Terror qruplaşmalarının legitimləşmə “mübarizə”si

Bakı:

21 °C

78 %

2 m/s

Əlaqə

AZ RU EN

Ana səhifə / Xarici siyasət / Terror qruplaşmalarının legitimləşmə “mübarizə”si

Terror qruplaşmalarının legitimləşmə “mübarizə”si

09.08.2022 [11:15]

N.PAŞA

Formalaşmaqda olan yeni dünya düzəninin əsas tələblərindən biri də müxtəlif terror qruplaşmalarına qarşı həmrəyliyin nümayiş etdirilməsi ilə sərt mübarizə tədbirlərinin görülməsi məsələsidir. Terrorizm insanlığa qarşı ən ağır cinayətlərdən biri hesab edilir. Bu kontekstdən çıxış edərək qeyd etmək lazımdır ki, terrorizmlə mübarizə siyasətinin formalaşdırılması beynəlxalq münasibətlər aktorları üçün ən vacib məsələlərdən biri, indiki halda isə birincisidir.

Müəyyən maraqlı qüvvələr tərəfindən terrorçu qruplaşmaların dəstəklənməsi heç də təsadüfi deyil. Sirr deyil ki, bu və ya digər terror qruplaşmalarının yaradılması böyük güclərin inkişaf etməkdə olan ölkələrə təsir imkanlarını gücləndirmək və beləliklə də orada öz hakimiyyətlərini elan etmələri məqsədinə xidmət edir.

Hazırkı geosiyasi reallıqda bəzi terror qruplaşmalarının daha da aktivləşməsinin, həmin dəstələrin qarşıya olduqca böyük “hədəf”lər qoymalarının şahidi oluruq.

Yeri gəlmişkən, dünən xarici KİV-lərdə yayılan məlumata görə, “Taliban” hökumətinin təhlükəsizlik qüvvələri Əfqanıstanın şərqində yerləşən Kunar əyalətində terrorçu İŞİD qruplaşmasına qarşı əməliyyata başladığını elan edib. Mənbənin xəbərinə görə, bu barədə “Taliban” hərbi qüvvələri 201-ci komandanlığının mətbuat katibliyi açıqlama yayıb.

Bildirilib ki, əməliyyat Kunar əyalətinin Çouki şəhərinin Dare-dive-gül rayonunda keçirilir. Açıqlamaya əsasən, əməliyyat İŞİD tam məhv edilənədək sürəcək. “Taliban”ın müvəqqəti hökuməti əməliyyat nəticəsində ölən və yaralananlar barədə məlumat verməyib.

Bir terrorçu dəstənin digərinə qarşı “mübarizə” aparması hansı məqsədlərə xidmət edir? Baş verənlər tendensiyaya çevrilə bilərmi? Belə bir vəziyyətin davam edəcəyi halda terror qruplaşmalarının dünya dövlətləri tərəfindən rəsmi şəkildə tanınması məsələsi gündəmə gələ bilərmi?

Suallarımızı cavablandıran siyasi şərhçi İlqar Vəlizadə “Yeni Azərbaycan” qəzetinə açıqlamasında bildirib ki, bu halın müşahidə edilməsi ilk deyil: “Ümumiyyətlə, bu illər ərzində Taliban İŞİD-lə mübarizə aparır. Açıq şəkildə mübarizə elan etmək halının müşahidə edilməsi ilk dəfə deyil”.

Politoloq “Taliban” və İŞİD-in regionda fərqli maraqlarının olduğunu və bu maraqların üst-üstə düşmədiyini də diqqətə çatdırıb: “Taliban” Əfqan layihəsidir, elə buna görə də Əfqanıstan ərazisində olan digər qruplaşmaların aktivliyinə hər zaman həssaslıqla yanaşıb. İŞİD-in məqsədi Aralıq dənizindən ta Əfqanıstan-Çin sərhədinə qədər islam dövlətinin qurulması və həmin qurulacaq dövlətdə İŞİD-in aparıcı rol oynaması idi. “Taliban”ın əsas məqsədi isə Əfqanıstanda hakimiyyətə gəlmək və burada öz hakimiyyətini qurmaqdan ibarətdir”.

“Belə olduğu halda deyə bilərik ki, “Taliban” digər oyunçuları öz ərazisində görmək istəmir. Qərb də bundan xəbərdardır. “Taliban” hakimiyyətə gəlməzdən öncə də İŞİD-lə arasında müharibə, mübarizə mövcud idi və bu, “Taliban”ın üstünlüyü ilə nəticələnmiş oldu”, - deyə İ.Vəlizadə qeyd edib.

Paylaş:

Baxılıb: 1256 dəfə