks halda, özünü beynəlxalq aləmdən izolyasiya edə bilər”-deyən həmsöhbətimizin fikrincə, beynəlxalq tədbirlərdən kənarda qalmaq Rusiyanın daxili və xarici siyasətində ciddi problemlər yarada bilər. Bu səbəbdən də, Lavrovun G20-nin toplantısında iştirakı təbiidir. Y.Hacıyeva söyləyib ki, Rusiya bundan sonrakı mərhələlərdə Ukrayna ilə bağlı mövqeyi haqda dünyaya aydın mesajlar verməlidir. Eləcə də, Lavrov G20 toplantısında Rusiyanın Avropa, Mərkəzi Asiya və Cənubi Qafqaz siyasətinin vektorlarını elan etməlidir.

Y.Hacıyeva onu da deyib ki, G20 ölkələrinin xarici işlər nazirlərinin toplantısında Ukrayna məsələsi, siyasi və hərbi problemlərlə yanaşı, qlobal iqlim dəyişiklikləri və ərzaq təhlükəsizliyi diqqət mərkəzindədir. Bundan əlavə, politoloq hesab edir ki, qlobal təhlükəsizlik müstəvisində Türkiyənin İşveç və Finlandiyanın NATO-ya üzvlüyü məsələsindəki şərtləri, eləcə də Yaxın Şərq böhranı fonunda qaçqın problemi də aktualdır: “Çünki Suriyadan başlayan miqrant dalğası növbəti mərhələyə keçir. Türkiyə öz qanunları çərçivəsində qaçqın qəbul etmək limitini doldurub. Qeyri-rəsmi statistikaya əsasən bu ölkədə 5 milyona yaxın qaçqın var. Amma həmin insanların bir hissəsi obyektiv səbəblərdən öz vətənlərinə qayıda bilmədiyi üçün Avropaya üz tutacaqlar. Ona görə də, bu problem Türkiyə və Avropa dövlətləri arasında müzakirə olunmalıdır”.

Paylaş:

Baxılıb: 1195 dəfə