Azərbaycanın MDB-də artan rolu və Düşənbə iclasından notlar

Bakı:

26 °C

57 %

9 m/s

Əlaqə

AZ RU EN

Ana səhifə / YAP xəbərləri / Azərbaycanın MDB-də artan rolu və Düşənbə iclasından notlar

Azərbaycanın MDB-də artan rolu və Düşənbə iclasından notlar

14.10.2025 [15:17]

2025-ci ilin oktyabr ayında Tacikistanın paytaxtı Düşənbədə keçirilən Müstəqil Dövlətlər Birliyi (MDB) Dövlət Başçılarının Şurasının növbəti iclası Azərbaycanın bu təşkilatda artan rolunu bir daha təsdiqlədi. Bu zirvə toplantısı təkcə regional əməkdaşlığın müzakirə edildiyi bir platforma deyil, həm də Azərbaycanın beynəlxalq nüfuzunun və diplomatik fəallığının bariz göstəricisi oldu. Prezident İlham Əliyevin toplantıda iştirakı, çıxışları və təqdim etdiyi mövqelər bir daha göstərdi ki, Azərbaycan MDB məkanında söz sahibi olan, təşəbbüskar və müstəqil siyasət yürüdən ölkə kimi çıxış edir. İclasda Azərbaycan regional təhlükəsizlik, iqtisadi əməkdaşlıq, nəqliyyat və enerji layihələrinin inkişafı kimi aktual məsələlərə dair öz baxışını ortaya qoydu. Prezident İlham Əliyev çıxışında ölkəmizin regionda sabitliyin təmin olunmasında oynadığı rolu vurğulayaraq, Azərbaycanın həm enerji təhlükəsizliyi, həm də nəqliyyat qovşaqları baxımından MDB ölkələri üçün vacib tərəfdaş olduğunu qeyd etdi. Xüsusilə Zəngəzur dəhlizi ilə bağlı planların regional inteqrasiyanı gücləndirə biləcək bir təşəbbüs kimi təqdim edilməsi diqqət çəkdi. Bu dəhlizin açılması MDB üzvü olan Orta Asiya ölkələri ilə Avropa arasında daha səmərəli ticarət və logistika əlaqələrinin qurulmasına xidmət edəcək. Azərbaycanın MDB-də rolu təkcə iqtisadi və geostrateji sahələrlə məhdudlaşmır. Son illərdə ölkəmiz humanitar, mədəni və təhsil sahələrində də bir sıra təşəbbüslərlə çıxış edir. MDB-nin humanitar forumlarında Azərbaycanın aktiv iştirakı, ölkəmizdə keçirilən beynəlxalq tədbirlər və mədəniyyət layihələri bu sahədə də əməkdaşlığın dərinləşməsinə töhfə verir. Eyni zamanda, Azərbaycan MDB çərçivəsində qarşılıqlı hörmət və suverenliyə əsaslanan münasibətlərin qurulmasının tərəfdarı olduğunu dəfələrlə bəyan edib. Bu da Azərbaycanın mövqeyinin praqmatik və prinsipial olduğunu göstərir. Düşənbə iclası zamanı Prezident İlham Əliyev Ermənistanla sülh prosesinə də toxundu. Azərbaycanın beynəlxalq hüquqa əsaslanan, ədalətli mövqeyi MDB ölkələri tərəfindən anlayışla qarşılanır. Bu da göstərir ki, Azərbaycan yalnız regionda deyil, həm də MDB məkanında sülhə, sabitliyə və əməkdaşlığa töhfə verən ölkə kimi qəbul edilir. Düşənbədəki MDB zirvəsi Azərbaycanın təşkilat daxilində nüfuzunun və təsir imkanlarının artdığını bir daha ortaya qoydu. Həm siyasi, həm iqtisadi, həm də humanitar sahələrdə Azərbaycanın ortaya qoyduğu mövqe və həyata keçirdiyi siyasət onun MDB-nin gələcək inkişafında fəal iştirak edəcəyini göstərir. Azərbaycanın balanslı, milli maraqlara əsaslanan xarici siyasəti MDB çərçivəsində də öz bəhrəsini verməkdədir. Bu isə ölkəmizin regionda strateji mövqeyini daha da gücləndirir və onu etibarlı tərəfdaş kimi irəli çıxarır.

Nicat Quliyev

YAP Laçın rayon təşkilatının məsləhətçisi

Paylaş:

Baxılıb: 598 dəfə