Füzuli şəhərinin azadlığı – tariximizin qürur səhifəsi

Bakı:

26 °C

65 %

11 m/s

Əlaqə

AZ RU EN

Ana səhifə / YAP xəbərləri / Füzuli şəhərinin azadlığı – tariximizin qürur səhifəsi

Füzuli şəhərinin azadlığı – tariximizin qürur səhifəsi

16.10.2025 [18:14]

Azərbaycan tarixinin ən şanlı günlərindən biri – 2020-ci il oktyabrın 17-si xalqımızın yaddaşına əbədi həkk olundu. Həmin gün Müzəffər Ali Baş Komandan İlham Əliyevin rəhbərliyi ilə Azərbaycan Ordusu Füzuli şəhərini 27 illik işğaldan azad etdi. Bu qələbə təkcə bir şəhərin deyil, bütövlükdə xalqın milli qürurunun və əzminin təntənəsi idi. Füzulinin azad olunması Vətən müharibəsində strateji dönüş nöqtəsi hesab olunur, çünki bu uğurdan sonra Zəngilan, Qubadlı və Şuşaya aparan yol açıldı.

İşğal dövründə Füzuli şəhəri tamamilə yerlə-yeksan edilmiş, yaşayış binaları, məktəblər, xəstəxanalar və mədəniyyət ocaqları dağıdılmışdı. Bu, erməni vandalizminin, qeyri-insani davranışının açıq sübutu idi. Lakin Füzuli xalqın yaddaşında daim yaşadı, onun ruhu sönmədi.

Azadlıqdan dərhal sonra Prezident İlham Əliyev Füzuli rayonuna səfər etdi və burada yenidənqurma işlərinin əsasını qoydu. Füzuli Beynəlxalq Hava Limanı, “Zəfər Yolu”, yeni şəhər planı, müasir məktəblər, tibb mərkəzləri, parklar və yaşayış massivləri qısa müddətdə inşa edildi. Bu sürətli inkişaf, dövlətin Qarabağa münasibətinin ən bariz göstəricisidir.

Bu gün Füzuli həm qəhrəmanlıq, həm də dirçəlişin simvoludur. O, müasir, ekoloji təmiz və ağıllı şəhər konsepsiyası ilə Azərbaycanın gələcək inkişaf modelinə çevrilib. Füzulinin azadlığı xalqın birliyini, dövlətin gücünü və Prezident İlham Əliyevin liderliyinin sarsılmazlığını bir daha sübut etdi.

Füzuli şəhərinin azad olunması Azərbaycan xalqının iradəsinin, əzminin və dövlətçilik ruhunun parlaq təzahürüdür. 17 oktyabr artıq təkcə bir tarixi hadisənin deyil, həm də milli oyanışın, qalibiyyətin simvoluna çevrilib. Bu torpaqların hər qarışında Azərbaycan əsgərinin qəhrəmanlığı, şəhidlərimizin qanı, xalqımızın duaları yaşayır.

Cənab Prezident İlham Əliyevin rəhbərliyi ilə Füzulidə həyata keçirilən bərpa layihələri şəhəri qısa zamanda Qarabağın ən müasir yaşayış mərkəzinə çevirib. Burada salınan parklar, məktəblər, mədəniyyət sarayları, yaşayış binaları və kommunikasiya xətləri dövlətin və xalqın birgə iradəsinin bariz nümunəsidir. Füzuli Beynəlxalq Hava Limanının istifadəyə verilməsi, “Araz Vadisi İqtisadi Zonası”nın yaradılması, kənd təsərrüfatı layihələrinin icrası şəhərin iqtisadi həyatını canlandırıb.

Eyni zamanda, Füzulinin bərpası Azərbaycanın gələcək nəsillərinə milli birliyimizin gücünü göstərir. Bu gün burada həyat bərpa olunur, uşaqlar məktəbə gedir, ailələr evlərinə qayıdır. Şəhərin baş planına uyğun olaraq yaşıl enerji və “ağıllı şəhər” prinsipləri tətbiq edilir.

Füzuli azadlığın, quruculuğun və milli həmrəyliyin mərkəzinə çevrilib. Bu gün onun simasında biz qalib Azərbaycanın gələcəyini görürük. Füzuli dirçəlir, inkişaf edir və bir daha sübut edir ki, bu torpaqların sahibi yalnız Azərbaycan xalqıdır.

Zaur Mehdiyev,

YAP Gədəbəy rayon təşkilatının sədr müavini

Paylaş:

Baxılıb: 592 dəfə