Ankara görüşü nə vəd edir?

Bakı:

26 °C

70 %

2 m/s

Əlaqə

AZ RU EN

Ana səhifə / Xarici siyasət / Ankara görüşü nə vəd edir?

Ankara görüşü nə vəd edir?

14.06.2023 [10:34]

Türkiyə, NATO və İsveç nümayəndələri iyul sammitinə qədər nəticə əldə etməyə çalışır

İyulun 14-də Ankarada Türkiyə, İsveç və NATO nümayəndələri arasında keçiriləcək görüş beynəlxalq birliyin diqqət mərkəzindədir. Görüşdə müzakirə mövzusu İsveçin alyansa üzvlük məsələsidir. Məlumdur ki, İsveçin NATO-ya üzv olmasına razılıq verməyən ölkə Türkiyədir. Rəsmi Ankara İsveçin terror təşkilatlarına dəstəyinin davam etdirdiyi müddətdə bu ölkənin NATO-ya üzvlüyünü dəstəkləməyəcəyini dəfələrlə bəyan edib. İsveç yalnız Türkiyənin haqlı tələblərini yerinə yetirdikdən sonra alyansa üzv ola bilər.

Xatırladaq ki, NATO-nun baş katibi Yens Stoltenberq iyunun 3-də Türkiyəyə səfəri zamanı bu məsələni müzakirə etmişdi. Baş katib Türkiyənin haqlı narahatlığının fərqində olduğunu, İsveçin bu narahatlığın aradan qaldırılması üçün əhəmiyyətli və konkret addımlar atdığını bildirmişdi. Buraya İsveç konstitusiyasına düzəlişlər, silah embarqosuna son qoymaq, PKK da daxil olmaqla, terrorla mübarizə sahəsində əməkdaşlığın gücləndirilməsi kimi addımlar daxil idi.

Bugünlərdə isə İsveçin PKK terror təşkilatının tərəfdarını Türkiyəyə ekstradisiya edəcəyi ilə bağlı informasiya yayılıb. Ekstradisiya edilən 35 yaşlı şəxsin daha sonra PKK ilə əlaqələri üzə çıxıb. Ekstradisiya qərarı yaxın vaxtlarda həyata keçirilməlidir.

Bəs, Ankarada keçirilən üçlü görüşün nəticəsi necə ola bilər? İsveç öz öhdəliklərini yerinə yetirib, iyul sammitində NATO-ya üzv seçilə biləcəkmi? Mövzu ilə bağlı qəzetimizə açıqlama verən politoloq İlyas Hüseynov bildirib ki, Türkiyə ilə NATO arasında olan münasibətlərdə İsveç mövzusu əsas prioritet təşkil edir və NATO şərqə doğru genişlənmək, öz nüfuzunu artırmaq yolunda davam edir. Finlandiya artıq Türkiyənin şərtlərini yerinə yetirdiyi üçün təşkilatın üzvüdür. Onun sözlərinə görə, Qərb İsveçin də NATO-ya üzvlüyü ilə şimal zolağında etibarlı müdafiə təşkil olunacağını düşünür: “Bununla yanaşı, NATO çox ciddi təlimlərə başlayıb. Təlimlərə minlərlə şəxsi heyət və texnika, silah-sursat arsenalı cəlb olunub. Təlimlərdə Finlandiya da iştirak edir. Bu NATO-nun nə qədər prinsipial və qərarlı olduğunu göstərir”.

Politoloq İsveçin NATO-ya üzv olması üçün Türkiyənin tələblərini yerinə yetirməsinin və terrorçuluqla mübarizədə Türkiyənin ədalətli mövqeyini dəstəkləməsinin vacibliyini vurğulayıb: “Yalnız belə olan halda, Türkiyə İsveçin NATO-ya üzv olmasına razılıq verəcək. Türkiyə böyük dövlətdir və düşünürəm ki, tələbləri əsassız deyil, faktlara əsaslanır. PKK terrorçularının Türkiyəyə təhvil verilməsi, eləcə də PKK-ya siyasi, iqtisadi və maliyyə dəstəyinin verilməməsi, onların sığınacaqlarla təmin olunmaması Türkiyənin və onun milli təhlükəsizliyi üçün önəmli məsələdir. İsveç öhdəliklərini operativ şəkildə yerinə yetirərsə, onu iyul sammitində NATO-nun üzvü kimi görə bilərik”.

Gülay Məmmədova

Paylaş:

Baxılıb: 1001 dəfə