Zəfər ruhu – gələcəyə inam

Bakı:

22 °C

54 %

1 m/s

Əlaqə

AZ RU EN

Ana səhifə / YAP xəbərləri / Zəfər ruhu – gələcəyə inam

Zəfər ruhu – gələcəyə inam

06.10.2025 [17:25]

4 oktyabr tarixi Azərbaycan tarixində əlamətdar günlərdən biri kimi qalacaq. 2020-ci ilin məhz bu günündə Vətən müharibəsinin ilk günlərində Azərbaycan Ordusu Cəbrayıl şəhərini və bir sıra kəndləri işğaldan azad etdi. Bu, illərlə həsrətində olduğumuz torpaqlara doğru atılan ilk böyük addımlardan biri oldu. Cəbrayılın azadlığı xalqımızın yaddaşında həm hərbi, həm mənəvi, həm də tarixi baxımdan böyük dönüş nöqtəsi kimi qalır.

Cəbrayıl rayonu 1993-cü ilin avqust ayında Ermənistan tərəfindən işğal olunmuşdu. Otuz ilə yaxın müddətdə bu torpaqlarda nəinki həyat izləri, hətta tariximizin izləri belə silinməyə çalışıldı. Min illik abidələr, kəndlər, qəbiristanlıqlar, məktəblər, evlər dağıdıldı. Lakin xalqımız bu torpaqlardan heç vaxt vaz keçmədi. “Qarabağ Azərbaycandır!” deyimi ilə başlayan milli həmrəylik 2020-ci ilin sentyabrında real hərbi gücə çevrildi və qısa müddətdə öz bəhrəsini verdi.

4 oktyabrda Ali Baş Komandan İlham Əliyevin rəhbərliyi ilə Azərbaycan Ordusu Cəbrayıl şəhərini işğaldan azad etdiyini elan etdi. Bu xəbər ölkənin hər yerində böyük sevinc və qürur hissi ilə qarşılandı. Eyni zamanda bu qələbə düşmənə bir mesaj oldu: Azərbaycan xalqı heç bir torpağını itirməyə razı deyil və öz suverenliyini tam bərpa etmək əzmindədir.

Bu gün Cəbrayıl torpağında yenidən həyat qaynayır. Böyük Qayıdış proqramı çərçivəsində artıq bölgəyə ilk köçlər başlayıb. Dövlətin dəstəyi ilə infrastruktur layihələri həyata keçirilir, müasir yollar, məktəblər, xəstəxanalar, ictimai binalar inşa olunur. Cəbrayıl təkcə bir rayonun adı deyil o, həm də bir xalqın əzmi, dözümü və qələbəyə olan inancının simvoluna çevrilib.

Tarixi zəfər günü olan 4 oktyabr həm də şəhidlərimizin qanı ilə yazılmış bir tarixdir. Bu torpaqların azadlığı uğrunda canından keçən hər bir qəhrəmanın xatirəsi xalqımızın yaddaşında əbədi yaşayacaq. Onların göstərdiyi şücaət sayəsində bu gün biz Cəbrayıla azad şəhər kimi baxırıq və orada həyatın yenidən canlandığını görürük.

Cəbrayılın bugünkü inkişafı, oraya qayıdan hər bir ailənin sevinci, uşaqların məktəb zəngi ilə açılan səhərləri bütün bunlar Vətən müharibəsinin gətirdiyi qələbənin canlı sübutlarıdır. Cəbrayıl yenidən doğulur və bu dirçəliş Azərbaycanın hər bir vətəndaşı üçün qürur mənbəyidir.

4 oktyabr sadəcə bir tarix deyil, bir xalqın birliyinin, ordusunun gücünün, rəhbərliyinin qətiyyətinin və şəhidlərinin qəhrəmanlığının zirvəyə çatdığı gündür. Bu gün hər birimizin yaddaşında əbədi qalacaq. Cəbrayılın Zəfər günü münasibətilə xalqımızı təbrik edir, şəhidlərimizi ehtiramla anır, bu torpaqlarda qurulan sabaha böyük ümidlə baxırıq.

Cəbrayılın Zəfər Günü mübarək olsun!

Rövşən Əhmədov,

YAP Ağcabədi rayon təşkilatının sədri

Paylaş:

Baxılıb: 510 dəfə